एसटी प्रवासातील सवलतीला आता ‘NCMC’चा आधार! ज्येष्ठ नागरिकांसह महिलांना १ सप्टेंबरपासून NCMC कार्ड अनिवार्य; कार्डशिवाय सवलतीचे तिकीट मिळणार नाही
मुंबई : महाराष्ट्र राज्य मार्ग परिवहन महामंडळाच्या (एसटी) सवलतीच्या प्रवासासाठी आता NCMC कार्ड महत्त्वाचे ठरणार आहे.
महामंडळाने दिलेल्या आदेशानुसार १ सप्टेंबर २०२६ पासून ज्येष्ठ नागरिक आणि महिला लाभार्थ्यांना सवलतीचे तिकीट NCMC कार्डच्या माध्यमातूनच वितरित करण्यात येणार आहे.
सवलतीच्या प्रवाशांची प्रक्रिया अधिक सुलभ आणि डिजिटल करण्याच्या उद्देशाने महामंडळाकडून NCMC कार्डची नोंदणी व वितरण सुरू करण्यात आले आहे.
सध्या ज्येष्ठ नागरिक व महिलांच्या कार्ड नोंदणीला प्राधान्य देण्यात आले असून, त्यानंतर इतर सवलतधारक प्रवाशांनाही NCMC कार्ड देण्याची कार्यवाही केली जाणार आहे.
कार्डचे ‘टॉप-अप’ही करता येणार१ सप्टेंबरपासून ज्येष्ठ नागरिक व महिला लाभार्थ्यांना सवलतीचे तिकीट NCMC कार्डमधूनच देण्याच्या सूचना एसटीच्या आगारांना करण्यात आल्या आहेत.
तसेच प्रवाशांच्या सोयीसाठी NCMC कार्डचे Top-up करण्याची सुविधा उपलब्ध करून देण्याचे निर्देशही देण्यात आले आहेत.
चालक-वाहकांना सूचना
या नव्या प्रणालीबाबत सर्व आगार व्यवस्थापकांनी चालक व वाहकांना माहिती देऊन प्रवाशांना आवश्यक सूचना देण्याचे आदेश महामंडळाने दिले आहेत
.नव्या नियमामुळे एसटीचा सवलतीचा प्रवास अधिक डिजिटल आणि कॅशलेस होण्याच्या दिशेने आणखी एक पाऊल पडले आहे.
