*प्रताप क्रीडा मंडळाच्या समूह नृत्य स्पर्धेचे आयोजन*. अकलूज (प्रतिनिधी). कला, क्रीडा, सांस्कृतिक, सामाजिक क्षेत्रात मोलाचे योगदान देणाऱ्या शंकरनगर अकलूज येथील प्रताप क्रीडा मंडळाच्या वतीने दि. २३ ते २५ डिसेंबर २०२२ या तीन दिवसाच्या कालावधीत शालेय मुला मुलींच्या समुह नृत्य स्पर्धेचे आयोजन केले असल्याची माहिती प्रताप क्रीडा मंडळाच्या विद्यमान अध्यक्षा मा.कु. स्वरुपाराणी जयसिंह मोहिते पाटील यांनी दिली. सहकार महषिॅ शंकरराव नारायणराव मोहिते पाटील यांच्या जयंती निमित्त सदर स्पर्धेचे आयोजन केले असून शालेय मुला मुलींच्या सुप्त कलागुणांना चालना मिळवून ते भावी जीवनात महान कलाकार बनावेत. या उद्देशाने स्पर्धा होत आहेत. प्रताप क्रीडा मंडळाचे संस्थापक अध्यक्ष मा.श्री. जयसिंह शंकरराव मोहिते पाटील यांच्या मार्गदर्शनाखाली सन १९८० पासून सदरच्या समुह नृत्य स्पर्धा आयोजित केल्या जातात. स्पर्धेचे हे ४२ वे वर्ष आहे. या स्पर्धेमुळे अनेक ग्रामीण व स्थानिक कलाकारांना मोठे व्यासपीठ मिळाले आहे. चित्रपट, टीव्ही मालिका, रियालिटी शो मधून अनेक कलावंत आज अभिनेता, अभिनेत्री, संगीतकार, दिग्दर्शक, लेखक नृत्यांगना कॅमेरामन व तंत्रज्ञ म्हणून नावलौकिक प्राप्त करीत आहेत प्रताप क्रीडा मंडळाच्या विद्यमान अध्यक्षा स्वरूपाराणी जयसिंह मोहिते पाटील यांच्या कल्पनेतून याही वर्षी सदरच्या स्पर्धा अत्यंत आकर्षक व वेगळ्या पद्धतीने आयोजित केले आहेत. सहकार महर्षी शंकरराव मोहिते पाटील स्मृती भवन शंकर नगर येथे होणाऱ्या स्पर्धेसाठी शहरी गट ग्रामीण गट व अति ग्रामीण गट या तिन्ही गटासाठी रोख रकमेसह स्वतंत्र जनरल चॅम्पियनशिप (फिरता चषक) बक्षीस म्हणून देण्यात येणार आहे. या तीनही विभागासाठी गट क्रमांक एक इयत्ता १ली ते ४ थी कॅसेट गीत, गट क्रमांक दोन इयत्ता ५ वी ते ७ वी कॅसेट गीत, गट क्रमांक तीन इयत्ता८ वी ते १० वी कॅसेट गीत( लोकनृत्य ग्रामीण व अति ग्रामीण) गट क्रमांक तीन इयत्ता ८ वी ते १० वी कॅसेट गीत( पाश्चिमात्य नृत्य शहरी) गट क्रमांक चार इयत्ता ५ वी ते १० वी कॅसेट गीत (प्रासंगिक नृत्य संवाद थीम डान्स) गट क्रमांक पाच इयत्ता ११ वी ते सर्व महाविद्यालयीन गट प्रासंगित नृत्य थीम डान्स असे गीत प्रकार आहेत. स्पर्धेतील सर्व सहभागी कलाकारांना मंडळाकडून मोफत भोजन व निवास सुविधा पुरवली जाते. स्पर्धेतील एका गीतात कमीत कमी ६ व जास्तीत जास्त १६ कलाकार सहभागी होऊ शकतात. आणि एका गीतास कमीत कमी ३ ते जास्तीत जास्त १० मिनिटांचा कालावधी सादरीकरणासाठी दिला जातो. स्पर्धेसाठी २१ समित्या नियोजनबद्ध कार्यरत असल्याचे मंडळाचे सचिव पोपटराव भोसले पाटील यांनी सांगितले. सदर स्पर्धेसाठी शिक्षण प्रसारक मंडळाच्या विविध शाखेबरोबरच इतरही जिल्हा परिषद शाळा, मराठी व इंग्रजी माध्यमाच्या शाळांनी जास्तीत जास्त सहभागी होण्याचे आवाहन स्पर्धा प्रमुख संजय गळीतकर व प्रा.डाॅ. विश्वनाथ आवड यांनी केले आहे. स्पर्धेसाठी प्रताप क्रीडा मंडळाचे मार्गदर्शक संस्थापक अध्यक्ष जयसिंह शंकरराव मोहिते पाटील ,शिक्षण प्रसारक मंडळाचे अध्यक्ष संग्रामसिंह जयसिंह मोहिते पाटील, विद्यमान अध्यक्षा स्वरूपाराणी जयसिंह मोहिते पाटील, ॶॅड. नितीनराव खराडे, प्रतापराव पाटील, वसंतराव जाधव हे मान्यवर समन्वय समितीच्या माध्यमातून कार्यरत आहेत. यावेळी स्पर्धा प्रमुख पोपटराव देठे ,अमोल फुले उपस्थित होते.
