अंगावर शहारे आणणारा “स्टोरी शिवराज्याभिषेकाची” भव्य ऐतिहासिक नाट्यप्रयोग; अकलूजमध्ये हाऊसफुल प्रतिसाद
अकलूज :(प्रतिनिधी )खासदार धैर्यशील मोहिते पाटील यांच्या मार्गदर्शनाखाली कार्यरत असलेल्या अखिल भारतीय नाट्य परिषद, शाखा अकलूज यांच्या वतीने दि. २ ऑगस्ट रोजी स्मृतीभवन, अकलूज येथे सादर करण्यात आलेला किरण माने यांचा “स्टोरी शिवराज्याभिषेकाची” हा भव्य ऐतिहासिक नाट्यप्रयोग अकलूजकरांसाठी अविस्मरणीय ठरला.
अकलूज व परिसरातील शिवप्रेमींनी उत्स्फूर्त प्रतिसाद देत संपूर्ण शो हाऊसफुल केला.हा केवळ नाट्यप्रयोग नव्हता, तर प्रत्येक शिवभक्ताच्या मनात स्वराज्याचा अभिमान जागवणारा, अंगावर शहारे आणणारा आणि छत्रपती शिवाजी महाराजांच्या तेजस्वी इतिहासाचा साक्षात्कार घडवणारा एक जिवंत ऐतिहासिक अनुभव होता.
विशेष म्हणजे, हा नाट्यप्रयोग लेखक व इतिहास अभ्यासक इंद्रजित सावंत यांच्या ऐतिहासिक अभ्यासाच्या दृष्टीकोनातून साकारण्यात आला आहे.
छत्रपती शिवाजी महाराजांच्या राज्याभिषेक सोहळ्यापूर्वी आणि त्यादरम्यान उद्भवलेल्या विविध ऐतिहासिक घडामोडी, सामाजिक व धार्मिक आव्हाने, राज्याभिषेकासाठी पार पाडावे लागलेले विविध विधी, महाराजांचा पुनर्विवाह, त्या सोहळ्यासाठी झालेला प्रचंड खर्च, तसेच तत्कालीन काळात स्वकीयांकडून झालेला विरोध आणि त्यातून उभे राहिलेले संघर्ष यांचे प्रभावी चित्रण या प्रयोगातून करण्यात आले.
या घटनांचे सादरीकरण करताना समकालीन कागदपत्रे, बखरी, उपलब्ध ऐतिहासिक पुरावे तसेच विविध इतिहास अभ्यासकांच्या संशोधनाचा आधार घेतल्याचे प्रयोगात मांडण्यात आले.
त्यामुळे हा नाट्यप्रयोग केवळ मनोरंजन न राहता इतिहासाच्या विविध पैलूंवर विचार करायला लावणारा आणि अभ्यासाची प्रेरणा देणारा ठरला
.छत्रपती शिवाजी महाराजांचा राज्याभिषेक हा केवळ एका राजाचा राज्यारोहण सोहळा नव्हता, तर हिंदवी स्वराज्याच्या विजयाचा, स्वाभिमानाचा आणि स्वातंत्र्याच्या नव्या पर्वाचा प्रारंभ होता.
त्या ऐतिहासिक क्षणामागील संघर्ष, त्याग, दूरदृष्टी, राजकारण, धार्मिक आणि सामाजिक पार्श्वभूमी यांचे अत्यंत प्रभावी सादरीकरण प्रेक्षकांना अक्षरशः शिवकालात घेऊन गेले
.कार्यक्रमातील प्रत्येक प्रसंग, प्रभावी संवाद, नेत्रदीपक प्रकाशयोजना, दिमाखदार संगीत आणि कलाकारांचा जिवंत अभिनय यामुळे प्रेक्षक भारावून गेले.
अनेक प्रसंगी डोळे पाणावले, तर अनेक प्रसंगी अंगावर शहारे आले आणि छाती अभिमानाने भरून आली
. उपस्थित प्रत्येकाच्या मनात स्वराज्याविषयीचा आदर आणि शिवचरित्राविषयीची प्रेरणा अधिक दृढ झाली.अकलूज व परिसरातील असंख्य शिवप्रेमींनी या कार्यक्रमाला उत्स्फूर्त प्रतिसाद दिला.
स्मृतीभवन प्रेक्षकांनी फुलून गेले आणि संपूर्ण नाट्यप्रयोग हाऊसफुल झाला.
आपल्या वैभवशाली इतिहासाविषयीची जनतेची ओढ आणि छत्रपती शिवाजी महाराजांविषयीचे अपार प्रेम या निमित्ताने पुन्हा एकदा अधोरेखित झाले.
आजच्या पिढीपर्यंत आपल्या इतिहासाचे सत्य, स्वराज्याची प्रेरणा आणि राष्ट्रप्रेमाची भावना पोहोचविण्याचे मोठे कार्य अशा कलाकृतींमधून होत आहे.
इतिहास हा केवळ वाचण्याचा विषय नसून तो अनुभवण्याचा आणि पुढील पिढीपर्यंत अभिमानाने पोहोचवण्याचा वारसा आहे, याची जाणीव हा नाट्यप्रयोग करून देतो.
या भव्य ऐतिहासिक नाट्यप्रयोगाची निर्मिती अभय जगताप आणि किरण माने यांनी केली असून, अभ्यासपूर्ण आणि प्रभावी लेखन सतीश तांबडे यांचे आहे. नाट्यप्रयोगाचे दिग्दर्शन विनायक कळवणकर यांनी अत्यंत प्रभावीपणे केले आहे. संगीत दिग्दर्शन रूपेश देशमाने आणि शिल्पेश म्हात्रे यांनी केले असून, त्यांच्या संगीतामुळे प्रत्येक प्रसंग अधिक जिवंत आणि भावस्पर्शी झाला आहे.
लेखक, निर्माते, दिग्दर्शक, संगीतकार, कलाकार आणि पडद्यामागील सर्व सहकाऱ्यांच्या अथक परिश्रम, ऐतिहासिक अभ्यास आणि कलेप्रती असलेल्या निष्ठेमुळे इतिहासाला कलात्मकतेची अप्रतिम जोड लाभली आहे.
परिणामी, स्वराज्याचा अभिमान जागवणारी, इतिहास नव्या पिढीपर्यंत प्रभावीपणे पोहोचवणारी आणि प्रत्येक प्रेक्षकाच्या मनावर कायमचा ठसा उमटवणारी एक दर्जेदार सांस्कृतिक कलाकृती साकार झाली आहे
.या भव्य ऐतिहासिक नाट्यप्रयोगास महाराष्ट्र राज्याचे माजी उपमुख्यमंत्री विजयसिंह मोहिते पाटील यांच्यासह राजकीय, सामाजिक, शैक्षणिक, सांस्कृतिक तसेच विविध क्षेत्रांतील अनेक मान्यवर उपस्थित होते.
त्यांच्या उपस्थितीमुळे कार्यक्रमाची शोभा अधिकच वाढली. सदर कार्यक्रम यशस्वी करण्यासाठी अखिल भारतीय नाट्य परिषद, शाखा अकलूजचे पदाधिकारी, कार्यकर्ते आणि सर्व सदस्यांनी नियोजनापासून ते कार्यक्रमाच्या यशस्वी अंमलबजावणीपर्यंत अथक परिश्रम घेतले.
त्यांच्या उत्कृष्ट नियोजनामुळे आणि सामूहिक प्रयत्नांमुळे हा ऐतिहासिक नाट्यप्रयोग अकलूजच्या सांस्कृतिक इतिहासात एक अविस्मरणीय पर्व ठरला.
अशा प्रेरणादायी आणि इतिहासाची जाणीव करून देणाऱ्या कार्यक्रमांचे आयोजन सातत्याने होत राहावे, हीच प्रत्येक शिवप्रेमीची अपेक्षा आहे.
छत्रपती शिवाजी महाराजांचा इतिहास हा केवळ भूतकाळ नसून तो स्वाभिमान, शौर्य, न्याय आणि राष्ट्रप्रेमाचा अखंड प्रेरणास्रोत आहे. तो प्रत्येक पिढीपर्यंत अशाच प्रभावी माध्यमातून पोहोचत राहणे ही काळाची गरज आहे.
