*पंढरपूर मंदिर समितीकडून महापूजेला मुख्यमंत्री एकनाथ शिंदे यांना आमंत्रण*
ठाणे: आषाढी एकादशीला पंढरपूरच्या विठ्ठल -रुक्मिणीची शासकीय महापूजा मुख्यमंत्र्याच्या हस्ते करण्यात येत असते. या पार्श्वभूमीवरच राज्याचे नवनिर्वाचित मुख्यमंत्री एकनाथ शिंदे यांना पंढरपूर मंदिर समिताच्यावतीने आमंत्रण देण्यात आले आहे. पंढरपूर मंदिर समितीच्यावतीने मुख्यमंत्री एकनाथ शिंदे यांना त्यांच्या ठाण्यातील निवासस्थानी भेट घेऊन आमंत्रण देण्यात आले आहे. त्यामुळे यावर्षी आषाढी एकादशीला विठ्ठल-रुक्मिणीची शासकीय महापूजा मुख्यमंत्री एकनाथ शिंदे यांच्या हस्ते होणार आहे. गेल्या काही दिवसांपासून राज्यात राजकीय घडामोडी वेगाने घडल्या आहेत. महाविकास आघाडी सरकार कोसळलं. त्यांनतर राज्यात शिंदे-फडणवीस सरकार आलं. मध्यंतरीच्या काळात सोसल मीडियावर चर्चा सुरू होती की, यावर्षी आषाढी एकादशीला विठ्ठल – रुक्मिणीची महापूजा नेमकं कोणाच्या हस्ते होईल. मात्र आता या चर्चेला पूर्ण विराम मिळाला आहे.दरम्यान, दरवर्षी आषाढी एकादशीला पंढरपूरमध्ये लाखो वारकरी येत असतात. मात्र गेल्या दोन वर्षांत कोरोनामुळे हा सोहळा छोट्या पद्धतीत पार पडला होता. तर यंदा लाखो वारकारी आषाढी एकादशीनिमित्त विठ्ठल – रुक्मिणीच्या दर्शनाला येणार आहेत.
