खदान विरोधी संघर्ष सुरुच ठेवणार : विरोधकांचे डाव हाणुन पाडण्यासाठी सहकार्य करा- सैनु गोटा यांचे आवाहन
गडचिरोली /चक्रधर मेश्राम (दि.२० मे) : बेकायदेशिर सुरजागड लोह खाणीच्या विरोधात ग्रामसभेच्या वतीने सुरु असलेल्या खदान विरोधी आंदोलनाला काही लोकांनी राजकिय व व्देषभावनेतुन मागील काही दिवसापासून फेसबुक वाट्सअप आणि पोर्टल सारख्या सोशल मिडीयावर सुरजागड लोहखाण विरोधी आंदोलन आणि आंदोलकांना सोशल मिडीयावर विनाकारण बदनाम करण्याचे काम सुरु केले आहे. मात्र ग्रामसभांनी सुरू केलेले खदान विरोधी आंदोलन अशा आरोपांनी थांबणार नसून ते अधिक तीव्र करण्यात येणार असल्याची माहिती सुरजागड पारंपारिक इलाखा गोटूल समीतीचे प्रमुख सैनू गोटा यांनी पत्रकार परिषदेत दिली.एट्टापली येथील विश्रामगृहात आयोजित पत्रकार परिषदेत पुढे ते म्हणाले की, ” आमच्या ग्रामसभानी फक्त सुरजागड नव्हे तर जिल्ह्यातील २५ जनविरोधी लोहखाणी कायम स्वरुपी रद्द करा” या मागणीसाठी जिल्हाभरातील शेकडो ग्रामसभांच्या वतीने खदान विरोधी आंदोलन करण्यात येत आहे. सदर आंदोलन हे माझ्या एकट्यामुळे नसुन जनतेनी ग्रामसभांमध्ये ठराव करुन आणि लेखी निवेदन, तक्रारी, तसेच धरणे आंदोलन मोर्चा व इतर माध्यमातून प्रखर विरोध केला जात आहे. मात्र भांडवलदारांच्या आणि दलाल लोकप्रतिनिधी, सत्ताधारी आणि अधिकाऱ्यांच्या संगनमताने बळजबरीने सुरजागड येथे खाणीचे काम सुरु आहे.या बेकायदेशिर सुरु असलेल्या कामाला अडथळा होवु नये यासाठी भांडवलदारांनी आणि दलाल लोकप्रतिनिधी, सत्ताधारी आणि काही अधिकारी वेगवेगळ्या क्लुप्त्या लढवुन आंदोलनाच्या स्थानिक नेत्यांनी पैसे घेवुन मॅनेज झाल्याची चर्चा पेरुन बदनाम करण्याचा नाहक प्रयत्न करण्यात येत आहे.माझ्या घरी पोलीस झडतीत पोताभर पैसे मिळाल्याची चर्चा सोशल मिडीयावर करण्यात आली. जर माझ्या घरी पोलीस झडतीत पोताभर पैसे मिळाले तर पोलीसांनी माझ्यावर कारवाही का केली नाही ? या बाबत आरोप करणाऱ्यांनी खुलासा करावा.स्थानिक आमदार हे खदान विरोधी आंदोलन करणाऱ्या ग्रामसभांचा विरोध करणारे असल्याने त्यांच्या मध्यस्थीने पैसे घेण्याचा आरोप हे हास्यास्पद आहेत. मी आजपर्यंत कोणत्याही कंपनी अथवा कोणत्याही आमदारांच्या मध्यस्तीने पैसे किंवा इतर कोणतेही सोई सुविधा घेतलेल्या नाही. मी पैसे घेतले असल्यास जे मध्यस्थी केले असे नमुद आहे त्यांनी जनतेसमोर खुलासा करावा.सुरजागड परिसरात संपुर्ण ग्रामसभा सुरजागड खदान कंपनीचा विरोध करित असतांना स्थानिक आमदारांच्या पक्षाचे ग्रामपंचायत सरपंच व सदस्य हे खदान विरोधी आंदोलनात सहभागी होत नाहीत. जे सहभागी होतात त्यांचा विरोध करतात आणि बदनामी करतात, याचे कारण काय आहे हे त्यांनी जनतेसमोर खुलासा करावा. मी ग्रामसभेचा नेता आहे. प्रचार न करता जिल्हा परिषद सदस्य म्हणुन भरघोष मतानी निवडुन आलो. माझी ग्रामसभा सक्षम आहे. मला कोणत्याही पक्षाची गरज नसतांना मी माझा मुलगा व मुलगी कोण्या राजकिय पक्षाकडून उभा करण्याचा प्रश्नच येत नाही. त्यामुळे ज्यांनी आरोप केला त्यांनी जनतेसमोर खुलासा करावा. मी आजपर्यंत सुरजागडसह जिल्ह्यातील अन्य २५ खदाणीचा विरोध करित आहे. खदाणीमुळे माझ्या आदिवासी बांधवांना होणाऱ्या अन्यायाबाबत व जल , जंगल , जमिन यांच्या होणाऱ्या नुकसानी बाबत मी नेहमी विरोध केला आहे आणि करत राहणार आहे आणि तो माझा हक्क आहे. आणि यासाठी जिल्हाभरातील ग्रामसभांनी मोठे पाठबळ दिलेले आहे. तसेच मी निरंतरपणे खदान विरोधी कार्य करित आहे , मी चुप बसलेलो नाही. मागे ग्रामसभेमार्फत एटापल्ली येथे सुरजागड व अन्य २५ खदान रद्द करणेबाबत जहाल मोर्चा व ठिया आंदोलन केले . त्या आंदोलनातुन मला व ग्रामसभेच्या पदाधिकाऱ्यांना शासन प्रशासन पहाटे ६.०० च्या दरम्यान जबरदस्तीने उचलून नेले व फौजदारी कारवाही सुध्दा केली असून त्याबाबतच्या तारखा मी न्यायालयात भांडत आहे. असे असतांना मलाच बदनाम करण्याचा कट रचला जात आहे. याशिवाय नुकताच मी दिल्ली ला जावुन आमच्यावर खदान कंपनी करीत असलेल्या अन्यायाबाबत हायकोर्टाच्या वकिलांशी चर्चा करुन पत्रकार परिषद घेवून आपल्यावर होणारे अन्यायाची देशभर प्रसिध्दी केली. शेतकरी कामगार पक्षाचे नेते रामदास जराते यांच्या पुढाकाराने विद्यमान आमदार मा.भाई जयंत पाटील यांच्या नेतृत्वात विधान परिषदेत खदानी बंद करण्यात याव्यात यासाठी अर्थसंकल्पीय अधिवेशनात प्रश्न लावून धरुन शासन प्रशासनाला जाब विचारला. कंपणीच्या दलालांना हे सहन झाले नाही त्यामुळे माझी बदनामी करत आहेत. आमच्या संपूर्ण ग्रामसभा आदिवासी बांधवांना होणाऱ्या अन्यायाबाबत व जल , जंगल , जमिन यांच्या होणाऱ्या नुकसानीला विरोध करण्यास सक्षम आहेत. आमचे हक्क मिळविण्यास नेहमी संघर्ष केला आहे आणि करत राहणार आहे. माझ्यावर करण्यात येणारे आरोप हे बिनबुडाचे असून आमच्या भागातील जनतेच्या मनात माझ्याबद्दल तिरस्कार निर्माण करण्याचे काम सुरु आहे . सदर कामामुळे माझ्या परिवारास व माझ्यावर काही विपरित घडल्यास याला जबाबदार माझ्यावर आरोप करणारे दलाल व शासन प्रशासन राहील. मी अखेरच्या श्वासापर्यंत सुरजागडचा संघर्ष सुरु ठेवणार असून मी असो किंवा नसो जनतेनेही आपला हा संघर्ष सुरु ठेवावे असे आवाहनही त्यांनी केले आहे.
