अकलूजमध्ये १४ मार्चला ‘सहकार महर्षि केसरी’ बैलगाडा शर्यतीचा थरार; पावणेपाच लाखांची बक्षिसे
अकलूज (प्रतिनिधी):
सहकारमहर्षी कै. शंकरराव मोहिते-पाटील यांच्या स्मरणार्थ, अकलूज येथील श्री विजय गणेशोत्सव मंडळ ट्रस्टच्या वतीने शनिवार, १४ मार्च २०२६ रोजी भव्य ‘सहकार महर्षि केसरी’ ओपन बैलगाडा शर्यतीचे आयोजन करण्यात आले आहे.
अकलूज-चाकोरे रोडवरील शिवकिर्ती शेतीफार्म येथे हा शर्यतीचा थरार रंगणार असून, विजेत्यांवर बक्षिसांचा वर्षाव होणार आहे.
पश्चिम महाराष्ट्रात बैलगाडा शर्यतीची मोठी क्रेझ असून, या स्पर्धेसाठी एकूण ४ लाख ७५ हजार रुपयांची रोख बक्षिसे ठेवण्यात आली आहेत.
स्पर्धेचे अध्यक्षस्थान राज्याचे माजी उपमुख्यमंत्री विजयसिंह मोहिते-पाटील भूषविणार आहेत, तर कार्याध्यक्ष म्हणून विधानपरिषद आमदार रणजितसिंह मोहिते-पाटील काम पाहणार आहेत.
या भव्य स्पर्धेत प्रथम क्रमांकासाठी १ लाख ५० हजार रुपये, द्वितीय क्रमांकासाठी १ लाख १० हजार रुपये, तृतीय क्रमांकासाठी ७१ हजार रुपये, चतुर्थ ६१ हजार, पाचवा ५१ हजार, सहावा ३१ हजार, सातवा २१ हजार आणि आठव्या क्रमांकासाठी ११ हजार रुपयांचे बक्षिस देण्यात येणार आहे. तसेच, सेमी फायनलमध्ये दुसऱ्या क्रमांकावर येणाऱ्या गाडीसही योग्य बक्षिस देऊन गौरविण्यात येणार असल्याचे आयोजकांनी सांगितले.
स्पर्धकांसाठी ऑनलाइन नोंदणी १ मार्च ते १३ मार्च २०२६ या कालावधीत सकाळी ९ ते रात्री ९ या वेळेत सुरू राहील. प्रवेश फी १ हजार रुपये असून, कोणत्याही परिस्थितीत ऑफलाइन नोंदणी स्वीकारली जाणार नाही, याची बैलगाडा मालकांनी नोंद घ्यावी.
शर्यतीत बैलांच्या सुरक्षेला प्राधान्य देण्यात आले असून, स्पर्धेचे नियम अत्यंत कडक आहेत. बैलांचे आरोग्य प्रमाणपत्र (Fitness Certificate) अनिवार्य करण्यात आले आहे. तसेच, शर्यतीदरम्यान बैलाला मारहाण केल्यास संबंधित गाडी स्पर्धेतून बाद करण्यात येईल. पंचांचा निर्णय अंतिम राहील.
शर्यत पाहण्यासाठी येणाऱ्या प्रेक्षकांनी स्वतःच्या जबाबदारीवर उपस्थित राहावे, असे आवाहन आयोजकांनी केले आहे.
स्पर्धेत सहभागासाठी यशोदिप माने-देशमुख (9518768567),मेघराज इनामदार (9766091409),सागर करडे (9834659004),दिपक कोडलकर(9637914113), आनंद देवकर(9767872222), रविराज जगताप(8308424444).यांच्याशी संपर्क साधावा,
असे आवाहन श्री विजय गणेशोत्सव मंडळ ट्रस्टतर्फे करण्यात आले आहे.
