भोपाळच्या लोकरंग महोत्सवात महाराष्ट्रातील भटक्या विमुक्तांच्या लोककलेचा जागर
भोपाळ / प्रतिनिधी – मध्यप्रदेश सरकारच्या सांस्कृतिक परिषदेच्या वतीने आयोजित केलेल्या लोकरंग महोत्सवात महाराष्ट्रातील भटक्या विमुक्त समाजातील लोक कलावंतांनी आपल्या लोककलेचा जागर करीत कला रसिकांना मंत्रमुग्ध केले . भोपाळ येथील रवींद्र भवनामध्ये दि . २६ जानेवारी ते ३० जानेवारी दरम्यान भारतीय स्वातंत्र्याच्या अमृतमहोत्सवी वर्षानिमित्त जनजातीय लोककला एवं बोलीविकास अकादमीच्या माध्यमातून लोकरंग महोत्सवाचे आयोजन करण्यात आले होते . या महोत्सवाचे उद्घाटन मुख्यमंत्री शिवराजसिंह चौहान यांच्या हस्ते करण्यात आले . या लोकरंग महोत्सवात महाराष्ट्रातील भटक्या विमुक्त समाजाचे अभ्यासक सूर्यकांत भिसे व डॉ श्रीकृष्ण काकडे यांच्या मार्गदर्शनाखाली गोंधळी , कुडमुडे जोशी , मरेआईवाले , नंदिवाले , कलंदर , वासुदेव , धनगर , मसणजोगी , बहुरूपी आदी समाजातील लोक कलावंतांनी आपल्या लोककलेचे सादरीकरण केले . त्याला देशभरातून आलेल्या कला रसिकांनी भरभरून दाद दिली . या लोकरंग महोत्सवात देशभरातील भटक्या विमुक्त समाजासह युक्रेनच्या कलाकारांनी आपल्या कलेचे प्रदर्शन केले . जनजातीय लोककला एवं बोलीविकास अकादमीचे संचालक डॉ धर्मेंद्र पारे यांनी या महोत्सवाचे आयोजन केले होते . यावेळी “कला क्षेत्रातील भटक्या विमुक्तांची भूमिका” या विषयी भटक्या विमुक्तांचे अभ्यासक सूर्यकांत भिसे , डॉ श्रीकृष्ण काकडे यांच्यासह विविध राज्यातून आलेल्या अभ्यासकांनी आपले भूमिका मांडली .
