दुरणेवस्ती येथे योगतपस्वी प.पू. नारायणकाका ढेकणे महाराज यांच्या द्विजन्मशताब्दी वर्षानिमित्त भव्य रक्तदान शिबिर व चौक नामकरण सोहळा
अकलूज (प्रतिनिधी) : योगतपस्वी प.पू. नारायणकाका ढेकणे महाराज यांच्या द्विजन्मशताब्दी वर्षानिमित्त चैतन्य कुटी शक्तिपात महायोग साधन धाम ट्रस्ट, दुरणेवस्ती, महाळुंग चौकी, माळीनगर यांच्या वतीने तसेच प.पू. श्रीपादतीर्थ स्वामी महाराज यांच्या मार्गदर्शनाखाली संपूर्ण वर्षभर विविध धार्मिक, आध्यात्मिक, सामाजिक व जनकल्याणकारी उपक्रमांचे आयोजन करण्यात आले आहे.
या उपक्रमांच्या माध्यमातून समाजात अध्यात्माबरोबरच सेवा, संस्कार आणि सामाजिक बांधिलकी जोपासण्याचा प्रयत्न करण्यात येणार आहे
.या द्विजन्मशताब्दी वर्षानिमित्त गुरुवार, दि. ३ जुलै २०२६ रोजी दुरणेवस्ती येथे भव्य रक्तदान शिबिर तसेच दुरणेवस्ती येथील अकलूज-श्रीपूर चौकास “प.पू. श्री. नारायणकाका ढेकणे महाराज चौक” असे नामकरण करून नामफलकाचे अनावरण करण्यात येणार आहे.
या ऐतिहासिक सोहळ्यामुळे परिसरातील भाविक व ग्रामस्थांमध्ये उत्साहाचे वातावरण निर्माण झाले आहे.कार्यक्रमाची सुरुवात सकाळी ६.०७ ते ६.२८ या वेळेत वैश्विक पूर्वाभ्यास संकल्पाने होईल. त्यानंतर सकाळी ९ ते सायंकाळी ५ या वेळेत रक्तदान शिबिर आयोजित करण्यात आले असून, अधिकाधिक रक्तदात्यांनी सहभागी होऊन गरजू रुग्णांना जीवनदान देण्याच्या या सामाजिक उपक्रमात योगदान द्यावे, असे आवाहन आयोजकांनी केले आहे
.सकाळी १० वाजता प.पू. श्री. नारायणकाका ढेकणे महाराज चौक नामकरण व नामफलक अनावरणाचा मुख्य सोहळा संपन्न होणार आहे. या कार्यक्रमाचे शुभहस्ते मा. प.पू. स्वामी श्रीपादतीर्थ यांच्या हस्ते होणार असून, प्रमुख पाहुण्या म्हणून प्रसिद्ध साहित्यिका, गायिका, समाजसेविका तसेच यू.एस.ए. एक्सलन्स लीडरशिप अवॉर्ड प्राप्त डॉ. श्रीमती स्वयंप्रभादेवी मोहिते-पाटील उपस्थित राहणार आहेत.
सायंकाळी ५ वाजता महायोग शिबिर व सामूहिक साधना, ६ वाजता प.पू. स्वामी लोकनाथतीर्थ स्वामी महाराज यांच्या अवतरणिकेचे वाचन, तर ७ वाजता चिंतन, आरती व महाप्रसादाचा कार्यक्रम होणार आहे
.योगतपस्वी प.पू. नारायणकाका ढेकणे महाराज यांनी शक्तिपात महायोगाच्या माध्यमातून अध्यात्म, साधना आणि मानवसेवेचा जो आदर्श समाजासमोर ठेवला, त्या कार्याचा गौरव करण्यासाठी आणि त्यांच्या विचारांचा वारसा नव्या पिढीपर्यंत पोहोचविण्यासाठी द्विजन्मशताब्दी वर्षभर विविध उपक्रम राबविण्यात येणार असल्याचे ट्रस्टच्या वतीने सांगण्यात आले.
या धार्मिक, सामाजिक व जनहिताच्या कार्यक्रमात परिसरातील सर्व साधक, भक्त, रक्तदाते, ग्रामस्थ तसेच नागरिकांनी मोठ्या संख्येने उपस्थित राहून रक्तदान करून समाजसेवेच्या या उपक्रमात सहभागी व्हावे आणि कार्यक्रमाची शोभा वाढवावी, असे आवाहन चैतन्य कुटी शक्तिपात महायोग साधन धाम ट्रस्ट, दुरणेवस्ती यांच्या वतीने करण्यात आले आहे.
