DCC बँक निवडणूक : पंढरपुरात नव्या राजकीय समीकरणांची चर्चा! रणजितसिंह मोहिते-पाटील मैदानात; प्रशांत परिचारक यांच्याशी अर्धा तास चर्चा
पंढरपूर | (प्रतिनिधी)सोलापूर जिल्हा मध्यवर्ती सहकारी बँकेच्या (DCC Bank) निवडणुकीच्या पार्श्वभूमीवर जिल्ह्यातील राजकीय हालचालींना वेग आला आहे.
नेत्यांच्या भेटीगाठी, बैठका आणि संभाव्य आघाड्यांबाबतच्या चर्चांमुळे सहकार क्षेत्रातील राजकारण तापू लागले आहे.
अशातच माजी आमदार रणजितसिंह मोहिते-पाटील यांनी पंढरपुरात भाजप नेते प्रशांत परिचारक यांची भेट घेतल्याने नव्या राजकीय समीकरणांच्या चर्चेला सुरुवात झाली आहे.
ठरावधारकांच्या बैठकीत दोन प्रमुख मागण्या
पंढरपूर तालुक्यातील जिल्हा बँकेच्या निवडणुकीत मतदानाचा अधिकार असलेल्या ठरावधारकांची सोमवारी प्रशांत परिचारक यांच्या उपस्थितीत बैठक झाली.
या बैठकीत परिचारक जो निर्णय घेतील, तो मान्य करण्याची भूमिका ठरावधारकांनी मांडली. त्याचवेळी परिचारक यांनी स्वतः निवडणूक लढवावी आणि पंढरपूर तालुक्याला जिल्हा बँकेत तीन जागा मिळाव्यात, अशा दोन प्रमुख मागण्या पुढे करण्यात आल्या.
तालुक्यातील मतदारांची संख्या अधिक असल्याचाही मुद्दा यावेळी मांडण्यात आला.
मोहिते-पाटील आणि परिचारक यांच्यात अर्धा तास चर्चा
बैठकीनंतर रणजितसिंह मोहिते-पाटील यांनी तेथे भेट दिली. त्यानंतर दोन्ही नेत्यांमध्ये सुमारे अर्धा तास स्वतंत्र चर्चा झाली. या चर्चेत नेमके कोणते मुद्दे मांडण्यात आले, याबाबत अधिकृत माहिती समोर आलेली नाही.
मात्र, जिल्हा बँकेच्या निवडणुकीच्या पार्श्वभूमीवर या भेटीकडे राजकीय वर्तुळाचे लक्ष लागले आहे.
जिल्हाभरातील नेत्यांशी संवाद
अकलूज येथील शिवरत्न बंगल्यावर झालेल्या बैठकीत रणजितसिंह मोहिते-पाटील यांनी जिल्ह्यातील विविध नेत्यांशी प्रत्यक्ष भेटून चर्चा करण्याची भूमिका मांडली होती.
त्यानंतर त्यांनी माढ्याचे आमदार अभिजित पाटील यांच्याशी संवाद साधला. आता प्रशांत परिचारक यांच्याशी झालेल्या भेटीमुळे जिल्हा बँकेच्या निवडणुकीसाठी विविध गटांमध्ये समन्वय साधण्याचे प्रयत्न सुरू असल्याची चर्चा आहे.
भाजपचे वर्चस्व की स्थानिक नेतृत्वाला संधी?
दुसरीकडे, पालकमंत्री जयकुमार गोरे यांनी जिल्हा बँकेवर भाजपचे वर्चस्व प्रस्थापित करण्याच्या दृष्टीने हालचाली सुरू केल्याची चर्चा आहे.
या पार्श्वभूमीवर भाजपशी संबंधित प्रशांत परिचारक आणि मोहिते-पाटील गटातील नेत्यांमधील संवादाला महत्त्व प्राप्त झाले आहे
.मात्र, या भेटीतून कोणते राजकीय निर्णय होणार, जागावाटपाचे सूत्र काय असेल आणि कोणते गट एकत्र येणार, याबाबत अद्याप स्पष्टता नाही
.जागावाटपाच्या चर्चेकडे जिल्ह्याचे लक्ष
सोलापूर जिल्हा मध्यवर्ती सहकारी बँकेची निवडणूक सहकार क्षेत्रापुरती मर्यादित न राहता जिल्ह्यातील विविध राजकीय गटांमधील समन्वय आणि स्थानिक नेतृत्वाच्या भूमिकेची परीक्षा ठरणार आहे.
पंढरपुरातील ठरावधारकांच्या मागण्या आणि नेत्यांच्या भेटीगाठींमुळे आगामी काळात जागावाटप, उमेदवारी आणि संभाव्य आघाड्यांबाबत काय निर्णय होतात, याकडे जिल्ह्याचे लक्ष लागले आहे.
