जिल्ह्यातील रस्ते , वीज , पाणी , शेती , पशुधन व शाळा दुरुस्तीसाठी शासनाने निधी द्यावा : आ मोहिते पाटील अकलूज / प्रतिनिधी – सोलापूर जिल्ह्यातील रस्ते , वीज , पाणी , शेती , पशुधन व शाळा दुरुस्तीसाठी शासनाने निधी उपलब्ध करुन द्यावा अशी मागणी आ रणजितसिंह मोहिते पाटील यांनी विधानपरिषदेत केली . मुंबईत पावसाळी अधिवेशनात आ मोहिते पाटील यांनी सोलापूर जिल्ह्यातील विविध प्रश्न मांडले . आ मोहिते पाटील म्हणाले , सोलापूर जिल्ह्यात राज्य व राष्ट्रीय रस्ते महामार्गच्या माध्यमातून विविध रस्त्यांची कामे सुरु आहेत . परंतु ही कामे करीत असताना शेतकऱ्यांच्या शेतजमीन मोजणीचा प्रश्न येतो . भूमीअभिलेख कार्यालयाकडे जमीन मोजणी करुन देणाऱ्या मोजणीदारांची संख्या कमी असल्याने अती तातडीची जमीन मोजणीची रक्कम भरुनही शेतकऱ्यांना त्यांच्या जमीनीची मोजणी करुन मिळत नाही . त्यामुळे रस्ते विकासासाठी हजारो कोटींचा निधी येवूनही केवळ शेतजमीन मोजणी न झाल्याने शेतकऱ्यांना नुकसान भरपाई मिळत नाही व रस्त्यांची कामे खोळंबली आहेत . ही कामे तातडीने पूर्ण करण्यासाठी शासनाने भुमिअभिलेखांची तातडीने भरती करावी अशी मागणी त्यांनी केली . आ मोहिते पाटील म्हणाले , जिल्ह्यात वनविभागाने अनेक ठिकाणी जमीनीवर हक्क सांगितल्याने रस्त्याची कामे थांबली आहेत . पुर्वी तेथे रस्ता होता . परंतु वनविभागाने वृक्षारोपण करुन त्या रस्त्यावर आपला हक्क सांगितला आहे . याकामी शासनाने लक्ष घालावे असेही आ मोहिते पाटील यांनी सांगितले . राज्यात पूर व अतिवृष्टीमुळे शेतकऱ्यांचे सुमारे साडेपंधरा लाख हेक्टर क्षेत्राचे नुकसान झाले आहे . सोलापूर जिल्ह्यातील बार्शी , करमाळा , उत्तर सोलापूर , दक्षिण सोलापूर , अक्कलकोट आदी तालुक्यात पूर , अतिवृष्टीमुळे शेतकऱ्यांचे प्रचंड नुकसान झाले आहे . परंतु शासनाच्या यादीत सोलापूर जिल्हा वगळला आहे . त्याचा समावेश करावा व शेतकऱ्यांना नुकसान भरपाई द्यावी . सोलापूर शहरात २३ एकर जागेवर महात्मा गांधी प्राणी संग्रहालय उभा आहे . गेल्या तीन वर्षापासून हे प्राणी संग्रहालय बंद आहे . केंद्रीय कमिटीने या संग्रहालयाला भेट देवून त्रुटी दुर करण्यासंदर्भात सुचना केल्या आहेत. शासनाने काही मुलभूत सुविधा उपलब्ध करुन दिल्यास पर्यटनाच्या दृष्टीने ते फायदेशीर होइल . सध्या सोलापूर जिल्ह्यात केळीचे क्षेत्र मोठ्या प्रमाणात वाढत आहे . उजनी बॅकवॉटरमुळे एकट्या करमाळा तालुक्यात दहा हजार हेक्टर क्षेत्रावर केळीची लागवड करण्यात आली आहे . येथे राज्य व केंद्र शासनाच्या माध्यमातून राष्ट्रीय केळी संशोधन उपकेंद्र सुरु करावे अशी मागणी आ मोहिते पाटील यांनी केली . राज्यात ३ कोटी ६१ लाख पशुधन आहे तर केवळ ४ हजार ८४० पशुवैद्यकीय दवाखाने तर ३४ कृत्रिम रेतन केंद्रे आहेत .५ हजार पशुधनामागे एक डाॅक्टर असे आणखी सहा हजार पशुवैद्यकीय अधिकाऱ्यांची शासनाने नेमणूक करावी . सोलापूर जिल्ह्यासाठी स्वतंत्र विद्यापीठ आहे . परंतु या विद्यापीठाच्या कार्यालयीन इमारतीसाठी निधी नाही . शासनाने १२ कोटीचा निधी तत्काळ उपलब्ध करुन द्यावा .सोलापूर जिल्ह्यात जिल्हा परिषदेच्या २ हजार ९६७ शाळा आहेत तर सुमारे २ लाख ३ हजार विद्यार्थी शिक्षण घेत आहेत . यापैकी ५०४ शाळांमधील १२०० वर्गखोल्या नादुरुस्त आहेत त्याचे स्ट्रक्चरल ऑडीट झाले आहे. त्यासाठी ६० कोटीचा निधी द्यावा . राज्यात मुख्यमंत्री ग्रामसडक योजने अंतर्गत शासनाने १० हजार किलोमीटर रस्ते बांधण्याचे उद्दिष्ट ठरविले आहे . सोलापूर जिल्ह्यात ५०० किलोमीटर रस्त्यासाठी ३७५ कोटी रुपयांची गरज असून ती शासनाने उपलब्ध करुन द्यावी . उजनी धरणाच्या लाभ क्षेत्रात सोलापूर व पुणे जिल्हा येतो .सोलापुर जिल्ह्यातील ३६१ गावातील ३० पाणी पुरवठा योजना उजनीवर अवलंबून आहेत त्यापैकी २० पाणीपुरवठा योजना वीज बिल न भरल्याने बंद आहेत. एका पाणी पुरवठा योजनेवर एका पेक्षा अधिक गावांचा समावेश आहे . बील कुणी भरावे यासाठी या योजना बंद आहेत . शासनाने यात पुढाकार घ्यावा व वीज बिलाचा प्रश्न निकाली काढुन या पाणीपुरवठा योजनांचे पुनरज्जीवन करावे अशी मागणीही आ मोहिते पाटील यांनी केली .
