संग्रामनगर ग्रामपंचायतीकडून नागरिकांच्या जीविताशी खेळ?फटाके विक्रीच्या दुकानांना सुरक्षिततेची पाहणी न करताच परवानग्या दिल्याचा आरोप; नियमबाह्य ठिकाणी दुकाने, मोठ्या प्रमाणात साठवणूक!
अकलूज | प्रतिनिधी
सध्या दिवाळीचा सण सुरू असून सर्वत्र खरेदीची लगबग पाहायला मिळत आहे. आर्थिक अडचणी आणि दुष्काळी परिस्थिती असतानाही सर्वसामान्य नागरिक दिवाळीचा आनंद साजरा करण्यासाठी पदरमोड करून खरेदी करत आहेत.
नवीन कपडे, सोने-नाणे आणि दिवाळीच्या प्रमुख आकर्षणांपैकी एक असलेल्या फटाक्यांच्या खरेदीसाठी बाजारपेठांमध्ये गर्दी होत आहे.
मात्र, फटाके हे अत्यंत ज्वलनशील पदार्थ असल्याने त्यांच्या विक्रीसाठी सुरक्षिततेच्या नियमांचे काटेकोर पालन होणे आवश्यक आहे.
अनेक ठिकाणी लोकवस्तीपासून सुरक्षित अंतरावर फटाके विक्रीची दुकाने उभारण्याची व्यवस्था केली जाते.
परंतु संग्रामनगर परिसरात फटाके विक्रीच्या दुकानांना परवानगी देताना आवश्यक सुरक्षिततेची पाहणी करण्यात आली आहे का, असा गंभीर प्रश्न उपस्थित होत आहे
.संग्रामनगर ग्रामपंचायतीचे ग्रामसेवक व प्रशासक यांनी फटाके विक्रीच्या दुकानांना परवानगी देताना सुरक्षिततेच्या बाबींची योग्य तपासणी केली नसल्याचा आरोप नागरिकांकडून करण्यात येत आहे
. विशेष म्हणजे, ज्या ठिकाणी दुकान उभारण्यासाठी परवानगी देण्यात आली आहे, त्या ठिकाणी दुकाने न लावता काही दुकानदारांनी अन्य ठिकाणी दुकाने थाटल्याचे निदर्शनास येत आहे.
अकलूज-माळशिरस मार्गावर परवानगीच्या ठिकाणाऐवजी इतरत्र फटाक्यांची दुकाने सुरू असल्याचे दिसत असतानाही संबंधित दुकानदारांवर कोणती कारवाई करण्यात येणार, असा प्रश्न उपस्थित केला जात आहे.
याबाबत ग्रामसेवक व प्रशासकीय अधिकाऱ्यांशी संपर्क साधला असता समाधानकारक उत्तरे मिळत नसल्याची तक्रार नागरिकांनी केली आहे.
याशिवाय, फटाके विक्रीच्या परवानगीसंदर्भातील साठवणुकीच्या मर्यादेबाबतही प्रश्न उपस्थित होत आहेत.
काही दुकानांमध्ये १०० किलोपेक्षा अधिक फटाक्यांचा साठा असल्याचा आरोप असून, याची अधिकृत तपासणी होणे गरजेचे आहे.
जर फटाक्यांच्या दुकानात आग लागली किंवा स्फोटासारखी दुर्घटना घडली, तर त्याची जबाबदारी कोण घेणार?
संग्रामनगर ग्रामपंचायतीचे ग्रामसेवक, प्रशासक तसेच अकलूज पोलीस स्टेशन आणि संबंधित अग्निशमन व परवाना यंत्रणा या परिस्थितीकडे गांभीर्याने लक्ष देणार का?
नियमांचे उल्लंघन करणाऱ्या दुकानांची तातडीने तपासणी करून योग्य ती कारवाई केली जाणार का?
दिवाळीचा आनंद साजरा करताना नागरिकांच्या जीविताला धोका निर्माण होऊ नये, यासाठी प्रशासनाने तातडीने जागे होण्याची गरज आहे.
संभाव्य दुर्घटना घडल्यानंतर जबाबदारी निश्चित करण्यापेक्षा दुर्घटना घडण्यापूर्वीच प्रतिबंधात्मक उपाययोजना करणे अधिक महत्त्वाचे आहे.
नागरिकांच्या जीविताची जबाबदारी नेमकी कोणाची? हा प्रश्न आता संग्रामनगरमधील नागरिकांकडून उपस्थित केला जात आहे.
