*सोमनाथ हुलगे यांनी अहिल्यादेवींच्या जयंतीवरून सुरू केलेली मोहिते पाटलांची बदनामी थांबवावी – उल्हास वाघमोडे*
अकलूज (प्रतिनिधी ): विजय मल्टीस्टेटचे चेअरमन धैर्यशील मोहिते पाटील यांनी सुशिक्षीत बेरोजगार तरूणांना उद्योगधंद्यासाठी कर्ज देताना कधीही जात-पात पाहिली नाही. सोमनाथ हुलगे यास कर्ज देताना कधी त्याची जात पाहिली नाही. २००३ साली एक लाख रूपयांचे दिलेले कर्ज १९ वर्षानंतर वसूल करण्यासाठी बोलविले हा त्यांचा गुन्हा आहे का? त्यांच्या डोक्यात जातीयवाद असता तर त्यांनी सोमनाथ हुलगे यास कर्जच दिले नसते. कर्ज देणे, घेणे हा त्यांचा वैयक्तिक विषय असताना सोमनाथ हुलगे याने कुणाच्या तरी सांगण्यावरून मी अहिल्यादेवी होळकरांची जयंती केल्यामुळेच मला धैर्यशील मोहिते पाटील यांनी मारहाण केली असा कांगावा करण्यास सुरूवात केली आहे. मात्र तसा प्रकार घडला असता तर त्याने फिर्यादीतच तसे नमूद करायला पाहिजे होते. पण धैर्यशील मोहिते पाटील यांची बदनामी करण्यासाठी हा सारा बनाव आहे असे म्हणून वैयक्तिक स्वार्थासाठी अहिल्यादेवींच्या जयंतीवरून समाजाची दिशाभूल करून सोमनाथ हुलगे याने समाजाला वेठीस धरणे थांबवावे व अहिल्यादेवी जयंतीवरून सुरू केलेली मोहिते पाटलांची बदनामी थांबवावी असे प्रतिपादन धनगर समाजाचे अकलूज उपाध्यक्ष उल्हास वाघमोडे यांनी केले आहे. यावेळी पुढे बोलताना उल्हास वाघमोडे म्हणाले की, माळशिरस तालुक्यातील मोहिते पाटील विरोधकांनी सोमनाथ हुलगे याचा कळसूत्री बाहुलीप्रमाणे वापर करून धैर्यशील मोहिते पाटलांवर खोटा गुन्हा दाखल केला आहे. मात्र गुन्हा दाखल झाल्यानंतर दुसऱ्या दिवशी सोमनाथ हुलगे याने एकट्याचा व्हिडीओ बनवून समाजामध्ये तेढ निर्माण करण्याच्या उद्देशाने सदरचा व्हिडीओ व्हायरल केला आहे. या व्हिडीओच्या माध्यमातून धैर्यशील मोहिते पाटील यांना समाजाचे दुश्मन संबोधून त्यांच्याबद्दल गैरसमज निर्माण करून समाजात द्वेष निर्माण करण्याचे काम जाणीवपूर्वक केले जात आहे. अकलूजसह दहा गावांनी मिळून अहिल्यादेवी होळकर यांची जयंती अकलूजमध्ये मोठ्या उत्साहात साजरी केली. तेव्हा धैर्यशील भैय्यासाहेब व मोहिते पाटील कुटुंबातील सर्व व्यक्तींनी आम्हाला मोठ्या प्रमाणात सहकार्य केलेले आहे. धैर्यशील मोहिते पाटील तर दिवसभर आमच्यासोबत राहून आमच्या मर्दानी खेळासह इतर विविध कार्यक्रमातील कलावंतांना योग्य बक्षीस देऊन व मानसन्मान करून जयंतीच्या मिरवणुकीत अतिशय उत्साहाने सहभागी झाले होते. त्यावेळी आमच्या समाजातील जनभावना ओळखून त्यांनी आम्हाला आपल्या अकलूज परिसरामध्ये अहिल्यादेवींचा भव्यदिव्य पुतळा बसविण्यासाठी एखादी जागा निश्चित करा, त्यावर साधक बाधक चर्चा करून दोन महिन्यात पुतळा बसवू असे आश्वासन दिले आहे. तसेच महाराष्ट्रामध्ये विद्यापीठाचा लढा सुरू असताना प्रत्येक पंचायत समितीला भेटून आल्यावर कुणीही नामांतरासाठी ठराव दिलेला नव्हता, पण महाराष्ट्रातला पहिला ठराव व सोलापूर जिल्ह्यातला पहिला ठराव धैर्यशील मोहिते पाटील यांच्या मार्गदर्शनाखाली माळशिरस पंचायत समितीने विशेष मिटींग घेऊन एकमताने तो ठराव मंजूर केला ही बाब प्राध्यापक शिवाजीराव बंडगर सरांना विचारा. माजी उपमुख्यमंत्री यांच्याकडे पर्यटन खाते असताना अहिल्यादेवी यांच्या जन्मगावी अहिल्यासृष्टी निर्माण करण्यासाठी दोन ते अडीच कोटी निधी आण्णासाहेब डांगे यांना दिलेला आहे. आम्ही चौंडीला गेल्यावर त्यांनी मोहिते पाटलांचे आभार मानले. अशाप्रकारे मोहिते पाटील कुटुंब कायम धनगर समाजाच्या पाठीशी असताना आपल्या वैयक्तिक स्वार्थासाठी सोमनाथ हुलगे हे जाणीवपूर्वक समाजाला वेठीस धरून विनाकारण मोहिते पाटलांना बदनाम करण्याचा प्रयत्न करीत आहे. त्यामुळे धनगर समाजाने त्याच्या या कुटील डावाला अजिबात बळी न पडता सत्य वस्तुस्थिती जाणून घ्यावी असे आवाहन उल्हास वाघमोडे यांनी केले आहे. संजय पाडूळे, रणजित सुसलादे, सुधाकर पोटे, शिवाजी घोडके, संजय पिसे, अभिषेक घुले, रूपेश पोटे, अरूण नरुटे, राहुल माने, निलेश ठोंबरे, नागेश शिंदे, तात्या पोटे, सोमा सरगर, राजू नरुटे, अमोल राजगे, विशाल लाळगे, अनिल इरकर यांच्यासह धनगर समाज उन्नती मंडळाचे सर्व पदाधिकारी उपस्थित होते. *चौकट*धैर्यशील मोहिते पाटील यांना बदनाम करण्यासाठी सोमनाथ हुलगे यांचेडून अहिल्यादेवी होळकर यांच्या जयंतीचे भांडवल केले जात आहे. तसेच प्रशासनावर दबाव टाकण्यासाठी धनगर समाजाचा मोर्चा काढण्याची धमकी दिली जात आहे. मात्र सोमनाथ हुलगे व विरोधकांनी मोहिते पाटलांच्या विरोधात समाजाला घेऊन मोर्चा काढलाच तर आम्हीही जशास तसे उत्तर देण्यासाठी मोर्चा काढू.*- अध्यक्ष लक्ष्मीकांत वाघे, धनगर समाज उन्नती मंडळ, अकलूज*
