सोलापूर/ प्रतिनिधी: भैय्या खिलारे- मनात धरून ठेवलेले विचार काव्यमय शब्दरूपात ज्वलंत पणे कागदावर उतरतात.आजुबाजूचे वातावरण,परिस्थिती,जग,घटना,गोष्टी या मानवी मनाला कशा आकर्षित करतात याचे काव्य या पुस्तकात दाखवले गेले आहे.यशस्वी,अयशस्वी,निसर्ग,प्रेम,विरह,मातृत्व,स्त्री तसेच ‘देवा कसा विश्वास ठेवू मी तुझ्यावर’ अशा एक ना अनेक कविता ‘कुंपणवेल’ या पुस्तकाचा विषय होतात.बदललेल्या जीवनशैलीत ‘जगायचंच राहून गेले’ ही खंत इथे कविता व्यक्त करते.एकूण ९४ कवितांचे हे पुस्तक एक एक मानवी जीवनावर प्रकाश टाकते.कवितांच्या माध्यमातून जीवनाचं सार प्रभावीपणे मांडण्यात आलं आहे.भावनिक,आगतिक तर कधी बेधडक अशी वेगवेगळी ही कविता बोलत जाते.स्त्री विषयावर निर्भीडपणे पुस्तकाच्या माध्यमातून गोष्टी मांडण्याचा हा प्रयत्न केलेला आहे.प्रसंग परिस्थिती कसे निर्णय घ्यायला भाग पाडते त्यानंतर आपले आयुष्य कसे घडते-बिघडते यांचे शब्द रूप काव्य आपल्याला हळवे करून जाते.पुस्तकाच्या शेवटी कवयित्री वैशाली खांडेकर-गळवे या”मी अखंड काळ माझा कागदावर मांडते”मी लेखणीलाच माझ्या अवजार मानते’असा शेवट करतात.
