माऊलीच्या चेहऱ्यावरील चिंतामुक्त भाव, हीच खरी माझ्या कामाची पावती -आ. राम सातपुते
अकलूज (प्रतिनिधी )माळशिरस विधानसभा मतदारसंघातील माळीनगर येथील मोलमजुरी करून उदरनिर्वाह चालविणार्‍या ठकुताई खरवडे यांचा १० वर्षे वयाचा मुलगा लक्ष्मण याला मुत्राशयाचा त्रास होता. त्याच्या ऑपरेशनसाठी सुमारे १ लाख ५० हजार रुपये खर्च सांगण्यात आला होता. मोलमजुरी करून जगणार्‍या ठकुताईना हा खर्च पेलवणारा नव्हता, पण मुलाचे ऑपरेशन करणे तर गरजेचे होते. त्यांनी आजूबाजूच्या नागरिकांच्या तोंडून माळशिरस येथील आ. राम सातपुते यांच्या जनता दरबार विषयी ऐकले होते. त्यामुळे त्यांनी माळशिरस येथे जनता दरबारात जाऊन ही व्यथा आ. सातपुते यांच्याकडे मांडल्यानंतर त्यांनी ताबडतोब लक्ष्मणच्या ऑपरेशनची व्यवस्था करून दिली. आनंदाची गोष्ट म्हणजे पुण्यातील नामांकित रुग्णालयात मुत्राशयाचे ऑपरेशन नुकतेच यशस्वीपणे व मोफत पार पडले आहे. आता त्याची प्रकृती उत्तम आहे.माळशिरस विधानसभा मतदार संघांचे आ. सातपुते यांनी आपल्या जनता दरबार च्या माध्यमातून मतदारसंघातील गोरगरीब, सर्वसामान्य जनता यांचे अनेक प्रश्न मार्गी लावले आहेत. अनेक रुग्णांवर मोफत उपचार मिळवून दिले आहेत.आ. सातपुते यांच्या जनता दरबारात जाऊन समस्या सांगणे म्हणजे ती समस्या सुटतेच अशी धारणा मतदार संघातील नागरिकांची झाली आहे.मतदारसंघातील विविध भागातील नागरिक आपल्या विविध प्रकारच्या समस्या घेऊन मदतीसाठी हक्काने जनता दरबारात येत आहेत., ही माझ्यासाठी खूप मोठी गोष्ट आहे. त्यांच्या प्रत्येक समस्येवर तोडगा काढण्यासाठी मी कटिबद्ध आहे.असे आ. सातपुते यांनी आवर्जून सांगितले.
