माळशिरस तालुक्यात महाविकास आघाडीचे वर्चस्व. जनशक्तीसमोर धनशक्ती पराभूत – खा.धैर्यशील मोहिते-पाटील
अकलूज (प्रतिनिधी)
माळशिरस तालुक्यातील जिल्हा परिषद व पंचायत समिती निवडणूक ही जनशक्ती विरुद्ध धनशक्ती अशीच ठरली असून या लढतीत जनतेचा विजय झाला आहे, असे प्रतिपादन खासदार धैर्यशील मोहिते-पाटील यांनी केले.
९ फेब्रुवारी रोजी जाहीर झालेल्या निकालानुसार भाजपाला जिल्हा परिषद गटात २ व पंचायत समितीत ६ जागा मिळाल्या. तर राष्ट्रवादी काँग्रेस (शरद पवार गट), आरपीआय, शिवसेना (शिंदे गट), शिवसेना (ठाकरे गट) व राष्ट्रवादी काँग्रेस (अजित पवार गट) यांच्या महाआघाडीला जिल्हा परिषदेत ७ व पंचायत समितीत १२ जागा मिळाल्या.
या निकालाने पंचायत समितीवर महाआघाडीचे स्पष्ट वर्चस्व सिद्ध झाले आहे.
*खा. मोहिते-पाटील म्हणाले की,*
राज्याचे माजी उपमुख्यमंत्री विजयसिंह मोहिते-पाटील, ज्येष्ठ नेते जयसिंह मोहिते-पाटील व आमदार उत्तम जानकर यांच्या मार्गदर्शनाखाली नवनिर्वाचित सदस्य तालुक्याच्या विकासासाठी भरीव काम करतील.
यावेळी नवनिर्वाचित सदस्य *अर्जुनसिंह मोहिते-पाटील म्हणाले*
“विजयदादा, बाळदादा, खासदार धैर्यशील मोहिते-पाटील व आमदार उत्तम जानकर यांच्या विश्वासाला पात्र ठरत हा विजय मिळाला आहे. पंचायत समितीमार्फत जनतेची सर्व कामे पूर्ण ताकदीने केली जातील. विकासासाठी आवश्यक निधी निश्चितपणे आणला जाईल.”
*शिवरत्न’वर विजयाचा गुलाल*
निकालाचे चित्र स्पष्ट होताच नवनिर्वाचित सदस्यांनी अकलूज येथील ‘शिवरत्न’ बंगल्यावर धाव घेतली.
यावेळी राज्याचे माजी उपमुख्यमंत्री विजयसिंह मोहिते-पाटील, खासदार धैर्यशील मोहिते-पाटील, मदनसिंह मोहिते-पाटील, शितलदेवी मोहिते-पाटील आणि स्वरूपाराणी मोहिते-पाटील यांच्या हस्ते विजयी उमेदवारांचे औक्षण करून सत्कार करण्यात आला.
परिसरात कार्यकर्त्यांनी फटाक्यांची आतिषबाजी आणि गुलालाची उधळण करत “विजयदादा मोहिते-पाटील यांचा विजय असो” अशा घोषणांनी परिसर दणाणून सोडला होता.
आगामी काळात ज्येष्ठ नेत्यांच्या मार्गदर्शनाखाली नवनिर्वाचित सदस्य तालुक्याच्या विकासाला गती देतील, असा विश्वास यावेळी व्यक्त करण्यात आला.
