अकलूजमध्ये गर्भलिंग निदानाचा सापळा; महिला पोलिसांना मारहाण करून आरोपी फरार
अकलूज (प्रतिनिधी )अकलूज परिसरात गर्भलिंग निदान चाचणी केली जाणार असल्याची गुप्त माहिती मिळाल्यानंतर पोलिसांनी रचलेल्या सापळ्यात आरोपींनी दोन डमी महिला पोलिसांना मारहाण करून शासकीय कामात अडथळा आणल्याची घटना मंगळवारी दुपारी साडेबारा वाजण्याच्या सुमारास पळशी येथे घडली.
या घटनेनंतर आरोपींनी घटनास्थळावरून पलायन केले असून त्यांच्या शोधासाठी पोलिसांची पथके रवाना करण्यात आली आहेत
.अकलूज परिसरातील संग्रामनगर, नऊचारी येथून गर्भलिंग निदानासाठी येणाऱ्या महिलांना वाहनातून अन्य ठिकाणी नेण्यात येणार असल्याची माहिती पोलिसांना मिळाली होती.
या माहितीची खातरजमा करण्यासाठी पोलिसांनी नियोजनबद्ध पद्धतीने सापळा रचला. त्यानुसार पीएसआय सोनाली मोरे आणि पोलिस अलका कदम यांना डमी ग्राहक म्हणून या कारवाईत सहभागी करण्यात आले. दोन्ही महिला पोलिस आरोपींच्या संपर्कात गेल्यानंतर त्यांना वाहनातून म्हसवड तालुक्यातील पळशी येथे नेण्यात आले. तेथे गर्भलिंग निदानाची चाचणी करण्याची तयारी सुरू असतानाच आरोपींना या दोन्ही महिला ग्राहक नसून पोलिस असल्याचा संशय आला. त्यानंतर परिस्थिती चिघळली आणि आरोपींनी दोन्ही महिला पोलिसांना मारहाण केल्याचे पोलिसांनी सांगितले.
दरम्यान, घटनास्थळी आधीच सापळा रचून पोलिसांचे पथक दाखल झाले होते. मात्र आरोपींनी पोलिसांच्या कारवाईला विरोध करत शासकीय कामात अडथळा निर्माण केला आणि संधी साधून घटनास्थळावरून पळ काढला
. घटनेनंतर पोलिसांनी आरोपींचा शोध घेण्यासाठी विविध ठिकाणी पथके रवाना केली आहेत.
या प्रकरणी महेश नंदकुमार खाडे, नंदकुमार खाडे,महेशची आई, दोन अनोळखी पुरुष आणि दोन अनोळखी महिला अशा एकूण सहा जणांविरुद्ध गुन्हा दाखल करण्यात आला आहे.
फरार आरोपींचा शोध घेण्यासाठी पोलिसांकडून तपासाची चक्रे वेगाने फिरवली जात आहेत.
या प्रकरणाचा पुढील तपास डीवायएसपी संतोष वाळके करीत आहेत.
दरम्यान, गर्भलिंग निदानासारख्या बेकायदेशीर प्रकारांना आळा घालण्यासाठी पोलिसांकडून कठोर कारवाई करण्यात येणार असल्याचे अकलूज उपविभागीय पोलिस अधिकारी संतोष वाळके यांनी स्पष्ट केले आहे.
अशा प्रकारच्या बेकायदेशीर कृत्यांमध्ये सहभागी असणाऱ्यांविरुद्ध कायद्यानुसार कठोर कारवाई केली जाईल, असा इशाराही त्यांनी दिला.
