दिव्यांग व्यक्तींना जयपुर फुट, कृत्रिम हात मिळाल्याने त्यांचा जीवनाकडे बघण्याचा सकारात्मक दृष्टिकोन वाढीस लागला – मा.जयसिंह मोहिते पाटील
अकलूज (वार्ताहर) : रोटरी क्लब अकलूज आणि रत्न निधी चॅरिटेबल ट्रस्ट यांच्या संयुक्त विद्यमाने दिनांक ५ व ६ एप्रिल रोजी ज्या व्यक्तींना जयपुर फूट किंवा कृत्रिम हात बसवता येणे शक्य आहे अशा १७५ जणांचे मोजमाप घेतले गेले होते या साहित्याचे वितरण आज एमटीडीसी हॉल अकलूज शंकरराव मोहिते पाटील सहकारी साखर कारखान्याचे अध्यक्ष मा.श्री. जयसिंह मोहिते पाटील आणि रोटरी डिस्ट्रिक्ट 3132 चे माजी प्रांतपाल मा.श्री. ओमप्रकाश मोतीपवळे यांच्या शुभहस्ते करण्यात आले.याप्रसंगी मार्गदर्शन करताना जयसिंह मोहिते पाटील म्हणाले की,रोटरी इंटरनॅशनल रोटरी क्लब अकलूज ही सातत्याने समाजाभिमुख उपक्रम राबवत असते, रोटरी क्लब ने रत्ननिधी चारिटेबल ट्रस्ट मुंबई या संस्थेच्या माध्यमातून या १७५ दिव्यांग व्यक्तींची जयपूर फूट/कृत्रिम हात/कुबड्या देवून त्यांची जीवन जगण्याची जी जिद्द व चिकाटी आहे, त्यांचा जो स्वावलंबी बाणा आहे तसेच त्यांचा जीवनाकडे पाहण्याचा जो सकारात्मक दृष्टिकोन आहे त्यास अधिक बळ दिले आहे. हे शिबिर घेऊन रोटरी क्लबचे माजी अध्यक्ष नितीन कुदळे व त्यांच्या टीमने या दिव्यांग व्यक्तींची उणीव भरून काढली. रोटरी क्लबचे सामाजिक पातळीवरील आपल्या तालुक्यातच नव्हे तर जगभरात प्रत्येक कार्य हे कौतुकास्पद आहे असे गौरवोद्गार त्यांनी प्रसंगी काढले.रोटरी डिस्ट्रिक्ट ३१३२ चे माजी प्रांतपाल डॉ.ओमप्रकाश मोतीपवळे हे बोलताना म्हणाले की, रोटरी क्लब अकलुज ने गतवर्षात वैद्यकीय, शैक्षणिक, युवावर्ग, शांतता, पर्यावरण, महिला व मुली सक्षमीकरण, जल व्यवस्थापन आदी क्षेत्रात भरीव काम केलेले असून डिस्ट्रिक्ट ३१३२ टीम नेहमी त्यासाठी प्रत्येक क्लबला सहकार्य करण्यासाठी प्रयत्नशील असते. रोटरी क्लबच्या माध्यमातून खऱ्या गरजूंपर्यंत पोहोचून त्यांच्या गरजा दूर व्हाव्यात दूर व्हाव्यात हाच रोटरी क्लब चा मूळ हेतू आहे. रत्न निधी चॅरिटेबल ट्रस्टच्या माध्यमातून बहुतांशी महाराष्ट्र, गुजरात,आंध्र प्रदेश येथील रोटरी क्लब दिव्यांगांच्या ह्या गरजा दूर करण्यासाठी कायम कटिबद्ध आहे असे सांगितले.प्रारंभी प्रास्ताविक करताना माजी अध्यक्ष रो.सीए.नितीन कुदळे यांनी रोटरी क्लब अकलूजच्या कामांचा आढावा घेत, दिव्यांग व्यक्तींना ही वेळ कोणावरही येऊच नये, परंतू दुर्दैवाने दिव्यांग व्यक्तींना अपघाताने किंवा आरोग्याच्या दृष्टीने या समस्यांना सामोरे जावे लागते.परंतु जयपूर फूट/कृत्रिम हात या माध्यमातून त्यांची उणीव भरून निघून त्यांचे दैनंदिन कार्य पाहिले तरी ते सर्वांनाच प्रेरणादायी आहे या उद्देशानेच हे शिबिर आयोजित करण्यामागचा हेतू असल्याने सांगितले.रत्ननिधी चॅरिटेबल ट्रस्टच्या अधिष्ठाता नंदा ठाकूर मॅडम यांनी रोटरी क्लब अकलूजने भविष्यात असे उपक्रम घेतले तर त्यात निश्चितच सहकार्य राहील असे त्यांच्या मनोगतात सांगितले.तर लाभार्थ्यांपैकी शाहूराव कोकाटे यांनी आम्हा सारख्या बहुतांशी आर्थिक दृष्ट्या दुर्बल व्यक्तींना कृत्रिम हात व पाय मोफत बसवून देऊन आमच्या जीवनाला रोटरी क्लब अकलूजने नवी उभारी मिळवून दिली त्याबद्दल ऋण व्यक्त केले.यावेळेस रोटरी क्लब अकलूजचे विद्यमान अध्यक्ष ॲड. दीपक फडे, सचिव केतन बोरावके, रोटरी सदस्य नवनाथ नागणे, बबनराव शेंडगे, पृथ्वीराज भोंगळे, अजित वीर योगेश व्होरा, अमेय व्होरा, कल्पेश पांढरे, रुपेश फुले, आशिष गांधी, स्वप्निल शहा यांचेसह रोटरी क्लबचे जिल्हा संचालक रो. यशवंत हांडे आदी मान्यवर उपस्थित होते.कार्यक्रमाचे सूत्रसंचालन माजी सचिव गजानन जवंजाळ यांनी केले तर आभार विद्यमान अध्यक्ष ॲड. दीपक फडे यांनी मानले.दिव्यांग व्यक्तींना कृत्रिम हात साहित्य बसविण्यासाठी रत्ननिधी चॅरिटेबल ट्रस्टच्या माध्यमातून तज्ञ राजेश माने, मनोज ओमप्रकाश, रामसुजान साकेत, अरमित सिंग यांचे विशेष सहकार्य लाभले तर हे शिबिर यशस्वी होण्यासाठी सतीश कुदळे, गणेश भिताडे यांनी विशेष परिश्रम घेतले.
