लवंग गणात ‘तुतारी’चा झंझावात; खासदार धैर्यशील मोहिते-पाटील व शिवतेजसिंह मोहिते-पाटलांच्या सभांनी प्रचारात चैतन्य
अकलूज(प्रतिनिधी):लवंग पंचायत समिती गणाच्या निवडणुकीत राष्ट्रवादी काँग्रेस (शरदचंद्र पवार) पक्षाच्या उमेदवार कोमलताई निशांत पाटील यांच्या प्रचारासाठी माढा लोकसभेचे खासदार धैर्यशील मोहिते-पाटील आणि अकलूज नगरपरिषदेचे उपनगराध्यक्ष शिवतेजसिंह मोहिते-पाटील यांच्या जाहीर सभांनी लवंग गणात राजकीय वातावरण पूर्णपणे ढवळून काढले आहे.
या दिग्गज नेत्यांच्या उपस्थितीमुळे कोमलताई पाटील यांनी प्रचारात मोठी आघाडी घेतली असून गणातील सातही गावांमध्ये ‘तुतारी’चा जयघोष पाहायला मिळत आहे.
नेत्यांच्या तोफ धडाडल्या
खासदार धैर्यशील मोहिते-पाटील यांनी आपल्या भाषणातून सत्ताधाऱ्यांच्या धोरणांवर टीका करत, लवंग गणाच्या सर्वांगीण विकासासाठी कोमलताई पाटील यांना मोठ्या मताधिक्याने निवडून देण्याचे आवाहन केले.
तसेच शिवतेजसिंह मोहिते-पाटील यांनी स्थानिक विकासाचे मुद्दे मांडत तरुणांच्या फौजेला निवडणुकीच्या कामात झोकून देण्याचे आदेश दिले. या सभांना लाभलेली प्रचंड गर्दी कोमलताईंच्या विजयाचे संकेत मानले जात आहेत.
सात गावांमध्ये उत्स्फूर्त प्रतिसादगणातील सातही गावांमध्ये नागरिकांनी कोमलताई पाटील यांचे जंगी स्वागत केले आहे.
ठिकठिकाणी होणाऱ्या कोपरा सभा आणि प्रचार रॅलींना मिळणारा प्रतिसाद पाहता, जनमत ‘तुतारी वाजवणारा माणूस’ या चिन्हाकडे वळल्याचे स्पष्ट होत आहे.
“जनतेचा कौल विजयाचा गुलाल उधळणार”
यावेळी बोलताना कोमलताई पाटील म्हणाल्या की:माजी उपमुख्यमंत्री विजयसिंह मोहिते पाटील,”खासदार धैर्यशील भैय्या मोहिते पाटील आणि शिवतेजसिंह मोहिते पाटील यांच्या मार्गदर्शनाखाली आम्ही जनसामान्यांपर्यंत पोहोचत आहोत.
गणातील सातही गावांच्या विकासाचा शब्द आम्ही दिला असून, मतदारांचा उत्साह पाहता विजयाचा गुलाल आम्हीच उधळणार याची आम्हाला १०० टक्के खात्री आहे.
“राजकीय समीकरणे बदलली
मोहिते-पाटील कुटुंबातील या दोन्ही युवा नेत्यांनी प्रत्यक्ष मैदानात उतरून प्रचार केल्यामुळे विरोधकांचे धाबे दणाणले आहेत. कोमलताई पाटील यांनी घेतलेली ही जबरदस्त आघाडी आता निकालाच्या दिवशी काय करिष्मा करते,
याकडे सर्वांचे लक्ष लागले आहे.
