वैशाली भोसले यांनी ज्योती माने-पाटील यांना दाखवले ‘आस्मान’
अकलूज | प्रतिनिधी
अकलूज नगरपालिका निवडणुकीतील प्रभाग क्रमांक १ मध्ये झालेल्या अटीतटीच्या लढतीत राष्ट्रवादी काँग्रेस (शरदचंद्र पवार) पक्षाच्या उमेदवार वैशाली धनाजी भोसले यांनी भाजपच्या उमेदवार ज्योतीदेवी माने-पाटील यांचा पराभव करत दणदणीत विजय मिळवला आहे.
या निकालामुळे सर्वसामान्य घरातून पुढे आलेल्या कार्यकर्त्याने भाजपच्या पक्षाच्या तुल्यबळ उमेदवाराला ‘आस्मान दाखवले’ अशी चर्चा राजकीय वर्तुळात होत आहे.विशेष बाब म्हणजे, मागील ग्रामपंचायत निवडणुकीत ज्योतीदेवी माने-पाटील या विजयी ठरल्या होत्या. त्यामुळे या निवडणुकीत त्यांना प्रबळ उमेदवार मानले जात होते.
मात्र, राष्ट्रवादी काँग्रेस (शरदचंद्र पवार) पक्षाने सर्वसामान्य पार्श्वभूमीतील, कार्यकर्तृत्वातून उभ्या राहिलेल्या वैशाली धनाजी भोसले यांना उमेदवारी दिली. भोसले यांनी प्रचारादरम्यान प्रभागातील नागरिकांशी थेट संवाद साधत, स्थानिक प्रश्न, मूलभूत सुविधा, पाणीपुरवठा, स्वच्छता आणि नागरी समस्यांवर भर दिला. त्यांच्या सातत्यपूर्ण संपर्कामुळे आणि संघर्षशील नेतृत्वामुळे मतदारांचा विश्वास संपादन करण्यात त्यांना यश आले.
या विजयामुळे सर्वसामान्य कार्यकर्त्यांच्या ताकदीवर मिळालेला हा विजय म्हणून याकडे पाहिले जात आहे. राष्ट्रवादी काँग्रेस (शरदचंद्र पवार) पक्षाच्या कार्यकर्त्यांमध्ये या निकालामुळे उत्साहाचे वातावरण निर्माण झाले आहे.
