” ना नफा ना तोटा ” तत्वावरील रत्नाई मिठाई केंद्र हा उपक्रम समाजाला फायदेशीर—मा.श्री. जयसिंह मोहिते पाटील
अकलूज (प्रतिनीधी) कला, क्रीडा, सांस्कृतिक, सामाजिक क्षेत्रात उल्लेखनीय कामगिरी करणाऱ्या प्रताप क्रीडा मंडळाने ” ना नफा, ना तोटा ” या तत्त्वावर व उत्कृष्ट गुणवत्तेसह ” रत्नाई मिठाई केंद्र ” हा सामाजिक जबाबदारी घेऊन सुरू केलेला उपक्रम आहे. याचा समाजाला निश्चितच फायदा होईल असे मत प्रताप क्रीडा मंडळाचे संस्थापक मा.श्री. जयसिंह मोहिते पाटील यांनी व्यक्त केले. शंकरनगर येथे प्रताप क्रीडा मंडळाच्या वतीने खास दीपावली निमित्त ” ना नफा, ना तोटा” या तत्त्वावर व उत्कृष्ट गुणवत्ते सह रत्नाई मिठाई वाटप स्टॉल केंद्राचे उद्घाटन मा. श्री जयसिंह मोहिते पाटील यांच्या हस्ते झाले. यावेळी प्रताप क्रीडा मंडळाच्या विद्यमान अध्यक्षा मा. कु स्वरूपा राणी मोहिते पाटील, अकलूज विविध कार्यकारी सोसायटीचे मा.श्री. लक्ष्मणराव आसबे, मंडळाचे उपाध्यक्ष प्रतापराव पाटील, सचिव पोपटराव भोसले पाटील, खजिनदार वसंतराव जाधव, संचालक यशवंतराव माने देशमुख, संग्राम रणनवरे, बिभिशन जाधव, राजेंद्र देवकर, आदी मान्यवर प्रमुख उपस्थित होते. पुढे बोलताना मा. श्री जयसिंह मोहिते पाटील म्हणाले, समाजातील सर्वसामान्यांना आपली दिवाळी साजरी करता यावी यासाठी पूर्वी प्रताप क्रीडा मंडळ इंदिरा मिठाई केंद्र म्हणून सदरचा उपक्रम राबवत होती. आता पुन्हा ” ना नफा ना तोटा ” या तत्त्वावर रत्नाई मिठाई केंद्र हे सामाजिक बांधिलकी म्हणून समाजाच्या सेवेसाठी उपलब्ध झाले आहे.५०-६० वर्षांपूर्वीची परिस्थिती वेगळी होती. त्यावेळी समाजात एकत्र कुटुंब पद्धती होती. त्यामुळे घरात प्रत्येक महिला फराळ मिठाई बनवत होत्या. परंतु सध्या यामध्ये बदल झाला. हम दो हमारे दो, या संस्कृतीमुळे एकट्या महिलांनाच सर्व पदार्थ करावे लागतात. त्यामुळे हा उपक्रम व यातील पदार्थांची उत्कृष्ट गुणवत्ता असल्याने या उपक्रमाचा फायदा महिलांना मोठ्या प्रमाणावर होणार आहे. प्रस्ताविकात उपाध्यक्ष प्रताप पाटील म्हणाले,मा.श्री. जयसिंह मोहिते पाटील यांनी सुरू केलेला प्रताप क्रीडा मंडळाचा लौकिक व वारसा पुढे सुरू ठेवण्याचे कार्य विद्यमान अध्यक्षा मा. कु. स्वरूपाराणी मोहिते पाटील यांनी सुरू ठेवले आहे. सदरच्या मिठाई केंद्रात मागील वर्षी ३७५० किलो पदार्थांची ची विक्री झाली होती. तर यावर्षी आत्तापर्यंत ३२०० किलो पर्यंतची नोंदणी मंडळाकडे झाली आहे. यामध्ये लाडू, शेव, चिवडा, बालुशाही, व शंकरपाळी या पाच पदार्थांचा समावेश आहे. प्रारंभी सहकार महर्षी शंकरराव मोहिते पाटील व स्वर्गीय श्रीमती रत्नप्रभादेवी मोहिते पाटील यांच्या प्रतिमेचे पूजन उपस्थित मान्यवरांच्या हस्ते झाले. तर मिठाई नोंदणी केलेल्यांना या.श्री. जयसिंह मोहिते पाटील यांच्या हस्ते मिठाई किटचे प्राथमिक स्वरूपात वाटपही करण्यात आले .मिठाई तयार करणारे मदन महाराज यांचा सत्कार या.श्री. जयसिंह मोहिते पाटील यांच्या हस्ते करण्यात आला. रत्नाई मिठाई स्टॉल हा दिनांक १९ ते २१ ऑक्टोबर २०२२ सायंकाळ पर्यंत सुरू राहणार असून याचा सर्वांनी लाभ घेण्याचे आवाहनही सचिव पोपटराव भोसले पाटील यांनी केले. सूत्रसंचालन आर आर पाटील यांनी केले .तर आभार खजिनदार वसंतराव जाधव यांनी मानले. चौकट…. प्रताप क्रीडा मंडळाने आधुनिक तंत्रज्ञान उपलब्ध नसतानाही सन १९८२,१९८४, व १९८५ या काळात राष्ट्रीय क्रीडा स्पर्धा, महाराष्ट्राच्या सुवर्ण महोत्सवी वर्षाच्या निमित्त राज्यस्तरीय क्रीडा स्पर्धाचे यशस्वी आयोजन केले होते. त्याच पद्धतीने पुढील वर्षी राष्ट्रीय क्रीडा स्पर्धेचे आयोजन करावे. आत्ताची तरुण पिढी ही मोबाईल, आणि टीव्ही मध्ये व्यस्त असल्याचे चित्र आहे .या विद्यार्थ्यांना मैदानाची आवड निर्माण व्हावी, त्यांना वेगवेगळ्या खेळाची माहिती मिळावी यासाठी प्रताप क्रीडा मंडळाने राष्ट्रीय क्रीडा स्पर्धाचे आयोजन करावे असे मंडळाचे संस्थापक जयसिंह मोहिते पाटील यांनी सांगितले.
