ह. भ. प. प्रवीण महाराज मिटकल यांची निरपेक्ष कीर्तन सेवा संस्थेच्या माळशिरस तालुकाध्यक्षपदी निवड बाभुळगावच्या प्रवीण महाराजांच्या निवडीबद्दल ग्रामस्थांकडून अभिनंदनाचा वर्षाव
बाभुळगाव (प्रतिनिधी) : वारकरी संप्रदायाच्या माध्यमातून अध्यात्म, परमार्थ आणि समाजप्रबोधनाची सेवा करणारे बाभुळगाव (ता. माळशिरस) येथील ह. भ. प. प्रवीण महाराज मिटकल यांची निरपेक्ष कीर्तन सेवा महाराष्ट्र राज्य संस्थेच्या माळशिरस तालुकाध्यक्षपदी एकमताने निवड करण्यात आली आहे.
ह. भ. प. नाना महाराज कापडणीस (नाशिक) यांच्या माध्यमातून काशीबा महाराज मठ, पंढरपूरचे मठाधिपती ह. भ. प. माऊली महाराज गुरव यांनी ही निवड केली.
प्रवीण महाराज मिटकल यांना त्यांच्या कुटुंबातूनच वारकरी संप्रदायाचा वारसा लाभला आहे. त्यांचे आई-वडील माळकरी असून, त्यांचे चुलते सेवानिवृत्त आदर्श शिक्षक ह. भ. प. सुग्रीव तुकाराम मिटकल यांचे त्यांना अनमोल मार्गदर्शन लाभले आहे.
वारकरी संप्रदाय, अध्यात्म आणि परमार्थासाठी आपल्या आयुष्यातील बहुमूल्य वेळ देत ते निरपेक्ष भावनेने सेवा करीत आहेत.
गेल्या पाच वर्षांपासून प्रवीण महाराज कीर्तन, प्रवचन तसेच विविध धार्मिक सप्ताहांमध्ये व्यासपीठ चालक म्हणून सेवा बजावत आहेत. त्यांच्या या धार्मिक व आध्यात्मिक कार्याची दखल घेऊन त्यांच्यावर तालुकाध्यक्षपदाची जबाबदारी सोपविण्यात आली आहे
.त्यांच्या निवडीबद्दल बाभुळगाव येथील महादेव मंदिरात समस्त ग्रामस्थ, व्यसनमुक्त युवक संघटना आणि हनुमान भजनी मंडळ यांच्या वतीने त्यांचा अभिनंदनपर सन्मान करण्यात आला.
त्यांच्या निवडीमुळे बाभुळगाव परिसरातून आनंद व्यक्त होत असून, वारकरी संप्रदायातील विविध स्तरांतून त्यांच्यावर अभिनंदनाचा वर्षाव होत आहे.
