मराठा वनवास यात्रेच्या आंदोलनकर्त्यावर चिखलात झोपण्याची दुर्दैवी वेळ
.मुंबई (प्रतिनिधी )मराठा समाजाला 50%च्या आत ओबीसी मधून आरक्षण मिळावे. या मागणीसाठी 6मे रोजी तुळजापूर येथून सुरु झालेली मराठा वनवास यात्रा तब्बल 500किलोमीटर भर उन्हात 43डिग्री तापमान असताना पायी प्रवास करीत 6जून रोजी मुंबई येथे पोहचली.सध्या आझाद मैदान येथे भर पावसात उपोषण सुरु आहे. तब्बल 70दिवस झाले तरी या आंदोलनाची दखल राज्यकर्त्यांनी घेतली नाही. उलट आंदोलन कर्त्यांची मुस्कटदाबी सुरु आहे. येथून हुसकून लावण्याचा केविलवाणा प्रयत्न होत आहे.
या पार्श्वभूमीवर या यात्रेचे आयोजक योगेश केदार यांनी बोलताना सांगितले की,हे सरकार म्हणजे शिंदेशाही नव्हे मुघल शाही.मराठा वनवास यात्रेच्या सर्व मावळ्यांचे अंथरूण पांघरूण पोलिसांनी ताब्यात घेतले. अक्षरशः आम्हाला कैद करण्यात आले आहे. आमच्याकडे झोपायला, अंथरण्यासाठी पांघरण्यासाठी कपडे नसल्यामुळे आम्ही चिखलात झोपत आहोत. महाराष्ट्रातील राजकारणा मध्ये जो चिखल निर्माण केला गेला आहे. त्याची प्रचिती तमाम मराठ्यांना देखील आली. येत्या 17 जुलै रोजी हजारो मराठे मुंबई मध्ये येणार. अशी कुणकुण सरकार ला लागली असल्याने त्यांनी आम्हाला त्रास द्यायला सुरुवात केली आहे. आमचे तोंड दाबण्याचा हिणकस प्रकार एकनाथ शिंदे अन् देवेंद्र फडणवीस सरकारने सुरू केला आहे.
परंतु,येणाऱ्या काळात गरीब मराठा समाज या सरकार चा हिसाब- किताब पूर्ण केल्याशिवाय शांत बसणार नाही. मराठ्यांना ओबीसी मधूनच आरक्षण मिळवल्या शिवाय आम्ही थांबणार नाही. असे मराठा वनवास यात्राचे आयोजक योगेश केदार यांनी ठणकावून सांगितले.
