*दशसूत्रीच्या माध्यमातून उद्याची सक्षम व संस्कारसंपन्न पिढी घडवूया :दिलीप स्वामी*
संग्रामनगर दि.२९ (केदार लोहकरे याजकडून)अभ्यासक्रमाच्या चाकोरीबाहेर जाऊन आधुनिक ज्ञानाने संपन्न विद्यार्थी घडवण्यासाठी दशसूत्रीची प्रभावी अंमलबजावणी करावी असे आवाहन सोलापूर जिल्हा परिषदेचे मुख्य कार्यकारी अधिकारी दिलीप स्वामी यांनी केले.माळशिरस तालुका पंचायत समितीच्या वतीने आयोजित शैक्षणिक गुणवत्तावाढ कार्यशाळेमध्ये ते बोलत होते.दिलीप स्वामी संकल्पनेतून संपूर्ण जिल्ह्यामध्ये विद्यार्थ्यांच्या सर्वांगीण विकासासाठी दशसूत्री कार्यक्रम राबवण्यात येत आहे. त्यासंदर्भात तालुक्यातील सर्व मुख्याध्यापकांची उद्बोधनपर कार्यशाळा स्मृतीभवन येथे आयोजित करण्यात आली होती.कार्यशाळेच्या प्रास्ताविकामध्ये शिक्षणाधिकारी डाॅ.किरण लोहार यांनी दशसूत्री कार्यक्रमाची पार्श्वभूमी विशद केली. शिक्षकांना अध्यापनाच्या संदर्भात सखोल असे मार्गदर्शन त्यांनी केले. यावेळी बोलताना मुख्य कार्यकारी अधिकारी दिलीप स्वामी यांनी भारतीय संस्कृतीमधील गुरुचे महत्त्व अधोरेखित केले.ज्ञानेश्वरी,रामायण व महाभारतामधील अनेक दाखले देत त्यांनी भारतीय संस्कृतीतील शिक्षण परंपरेवर प्रकाश टाकला.जिल्हा परिषदेने राबवलेले उपक्रम,कोरोनाकाळातील कामगिरीचा त्यांनी विशेष उल्लेख केला.शिक्षकांना आपल्या संस्कृतीत पूजनीय स्थान आहे.म्हणून आधुनिक समाज घडवण्याचे सामर्थ्य फक्त शिक्षकांमध्ये आहे असे सांगतानाच त्यांनी दशसूत्री कार्यक्रमातील प्रत्येक सूत्राचे महत्त्व विशद केले.दिलीप स्वामी यांच्या दृष्टांतपर व ओघवत्या वाणीने उपस्थित शिक्षकवृंद अक्षरश: मंत्रमुग्ध झाला.त्यांच्या अमोघ मार्गदर्शनाने प्रभावीत होऊन खडकमळा येथील जिल्हा परिषद शाळेचे मुख्याध्यापक दिगंबर गायकवाड यांनी चक्कं दिड लाख रुपये रकमेचा चेक जिल्हा परिषदेच्या सायकल बँकेसाठी सूपुर्द केला.स्वामी साहेबांनी सदर शिक्षकाचे भरभरुन कौतुक केले.सदर कार्यशाळेसाठी माळशिरस तालुक्याने केलेले उत्कृष्ट नियोजन व शिक्षकांची ड्रेसकोडसह उपस्थिती याबद्दलही स्वामी साहेबांनी सर्वांचे विशेष कौतुक केले. यावेळी उपस्थित मान्यवरांना तालुक्यातील प्राथमिक शिक्षकांनी लिहिलेली पुस्तके भेट देण्यात आली. यावेळी पिलीव येथील शिक्षिका मोहिनी शिंदे यांच्या काव्यसंग्रहाचे प्रकाशन मान्यवरांच्या शुभहस्ते करण्यात आले.यावेळी व्यासपीठावर उपशिक्षणाधिकारी संजय जावीर, जिल्हा शिक्षण व प्रशिक्षण संस्थेचे प्राचार्य रामचंद्र कोरडे,जिल्हा परिषदेचे विस्ताराधिकारी हरिश राऊत,सुहास गुरव,माळशिरसचे गटविकास अधिकारी विनायक गुळवे,आरोग्य अधिकारी रामचंद्र मोहिते,शिक्षण विस्तार अधिकारी प्रदीप करडे,हर्षवर्धन नाचणे,सायरा मुलाणी,सर्व केंद्रप्रमुख,विषयतज्ञ आदी उपस्थित होते. यावेळी उपक्रमशील शिक्षिका श्रीमती गिरीजा नाईकनवरे व शहजादी काझी यांनी दशसूत्री कार्यक्रमाच्या अनुषंगाने रेखाटलेली आकर्षक रांगोळी सर्वांचे लक्ष वेधून घेत होती.कार्यक्रमाचे बहारदार सूत्रसंचालन सुहास उरवणे व राजाराम गुजर यांनी केले तर आभार तालुक्याचे गटशिक्षणाधिकारी धनंजय देशमुख यांनी मानले.यावेळी तालुक्यातील सर्व शाळांचे मुख्याध्यापक उपस्थित होते.
