सुक्ष्म, लघु व मध्यम उद्योगांसाठीच्या विविध योजनांच्या जनजागृतीपर अभियान कार्यक्रम स्मृती भवन, शंकरनगर-अकलूज येथे संपन्न.
अकलूज (प्रतिनिधी) : सुक्ष्म, लघु व मध्यम उद्योगांसाठीच्या एमएसएमई अंतर्गत भारत सरकारच्या विविध योजनांच्या जनजागृतीपर अभियान कार्यक्रम सहकार महर्षि शंकरराव मोहिते पाटील स्मृती भवन शंकरगर अकलूज येथे संपन्न झाला.
कार्यक्रमाचे उदघाटन एमएसएमई महाराष्ट्रचे संचालक पी.एम.पार्लेवार, विधान परिषद सदस्य रणजितसिंह विजयसिंह मोहिते पाटील, सोलापूर जिल्हा संघटन महामंत्री धैर्यशिल राजसिंह मोहिते पाटील, यांच्या शुभहस्ते दीपप्रज्वलन करून झाले.
देशाची अर्थव्यवस्था ही देशातील उद्योगांवर अवलंबून असते. भारत देश सध्या विकसनशील स्थितीत असून देशाच्या GDP मध्ये सर्वात जास्त योगदान देशातील लहान-मोठ्या उद्योगांचे असते.
हे लक्षात घेता भारताचे लोकप्रिय पंतप्रधान नरेंद्र मोदी यांच्या नेतृत्वात भारताची अर्थव्यवस्था अधिक सक्षम बनविण्यासाठी नवीन उद्योगांना चालना मिळावी यासाठी केंद्रीय मंत्री नारायण राणे, राज्याचे उपमुख्यमंत्री देवेंद्र फडणवीस यांच्या मार्गदर्शनपर व आमदार रणजितसिंह मोहिते-पाटील यांच्या सूचनेनुसार एमएसएमई मंत्रालय भारत सरकार व रोटरी क्लब अकलूज व रोटरी क्लब सराटी डिलाईट यांच्या संयुक्त विद्यमाने सुक्ष्म, लघु व मध्यम उद्योगांसाठीच्या विविध योजनांच्या जनजागृतीपर अभियान कार्यक्रम अकलूज येथे घेण्यात आला.
या प्रसंगी प्रमुख व्याख्याते व एमएसएमई चे संचालक पी.एम.पार्लेवार यांनी एमएसएमई च्या विविध योजनांचा लाभ व फायदे कसे घ्यायचे याबाबत मार्गदर्शन करताना या योजने अंतर्गत उद्योगांना सूक्ष्म, लघु आणि मध्यम उद्योग अशा तीन भागात विभाजले गेले आहे, वस्तूंचे उत्पादन, वस्तूंवर प्रक्रिया, त्यांची. साठवण व संरक्षण करणारे छोटे छोटे उद्योगांचा यात समावेश आहे, देशातील लहान, आणि मध्यम उद्योगांना विकसित करण्यासाठी व आवश्यकतेनुसार मदत उपलब्ध करून देण्यासाठी ही योजना कार्य करते. एमएसएमई सरकारी योजनेत नोंदणी केल्याने उद्योगदाराला अनेक फायदे होतात कमी व्याजदराने कर्ज मिळण्यास मदत होते. सरकारी टेंडर्स मिळण्यास मदत होते. सरकारी परवाने, मंजुरी, मिळवणे सोपे होते. प्रत्यक्ष कर कायद्या अंतर्गत सूट मिळते. ISO प्रमाणपत्र खर्चाची भरपाई मिळते. उद्योगांना अनुदान मिळते. MSME अंतर्गत सूक्ष्म, लघु,आणि मध्यम उद्योजकांना प्रोत्साहन देण्याचे काम केले जाते.
असे पार्लेवार यांनी सांगत पुढे बोलताना ते म्हणाले की,
मा.पंतप्रधान नरेंद्र मोदीजी यांच्या मार्गदर्शनपर MSME मंत्रालया मार्फत अनेक योजना राबविण्यात येतात त्या पैकी एक म्हणजे सुक्ष्म, लघु, मध्यम नवीन उद्योग टाकण्यासाठी व उद्योगवाढीसाठी सुलभ रित्या वित्त पुरवठा व्हावा या करीता PMEGP योजना MSME मंत्रालयातर्फे चालवली जाते.
तसेच MSME योजनेचा ज्या उद्योजकांना लाभ मिळण्यास अडचणी येत आहेत त्या तक्रार निवारणार्थ Champion नावाचे पोर्टल चालू केले आहे जेणेकरुन तक्रार निवारण होऊन सर्वसामान्य उद्योजकांना योजनाचा लाभ मिळेल.
अशी माहिती पार्लेवार यांनी दिली.
याप्रसंगी रणजितसिंह मोहिते पाटील बोलताना या कार्यक्रमाचे सहसंयोजक रोटरी क्लब अकलूज आणि रोटरी क्लब सराटी लाईट यांनी हा कार्यक्रम आयोजित केल्याबद्दल त्यांचे विशेष कौतुक करत
सूक्ष्म लघु व मध्यम स्वरूपाचे उद्योगधंदे सध्या जे चालवत आहेत तथा जे नवागत उद्योजक होऊ पाहतात त्यांच्यासाठी हा अभियान कार्यक्रम म्हणजे एक नवी पर्वणीच आहे असे सांगत आपल्या भागात उत्पादित होणाऱ्या पिकांस, फळबागांस अनुसरून फूड प्रोसेसिंग उद्योगासाठी देखील मोठी संधी असल्याचे रणजीतसिंह मोहिते पाटील यांनी सांगितले.
याप्रसंगी धैर्यशील मोहिते पाटील यांनी आपल्या ग्रामीण भागातील तरुणाईने उद्योग क्षेत्रात पदार्पण केले पाहीजे उद्योजक बनले पाहीजे. लहान, आणि मध्यम उद्योगांना विकसित करण्यासाठी व आवश्यकतेनुसार मदत उपलब्ध करून देण्यासाठी ही योजना कार्य करते आहे असे सांगत व या योजनेबद्दल वरील प्रमाणे अत्यंत सविस्तरपणे माहिती देऊन त्याचा आपण लाभ घेतला पाहीजे असे आवाहन धैर्यशील मोहिते पाटील यांनी केले.
यावेळी या कार्यक्रमाचे सहसंयोजक रोटरी क्लब अकलूज चे अध्यक्ष ॲड.दिपक फडे, सचिव केतन बोरावके, रोटरी क्लब सराटी डीलाईट चे संस्थापक नितीन दोशी, अध्यक्षा सौ. स्वाती चंकेश्वरा, सचिव जगदीश कदम यांचे सह दोन्ही क्लबचे पदाधिकारी, जिल्ह्यातून आलेले उद्योजक बहुसंख्येने उपस्थित होते.
