*पशुपालकांनी लम्पी बाबत घाबरून न जाता सजग होणं महत्त्वाचं-धैर्यशील मोहिते पाटील *
अकलूज (प्रतिनिधी )जिल्ह्यात लम्पी आजाराचा शिरकाव झाला आहे. या रोगाने बाधित होणाऱ्या जनावरांची संख्या वाढत आहे. या आजारात गुरांना ताप येतो. दुधाळ जनावरांची क्षमता कमी होते तर जनावरांच्या अंगावर गाठी तयार होतात वैद्यकिय उपचाराने हा रोग पूर्णपणे बरा होतो.सर्व शेतकरी व पशुपालकांनी लम्पी बाबत घाबरून न जाता सजग होणं महत्त्वाचं आहे.सर्व शेतकऱ्यांनी काळजी घ्यावी. असे आवाहन शिवामृत दूध उत्पादक संघ लि.चे चेअरमन धैर्यशील मोहिते पाटील यांनी केले आहे.ते पुढे बोलताना म्हणाले की पशुपालकांनी घाबरून न जाता काळजी घ्यावी.लम्पी हा संसर्गजन्य आजार असल्याने प्रतिबंधात्मक लसीकरण करून घेणे गरजेचे आहे.चिलटे, माश्या, गोचीड आणि डासांद्वारे लम्पी रोगाचा फैलाव होतो त्या मुळे जनावरांच्या गोठ्यांची व्यवस्थित स्वच्छता राखावी.निरोगी जनावरांना बाधित जनावरांपासून वेगळे बांधावे.गायी आणि म्हशींना एकत्रित ठेवू नये.लक्षणे आढळल्यास तातडीने डॉक्टरांशी संपर्क साधून उपचार सुरू करावे.बाधित जनावरांच्या पिण्याच्या पाण्याकरिता आणि तसेच चराईकरिता स्वतंत्र व्यवस्था करावी.बाधित जनावरांचा मृत्यू झाला तर कमीत कमी 8 ते 9 फूट खोल खड्डयात गाडून विल्हेवाट लावावी. लम्पी त्वचा रोग हा संसर्गजन्य रोग असल्याने उपचार करण्यापेक्षा रोग येऊच नये या करिता प्रतिबंधात्मक उपाययोजना व रोग आल्यास त्याचा प्रसार होऊ नये, याकरिता पशुपालकांनी आवश्यक ती काळजी घेण्याची आवश्यकता आहे.
