MARDचा संप मागे; BHMS CCMP डॉक्टरांकडून मुंबई उच्च न्यायालय व शासनाचे आभारMMC नोंदणी प्रक्रिया कायद्याच्या चौकटीत सुरू राहणार; रुग्णहिताला सर्वोच्च प्राधान्य
पुणे, दि. ६ : महाराष्ट्रातील BHMS CCMP पात्र होमिओपॅथिक डॉक्टरांच्या MMC नोंदणी प्रक्रियेसंदर्भात मुंबई उच्च न्यायालयाने दिलेल्या निर्णयाचे तसेच महाराष्ट्र शासनाने घेतलेल्या सकारात्मक भूमिकेचे CCMP होमिओपॅथिक डॉक्टर्स असोसिएशन, महाराष्ट्र राज्य यांनी स्वागत केले आहे.
न्यायालयाचा निर्णय, शासनाची भूमिका आणि रुग्णहिताच्या दृष्टीने उचललेल्या सकारात्मक पावलांबद्दल असोसिएशनने मनःपूर्वक आभार व्यक्त केले आहेत.मुख्यमंत्री देवेंद्र फडणवीस यांनी BHMS CCMP डॉक्टरांची MMC नोंदणी ही मुंबई उच्च न्यायालयाच्या आदेशानुसार व प्रचलित कायद्याच्या चौकटीत सुरू करण्यात आली असून ती नियमानुसार पुढेही सुरू राहील, असे स्पष्ट केले आहे.
या भूमिकेबद्दलही असोसिएशनने मुख्यमंत्री यांचे आभार मानले आहेत.दरम्यान, महाराष्ट्र असोसिएशन ऑफ रेसिडेंट डॉक्टर्स (MARD) यांनी शासनासोबत झालेल्या चर्चेनंतर सकारात्मक आश्वासन मिळाल्याने आपला संप मागे घेतला आहे.
त्यामुळे राज्यातील आरोग्य सेवा सुरळीत ठेवण्यास मदत होणार असून रुग्णहिताला सर्वोच्च प्राधान्य मिळाल्याचे असोसिएशनने म्हटले आहे.
या संपूर्ण प्रक्रियेत सहकार्य व मार्गदर्शन करणारे उपमुख्यमंत्री एकनाथ शिंदे, उपमुख्यमंत्री सुनेत्रा पवार, वैद्यकीय शिक्षण मंत्री हसन मुश्रीफ, मंत्री चंद्रकांत पाटील, आमदार विक्रम काळे, वैद्यकीय विकास मंचाचे अध्यक्ष राजेश पांडे, कॉलेज फेडरेशनचे पृथ्वीराज पाटील, महाराष्ट्र होमिओपॅथी परिषदेचे प्रशासक डॉ. बाहुबली शाह, माजी अध्यक्षा डॉ. रजनी इंदुलकर, केंद्रीय होमिओपॅथी परिषदेचे माजी उपाध्यक्ष डॉ. अरुण भस्मे, राष्ट्रवादी काँग्रेस पक्ष डॉक्टर्स सेलचे प्रदेशाध्यक्ष डॉ. बाळासाहेब पवार, डॉ. अजय तायडे पाटील, डॉ. सोमनाथ गोसावी, डॉ. संतोष आवचर, डॉ. विजय पवार, डॉ. राजेश रांजणीकर, डॉ. नितीन गावडे, डॉ. सुनील जगताप, डॉ. मनोज राका आणि डॉ. बाळासाहेब हरपले यांचे विशेष आभार असोसिएशनने मानले आहेत.
तसेच महाराष्ट्रातील सर्व होमिओपॅथिक संघटना, आयुष संघटना, कॉलेज फेडरेशन, प्रसारमाध्यमांचे प्रतिनिधी, पत्रकार बंधू-भगिनी, होमिओपॅथीचे हितचिंतक तसेच या लढ्यात प्रत्यक्ष व अप्रत्यक्ष सहकार्य करणाऱ्या सर्व ज्ञात-अज्ञात व्यक्ती आणि संस्थांचेही असोसिएशनने आभार व्यक्त केले आहेत.
हा विजय कोणत्याही एका व्यक्तीचा किंवा संघटनेचा नसून न्याय, कायदा, रुग्णहित आणि महाराष्ट्रातील हजारो पात्र BHMS CCMP डॉक्टरांच्या संयम, एकजूट व संघर्षाचा विजय असल्याची भावना असोसिएशनने व्यक्त केली आहे.
यापुढेही महाराष्ट्रातील जनतेला अधिक जबाबदारीने, प्रामाणिकपणे आणि समर्पित भावनेने आरोग्य सेवा देण्याचा निर्धार BHMS CCMP होमिओपॅथिक डॉक्टरांनी व्यक्त केला आहे, अशी माहिती CCMP होमिओपॅथिक डॉक्टर्स असोसिएशन, महाराष्ट्र राज्याचे प्रदेशाध्यक्ष डॉ. बाळकृष्ण गायकवाड यांनी दिली.
