*सरकारने जनतेच्या फायद्याचे कायदे कचऱ्याच्या टोपलीत टाकले की काय?-संदिपराजे मुटकुळे-पाटील*
प्रतिधीनी-पंढरपूर…जनतेच्या फायद्याचे कायदे वापरायचेच नाहीत अशी शपथ सरकारने मनातल्या मनात घेतली की काय असे सामान्य माणसाला वाटत आहे. दप्तर दिरंगाई कायदा, किमान वेतन कायदा, शिक्षण हक्क कायदा, माहिती अधिकार कायदा, प्रदूषण विरोधी कायदा इत्यादी कायदे सामान्य माणसाला दैनंदिन जीवनात कष्टाची भाकर सुखाने खाता यावी यासाठी निर्माण केले गेले परंतु किमान वेतन कायद्यानुसार एखादा गुन्हा नोंद झाला अशी बातमी कुठेही नाही. दप्तर दिरंगाई कायद्यानुसार एखादा गुन्हा नोंद झाला अशी बातमी कुठेही नाही. याचा अर्थ किमान वेतन कायद्यानुसार साखर कारखाने, पतसंस्था, जिल्हा बँक, सूतगिरण्या इत्यादी ठिकाणी वेतन दिले जात आहे. दप्तर दिरंगाई कायद्यानुसार नव्वद दिवसात सामान्य माणसांची सरकारी कामे केली जात आहेत असा होतो. जनतेच्या सेवेची टिमकी वाजविनाऱ्या या सरकारने कधी किमान वेतन कायद्यानुसार पगार दिला जातो का याची तपासणी तरी केली आहे का ? गोर गरीबांची मुले चार पाच हजारावर राबविली जातात हे माहीत असूनही सरकार मुद्दाम दुर्लक्ष करत आहे. सरकार कोणत्याही पक्षाचे असो, जनतेच्या फायद्याचे कायदे राबविले जात नाहीत. मात्र सरकारच्या फायद्याचे कायदे काटेकोरपणे राबविले जातात. अन्याया विरुध्द लढण्यासाठी घटनेने दिलेला हक्क वापरून निःशस्त्र मोर्चे काढले तर खटले दाखल केले जातात. तसेच जनतेला दडपून ठेवण्यासाठी जमावबंदी, संचारबंदी लागू केली जाते. हे सगळे तत्परतेने होते. जनता हे फार काळ सहन करणार नाही. जेव्हा दारोदारी हे पुढारी मतासाठी फिरतील तेव्हा जनता जाब विचारल्या शिवाय रहाणार नाही.असे शिवस्वराज्य युवा संघटनेचे संस्थापक अध्यक्ष संदिपराजे मुटकुळे-पाटील यांनी म्हटले आहे.
