पालखी मार्गावरील जनतेच्या अडचणी दूर करा : आ मोहिते पाटील
अकलूज / प्रतिनिधी – माळशिरस तालुक्यातून जाणा-या संत ज्ञानेश्वर व संत तुकाराम महाराज यांचे पालखी मार्गावरील जनतेच्या अडचणी तातडीने सोडवा अशा सूचना आ रणजितसिंह मोहिते पाटील यांनी अधिकाऱ्यांना दिल्या . पालखी मार्गात गेलेल्या जमिनी , जागा , इमारती , झाडे यांच्या नुकसान भरपाई वाटपाची प्रक्रिया ही अत्यंत पारदर्शक पध्दतीने पार पाडली गेली असली तरी संत ज्ञानेश्वर व संत तुकाराम महाराज पालखी महामार्गाबद्दल अनेक शेतकरी व नागरीकांच्या तक्रारी होत्या . या तक्रारी निवारण करण्यासाठी आ मोहिते पाटील यांनी अधिकारी व पदाधिकारी यांची बैठक शिवरत्न बंगल्यावर आयोजित केली होती . या बैठकीस आ राम सातपुते , प्रांताधिकारी ज्योती कदम , तहसीलदार जगदीश निंबाळकर , तालुका भूमिलेखा अधिकारी प्रिया पाटील , कार्यकारी अभियंता निरंजन तेलंग , राष्ट्रीय महामार्गाचे प्रकल्प संचालक इंद्रकुमार नारायणकर , उप अभियंता एल डी डाके , शिवामृतचे चेअरमन धैर्यशील मोहिते पाटील , माजी उपसभापती अर्जुनसिंह मोहिते पाटील , प्रताप पाटील , माजी सरपंच शिवतेजसिंह मोहिते पाटील , कारखान्याचे व्हा . चेअरमन ॲड प्रकाश पाटील , माजी सभापती रावसाहेब पराडे , ओंकार माने देशमुख , शंकर काकुळे , महादेव ताटे , डॉ उदय माने देशमुख , भैय्यासाहेब इनामदार , दीपक राउत , नितीनराजे निंबाळकर , विजयकुमार देशमुख , मधुकर जाधव यांच्यासह पालखी मार्गावर बाधित झालेले शेतकरी , नागरिक मोठ्या संख्येने उपस्थित होते . आ मोहिते पाटील म्हणाले , पालखी मार्गावरील शेतकऱ्यांच्या अनेक तक्रारी आहेत . या तक्रारीची सुनावणी घेवून निर्णय घेतला पाहिजे . संबंधित अधिकाऱ्यांनी तक्रारदाराची दखल घेतली पाहिजे . पालखी मार्गात रस्त्यालगतची अनेक लोकांची घरे गेली आहेत . त्या लोकांना नवीन जागा उपलब्ध करुन द्यावी असे आ मोहिते पाटील यांनी सांगितले . संत ज्ञानेश्वर महाराज पालखी मार्गासाठी पिसेवाडी , वेळापूर येथे भूसंपादन करण्यात आले आहे . हे भूसंपादन करताना १९७१ पुर्वीच्या पालखी मार्गाचा नकाशा ग्राह्य धरण्यात आला आहे . परंतु १९७२ च्या दुष्काळात सार्वजनिक बांधकाम विभागाने नवीन महाड – पंढरपूर हा राज्यमार्ग तयार केला . या मार्गात असंख्य शेतकऱ्यांच्या जमिनी गेल्या . या जमिनी ७ / १२ उताऱ्यावरुन कमी करण्यात न आल्याने व या रस्त्याची नोंद सार्वजनिक बांधकाम खात्याकडे नसल्याने सध्या संत ज्ञानेश्वर महाराज पालखी महामार्ग ९६५ करीता आरक्षित केलेल्या जमिनीत मोठी तफावत दिसत आहे . या शेतकऱ्यांच्या अडचणी दूर करण्यासाठी अधिकाऱ्यांनी त्यांचे म्हणने व्यवस्थित ऐकून घ्यावे व त्यांना न्याय मिळवून द्यावा असेही आ मोहिते पाटील यांनी सांगितले . पालखी मार्गामुळे बोंडले गांवच उध्वस्त झाले आहे . त्या भागातील लोकांची घरे , मोठ्या इमारती , ग्रामपंचायत कार्यालय , शाळागृह , स्मशानभूमी , लहानमोठी दुकाने आदी जमिनदोस्त झाले आहे . या गावाला गावठाण शिल्लक राहिले नाही . आता पुन्हा नवीन जागेवर आरक्षण टाकले जाणार असल्याचे समजते . असे झाले तर गाव स्थलांतरित करावे लागेल अशी भिती सरपंच विजयकुमार देशमुख यांनी व्यक्त केली . प्रांताधिकारी ज्योती कदम म्हणाल्या , संत ज्ञानेश्वर महाराज व संत तुकाराम महाराज पालखी महामार्गात गेलेल्या जागा , जमिनी ,खाजगी , शासकीय इमारती , झाडे याबाबतची सर्व माहिती प्रकल्प संचालकांकडून आमच्याकडे येते . त्यानुसार आम्ही रकमेचे वाटप करतो . प्रकल्प संचालकांनी व राष्ट्रीय महामार्गांच्या मुंबई कार्यालयाने निवाडा मंजूर केल्यानंतर त्यातील जमिनीचे , इमारतीचे , झाडांचे मुल्यांकन बदलण्याचे वा वाढविण्याचे कोणतेही अधिकार या कार्यालयाला नाहीत . त्यासाठी सक्षम लवादाकडे दाद मागावी लागते . ज्या शेतकऱ्यांना , नागरीकांना निवाडा मंजूर नाही त्यांनी लवादाकडे दाद मागावी असे कदम म्हणाल्या .
