*माळशिरस ,फलटण, खंडाळा,भोर तालुक्यातील अवर्षण प्रवण भागातील ४३०५० हेक्टर क्षेत्र सिंचनाखाली येणार**आ.रणजितसिंह मोहिते-पाटील यांच्या प्रयत्नांना यशःमंत्रिमंडळाच्या बैठकीत निरा देवघर प्रकल्पाच्या तिसऱ्या सुधारीत प्रशासकीय मान्यतेचा निर्णय*
प्रतिनिधी; मंगळवार ३१ जानेवारी २०२३ रोजी मंत्रिमंडळ बैठकीत निरा देवघर प्रकल्पाच्या ३९७६ कोटी ८३ लाख रूपयांच्या तिसरी सुधारित प्रशासकीय मान्यता देण्याचा निर्णय घेण्यात आला.यामुळे माळशिरस, फलटण,खंडाळा,भोर, तालुक्यातील ४३०५० हेक्टर क्षेत्र सिंचनाखाली येणार आहेत.निरा देवघर धरण प्रकल्पाची सुप्रमा शासनाकडे प्रलंबित असून तिला तात्काळ मान्यता देऊन येणाऱ्या या प्रकल्पासाठी निधीची तरतूद करून दुष्काळी भागाला पाणी उपलब्ध करुन द्यावे व प्रकल्पाची उर्वरीत कामे लवकरात लवकर मार्गी लावण्यात यावे म्हणून आ.रणजितसिंह मोहिते-पाटील यांनी उपमुख्यमंत्री देवेंद्र फडणवीस यांच्याकडे पाठपुरावा केला होता.तसेच हिवाळी अधिवेशनात सभागृहात देखील आ.मोहिते-पाटील यांनी मागणी केलेली होती.निरा देवघर धरणाचे काम सन २००८ साली पूर्ण झाले असून खंडाळा तालुक्यापर्यंत ६५ किमी चे कालवे पूर्ण झाले आहेत मात्र उर्वरीत खंडाळा, फलटण व माळशिरस तालुक्यातील कालव्याची कामे अद्याप पर्यंत झालेली नव्हती.मंत्रीमंडळाने दिलेल्या प्रकल्पांच्या तिसऱ्या सुधारीत मान्यते मुळे आ.रणजितसिंह मोहिते-पाटील यांच्या प्रयत्नातून निरा देवघर प्रकल्पांच्या रखडलेल्या कामे मार्गी लागून सातारा जिल्हयातील फलटण १३५५० हेक्टर ,भोर,६६७० हेक्टर ,खंडाळा ११८६० हेक्टर तर सोलापूर जिल्ह्यातील माळशिरस तालुक्यातील अवर्षण प्रवण भागात १०९७० हेक्टर असे एकूण ४३०५० हेक्टर क्षेत्र सिंचनाखाली येणार आहे.अनेक वर्षां पासून रखडलेल्या पाणी प्रश्न आ.मोहिते-पाटील यांनी प्राथमिकता देत सोडवल्याने माळशिरस, फलटण, खंडाळा, भोर तालुक्यातील अवर्षणप्रवण भागातील शेतकऱ्यांनी आ.मोहिते-पाटील यांचे आभार मानले.
