माळशिरस तालुक्यातून मनोज जरांगे पाटील यांच्या उपोषणाला मोठा पाठिंबा; २३ मे रोजी सर्वपक्षीय बैठकीचे आयोजन
अकलूज (प्रतिनिधी) — मराठा आरक्षण, कुणबी दाखले तसेच मराठा समाजाच्या विविध प्रलंबित मागण्यांसाठी सुरू असलेल्या आंदोलनाला आता पुन्हा एकदा वेग येताना दिसत आहे.
मराठा समाजाचे आंदोलनकर्ते नेते मनोज जरांगे पाटील यांनी दि. ३० मेपासून त्यांच्या अंतरवाली सराटी या गावी पुन्हा प्राणांतिक आमरण उपोषण सुरू करण्याचा इशारा दिल्यानंतर राज्यभरातील मराठा समाजामध्ये मोठी हालचाल सुरू झाली आहे.
या उपोषणाला पाठिंबा देण्यासाठी माळशिरस तालुक्यातूनही हजारोंच्या संख्येने मराठा बांधव सहभागी होणार असून, त्याच्या नियोजनासाठी दि. २३ मे रोजी सर्वपक्षीय बैठकीचे आयोजन करण्यात आले आहे
.सोमवारी अखंड मराठा समाज, माळशिरस तालुक्यातील कार्यकर्ते व पदाधिकाऱ्यांची महत्त्वपूर्ण बैठक पार पडली. या बैठकीमध्ये मराठा समाजाच्या मागण्यांबाबत शासनाची भूमिका, आंदोलनाची पुढील दिशा तसेच उपोषणासाठी होणाऱ्या उपस्थितीचे नियोजन यावर सविस्तर चर्चा करण्यात आली.
बैठकीत बोलताना कार्यकर्त्यांनी सांगितले की, मराठा समाजाच्या न्याय्य मागण्यांसाठी मनोज जरांगे पाटील यांनी यापूर्वी अनेक वेळा आमरण उपोषण केले आहे.
प्रत्येकवेळी समाजाच्या हितासाठी त्यांनी स्वतःच्या प्रकृतीची पर्वा न करता आंदोलन उभारले. त्यामुळे त्यांच्या आरोग्यावर गंभीर परिणाम झाला असून, समाजामध्ये त्यांच्या प्रकृतीबाबत चिंता व्यक्त केली जात आहे.
तसेच, राज्यभरातील लाखो मराठा बांधवांना सोबत घेऊन दोन वेळा मुंबईकडे भव्य मोर्चे काढण्यात आले होते. या आंदोलनांदरम्यान शासनाकडून अनेक आश्वासने देण्यात आली, मात्र प्रत्यक्षात कोणतीही ठोस अंमलबजावणी झाली नसल्याची भावना समाजामध्ये तीव्र झाली आहे.
वारंवार मुदती देऊनही शासनाने केवळ वेळकाढूपणा केला असून मराठा समाजाची फसवणूक झाल्याची भावना कार्यकर्त्यांनी व्यक्त केली.
याच पार्श्वभूमीवर “आर नाही तर पार” अशी आक्रमक भूमिका घेत मनोज जरांगे पाटील यांनी ३० मेपासून पुन्हा आमरण उपोषणाचा निर्णय घेतला आहे.
त्यांच्या या आंदोलनाला राज्यभरातून मोठा पाठिंबा मिळत असून माळशिरस तालुक्यातील मराठा समाजही मोठ्या संख्येने सहभागी होणार असल्याचे बैठकीत स्पष्ट करण्यात आले.
या पार्श्वभूमीवर दि. २३ मे रोजी सायंकाळी ५ वाजता कृष्ण लीला बॅकवेट हॉल, डॉ. धनेश गांधी हॉस्पिटल शेजारी, येथे सर्वपक्षीय मराठा बांधवांची नियोजन बैठक आयोजित करण्यात आली आहे.
या बैठकीस सत्ताधारी व विरोधी पक्षातील विविध नेते, पदाधिकारी, सामाजिक कार्यकर्ते तसेच मराठा समाजातील प्रमुख व्यक्ती उपस्थित राहणार असल्याची माहिती संयोजकांनी दिली
.उपोषणासाठी जाणाऱ्या बांधवांची संख्या, वाहतूक व्यवस्था, संपर्क प्रमुखांची नियुक्ती तसेच आंदोलनाचे नियोजन या विषयांवर बैठकीत चर्चा होणार आहे.
त्यामुळे माळशिरस तालुक्यातील जास्तीत जास्त मराठा बांधवांनी या बैठकीस उपस्थित राहून आंदोलनाला बळ द्यावे, असे आवाहन संयोजकांच्या वतीने करण्यात आले आहे.
#मराठा_आरक्षण#मनोजजरांगेपाटील#अखंडमराठासमाज#माळशिरस#मराठासमाज#कुणबीदाखले#मराठाआंदोलन#अंतरवालीसराटी#मराठायोद्धा#मराठाएकजूट#आरक्षणआमचाहक्क#मराठाक्रांती#सर्वपक्षीयबैठक#मराठाबांधव#जयजिजाऊ#जयशिवराय#MarathaReservation#ManojJarangePatil#MarathaAndolan
