प्रताप क्रीडा मंडळाच्या आट्यापाट्या स्पर्धेला दिमाखात प्रारंभ..
अकलूज (प्रतिनिधी) प्रताप क्रीडा मंडळ शंकरनगर अकलूज यांनी आयोजित केलेल्या भव्य आट्यापाट्या स्पर्धेला दिमाखात प्रारंभ झाला. सर्वाधिक बक्षिसे, सर्वाधिक संघांचा सहभाग व मोठा प्रतिसाद असणारी ही राज्यातील एकमेव स्पर्धा ठरावी. या स्पर्धेसाठी सुमारे एक लाख ३० हजाराची रोख बक्षीसे असून ८० संघांनी या स्पर्धेत सहभाग नोंदविला आहे. विजयसिंह मोहिते पाटील क्रीडा संकुल येथे आयोजित केलेल्या स्पर्धेचे उद्घाटन महाराष्ट्र राज्य आट्यापाट्या महामंडळाचे सहसचिव शरद गव्हार यांच्या हस्ते व प्रताप क्रीडा मंडळाच्या अध्यक्षा कु. स्वरूपाराणी मोहिते पाटील, सोलापूर जिल्हा आट्यापाट्या संघटनेचे अध्यक्ष बाबासाहेब कापसे, उपाध्यक्ष राजकुमार मुंबरे यांच्या प्रमुख उपस्थितीत झाले.
यावेळी दिपकराव खराडे पाटील, अँड .नितीनराव खराडे पाटील, प्रदीपराव खराडे पाटील, स.म. कारखान्याचे उपाध्यक्ष शंकरराव माने देशमुख, माजी उपाध्यक्ष अँड. प्रकाशराव पाटील, रामचंद्र सावंत पाटील, तसेच रावसाहेब मगर, लक्ष्मण शिंदे, रावसाहेब पराडे, महादेव घाडगे, राजेंद्र भोसले, गोविंद पवार, नानासाहेब मुंडफने, रामचंद्र सिद, महादेव अंधारे, विराज निंबाळकर, धनंजय सावंत, पांडुरंग एकतपुरे, वसंतराव जाधव, रामचंद्र गायकवाड, सुभाष दळवी, लक्ष्मण आसबे, मंडळाचे उपाध्यक्ष प्रतापराव पाटील, सचिव पोपटराव भोसले पाटील, विविध संस्थांचे आजी-माजी संचालक, खेळाडू मोठ्या संख्येने उपस्थित होते.
प्रास्ताविकात स्पर्धा प्रमुख यशवंत माने देशमुख म्हणाले, मंडळाचे संस्थापक अध्यक्ष जयसिंह मोहिते पाटील यांनी ग्रामीण खेळांना प्रोत्साहन मिळावे यासाठी स्पर्धेला सुरुवात केली. हे स्पर्धेचे हे ३९ वे वर्ष आहे. या स्पर्धेसाठी दोन मैदाने आहेत. स्पर्धेसाठी ८० संघांनी नोंदणी केली आहे. प्रताप क्रीडा मंडळांने राबविलेल्या राज्य आणि राष्ट्रीय क्रीडा स्पर्धाचाही त्यांनी आढावा घेतला.
शरद गव्हार म्हणाले, अकलूजकरांचे नियोजन हे राज्याला परिचित आहे. भविष्यात आट्यापाट्याच्या राज्यस्तरीय स्पर्धा अकलूजकरांना देण्याचे मी आश्वासन देतो.
बाबासाहेब कापसे म्हणाले, सोलापूर जिल्हा हा जगात आट्यापाट्या मध्ये प्रथम आहे. राजकुमार मुंबरे म्हणाले, राष्ट्रीय स्पर्धेपेक्षाही चांगले नियोजन अकलूज येथे असते. शालेय खेळात हा खेळ समाविष्ट केला आहे. २०१६ पर्यंत शासकीय सेवेत या खेळाला विशिष्ट कोठा होता. परंतु शासनाने शालेय गुनातून या खेळाचे पाच टक्के गुण वगळलेत. मंडळाच्या अध्यक्षा स्वरूपाराणी मोहिते पाटील यांचे पाठबळ आम्हाला मिळाल्यास आम्ही शासनाकडून तो कोठा पुन्हा मिळवू असे त्यांनी आश्वासित केले.
स्पर्धेत मुंबई १, माळशिरस ३९, पंढरपूर २४, माढा६, सांगोला ४, उस्मानाबाद ४, मंगळवेढा २ अशा तालुक्यातील एकूण ८० संघांनी सहभाग नोंदवला. प्रारंभी उद्घाटनाचा सामना सहकार महर्षी कारखाना अ विरुद्ध ब यांच्यात होऊन अ संघ विजयी ठरला. स्पर्धेचे सूत्रसंचालन किरण सूर्यवंशी यांनी केले.
चौकट…१.. माजी उपमुख्यमंत्री विजयसिंह मोहिते पाटील, प्रताप क्रीडा मंडळाचे संस्थापक अध्यक्ष जयसिंह मोहिते पाटील, अकलूज बाजार समितीचे सभापती मदनसिंह मोहिते पाटील यांनी स्पर्धेला भेट देऊन खेळाडूंना प्रोत्साहन दिले. यामुळे खेळाडूंचा उत्साह द्विगुणीत झाला.
चौकट..२..या स्पर्धेसाठी सर्वाधिक बक्षिसे..प्रथम क्रमांकास रोख रुपये ४४ हजार व चषक, द्वितीय क्रमांकास रोख रुपये ३३ हजार, तृतीय क्रमांकास रुपये २२ हजार रोख, चौथा क्रमांकास रुपये ११ हजार रोख, व उपांत्य फेरीत पराजित होणाऱ्या चार संघांना प्रत्येकी ५ हजार रुपये रोख अशी बक्षिसे ठेवण्यात आली आहेत.
