अकलूज व मोरोची संघांनी पटकावले सर्वसाधारण विजेतेपद..प्रताप क्रीडा मंडळाच्या समूह नृत्य स्पर्धा…
अकलूज (प्रतिनिधी)येथील प्रताप क्रीडा मंडळाच्या वतीने आयोजित केलेल्या ४२ व्या शालेय मुला-मुलींच्या समूह नृत्य स्पर्धेत शहरी गटात सदाशिवराव माने विद्यालय अकलूज यांनी तर ग्रामीण गटात मोरजाई विद्यालय मोरोची या संघांनी सर्वसाधारण विजेतेपद पटकावले.विजेत्या संघांना मंडळाचे संस्थापक अध्यक्ष जयसिंह मोहिते पाटील यांच्या हस्ते फिरता चषक, सन्मानपत्र, रोख रक्कम देऊन गौरविण्यात आले. स्मृतीभवन येथे मागील तीन दिवसापासून सुरू असलेल्या समूह नृत्य स्पर्धेचा समारोप झाला. यावेळी मंडळाच्या अध्यक्षा स्वरूपाराणी मोहिते पाटील, अँड. नितीनराव खराडे पाटील, दीपकराव खराडे पाटील, बाल सिनेकलाकार पृथ्वीराज सरनाईक, सयाजीराजे मोहिते पाटील, कृष्णप्रिय मोहिते पाटील, लक्ष्मण आसबे, महादेव अंधारे, प्रताप पाटील, पोपटराव भोसले पाटील, वसंत जाधव, स्पर्धा प्रमुख संजय गळीतकर, पोपटराव देठे, डॉ. विश्वनाथ आवड, अमोल फुले आदी मान्यवर उपस्थित होते सदरच्या स्पर्धा अति ग्रामीण, ग्रामीण व शहरी या गटात पार पडल्या. स्पर्धेत एकूण ९३ संघांतून १३०० कलाकार सहभागी होते. यावेळी बोलताना जयसिंह मोहिते पाटील म्हणाले, १९७९ साली सदरच्या स्पर्धेला सुरुवात झाली. कालांतराने अनेक भव्य दिव्य कार्यक्रम राबवले .यामध्ये रयतेचा राजा, राजा शिवछत्रपती हे महानाट्य, सलग २७ वर्ष सुरू असलेली राज्यस्तरीय लावणी नृत्य स्पर्धा यांचा समावेश होता. यातून अनेक लहान, मोठे व ग्रामीण कलाकारांना संधी मिळाली. शालेय जीवनात विद्यार्थ्यांनी एकादी कला आत्मसात करावी. कला ही जगायला शिकवत असते असे सांगून अनेक जुन्या नव्या आठवणींना उजाळा दिला. स्वरूपाराणी मोहिते पाटील म्हणाल्या, स्पर्धेत सहभागी झालेले सर्वच विद्यार्थी हे सत्कारमूर्ती आहेत. सहभागी प्रत्येक कलाकारांना मंडळाच्या वतीने सहभाग प्रमाणपत्र देण्यात येणार आहे.स्पर्धेच्या शेवटच्या दिवशी सादर झालेल्या थीम डान्स प्रकारात ग्रामीण गटात प्रथम विजयसिंह मोहिते पाटील विद्यालय वाघोली, द्वितीय कृष्णानंद विद्यामंदिर पाटील वस्ती व तृतीय मोरजाई विद्यालय मोरोची तर शहरी गटात प्रथम सदाशिवराव माने विद्यालय अकलूज, द्वितीय महर्षी शंकरराव मोहिते प्रशाला यशवंतनगर या संघांनी क्रमांक पटकावले. यावेळी परीक्षक सागर भजनावळे, पंकज पवार, किरण लोंढे यांचे सह सर्व नृत्य दिग्दर्शक व मंडळासाठी सहकार्य करणाऱ्या सर्वच सेवकांचा सत्कार ही करण्यात आला. सारे जहाँ से अच्छा गीताने स्पर्धेची सांगता झाली.
