सरस्वती पूजनाने सेवा संकल्प कार्यक्रमाचा शुभारंभ! माळीनगर येथे अंगणवाडी सेविका, मदतनीस व आरोग्य कर्मचाऱ्यांचा सन्मान; पौष्टिक आहार व रांगोळी स्पर्धेला उत्स्फूर्त प्रतिसाद
अकलूज (प्रतिनिधी) : एकात्मिक बाल विकास सेवा योजनेंतर्गत प्रकल्प अकलूज विभागातील माळीनगर-२ व माळीनगर-३ यांच्या संयुक्त विद्यमाने अंगणवाडी किल्ला, शाळा क्रमांक १ येथे सेवा संकल्प कार्यक्रम, सेविका सन्मान सोहळा आणि रांगोळी स्पर्धेचे आयोजन करण्यात आले होते.
सरस्वती पूजनाने कार्यक्रमाचा शुभारंभ करण्यात आला. हा कार्यक्रम उत्साहपूर्ण वातावरणात पार पडला.
या कार्यक्रमाला प्रकल्प अधिकारी तथा बाल विकास प्रकल्प अधिकारी (सीडीपीओ) बालाजी अल्लडवाड, पर्यवेक्षिका आर. के. कदम, आरोग्य कर्मचारी आर. एस. वारे सिस्टर, एमपीडब्ल्यू कर्मचारी, आशा वर्कर सुपरवायझर यांच्यासह अंगणवाडी सेविका व मदतनीस उपस्थित होते.
कार्यक्रमात अंगणवाडी सेविकांनी विविध पौष्टिक पूरक पोषण आहाराचे पदार्थ तसेच उपवासासाठीच्या नावीन्यपूर्ण रेसिपी तयार करून सादर केल्या.
या उपक्रमातून पौष्टिक आहाराचे महत्त्व अधोरेखित करण्यात आले. यासोबतच आयोजित करण्यात आलेल्या रांगोळी स्पर्धेतही सेविकांनी उत्स्फूर्त सहभाग नोंदवला.
सेविका व आरोग्य कर्मचाऱ्यांचा गौरवअंगणवाडी सेविका व मदतनीस यांच्यासह एएनएम, आशा वर्कर आणि एमपीडब्ल्यू आरोग्य कर्मचाऱ्यांच्या कार्याचा गौरव करण्यासाठी सन्मान सोहळ्याचे आयोजन करण्यात आले होते.
यावेळी सर्वांचा गुलाबपुष्प देऊन सन्मान करण्यात आला. महिला व बालकांच्या आरोग्य, पोषण आणि विकासासाठी अंगणवाडी सेविका व आरोग्य कर्मचारी महत्त्वपूर्ण योगदान देत असतात. त्यांच्या कार्याला प्रोत्साहन देणे आणि त्यांच्यातील कौशल्यांना व्यासपीठ उपलब्ध करून देणे, हा या उपक्रमाचा महत्त्वपूर्ण उद्देश ठरला.
या कार्यक्रमाचे सूत्रसंचालन जयश्री मिसाळ यांनी केले. कार्यक्रम यशस्वी करण्यासाठी सर्व अंगणवाडी सेविका व मदतनीस यांनी विशेष परिश्रम घेतले. सर्वांच्या सहकार्यामुळे सेवा संकल्प कार्यक्रम व सेविका सन्मान सोहळा उत्साहात पार पडला.
