अवघ्या 3 मिनिटे 39 सेकंदांत 120 अबॅकस प्रश्न सोडवणाऱ्या नंदुरबारच्या प्रनिकाची मुख्यमंत्र्यांकडून प्रशंसा
मुंबई, प्रतिनिधी : नंदुरबार जिल्ह्याच्या शिरपेचात मानाचा तुरा रोवणारी अवघी 7 वर्षीय प्रनिका प्रफुल्ल पाटील हिने अबॅकस क्षेत्रात उल्लेखनीय विक्रम नोंदवत राज्यासह देशाचे लक्ष वेधून घेतले आहे.
प्रनिकाने केवळ 3 मिनिटे 39 सेकंद या अल्पावधीत 120 अबॅकस प्रश्न अचूक सोडवून विक्रमी कामगिरी केली. तिच्या या असामान्य यशाची दखल इंडिया बुक ऑफ रेकॉर्ड्स आणि नॅशनल बुक ऑफ रेकॉर्ड्स यांनी घेत तिच्या नावाची अधिकृत नोंद केली आहे
.या उल्लेखनीय यशानंतर प्रनिकाने नुकतीच मुंबईतील विधान भवन येथे मुख्यमंत्री देवेंद्र फडणवीस यांची सदिच्छा भेट घेतली. या भेटीदरम्यान मुख्यमंत्री फडणवीस यांनी प्रनिकाच्या विक्रमी कामगिरीचे कौतुक करत तिचे मनःपूर्वक अभिनंदन केले.
एवढ्या लहान वयात कठोर परिश्रम, सातत्यपूर्ण सराव आणि आत्मविश्वासाच्या बळावर राष्ट्रीय स्तरावर विक्रम प्रस्थापित केल्याबद्दल त्यांनी प्रनिकाचे विशेष कौतुक केले.
मुख्यमंत्र्यांनी प्रनिकाशी आणि तिच्या कुटुंबीयांशी संवाद साधत तिच्या अभ्यासाबरोबरच अबॅकस क्षेत्रातील वाटचालीची माहिती जाणून घेतली. प्रनिकाने भविष्यातही याच जिद्दीने आणि चिकाटीने प्रगती करत राज्य व देशाचे नाव राष्ट्रीय तसेच आंतरराष्ट्रीय स्तरावर उज्ज्वल करावे, अशा शुभेच्छाही त्यांनी दिल्या.
अबॅकसच्या माध्यमातून विद्यार्थ्यांची गणिती क्षमता, स्मरणशक्ती, एकाग्रता, निर्णयक्षमता आणि मानसिक गणिताचा वेग वाढविण्यास मोठी मदत होते. अशा स्पर्धात्मक क्षेत्रात अवघ्या सातव्या वर्षी राष्ट्रीय विक्रम नोंदविणे ही अत्यंत अभिमानास्पद बाब मानली जात आहे.
प्रनिकाच्या या यशामागे तिची मेहनत, नियमित सराव, शिक्षकांचे मार्गदर्शन आणि पालकांचे सातत्यपूर्ण प्रोत्साहन यांचा मोठा वाटा असल्याचे बोलले जात आहे
.प्रनिकाच्या या यशामुळे नंदुरबार जिल्ह्यात आनंदाचे वातावरण निर्माण झाले असून विविध स्तरांतून तिच्यावर अभिनंदनाचा वर्षाव होत आहे. शैक्षणिक, सामाजिक आणि विविध क्षेत्रांतील मान्यवरांनी तिच्या उल्लेखनीय कामगिरीचे कौतुक करत पुढील वाटचालीसाठी शुभेच्छा दिल्या आहेत
.अल्पवयात राष्ट्रीय विक्रमाची नोंद करून मुख्यमंत्र्यांची भेट घेण्याचा बहुमान मिळविणाऱ्या प्रनिका प्रफुल्ल पाटीलने नंदुरबार जिल्ह्याचे नाव राज्यभरात गौरवाने उज्ज्वल केले असून तिची ही कामगिरी इतर विद्यार्थ्यांसाठी प्रेरणादायी ठरत आहे.
