*अकलूजमध्ये पुण्यश्लोक अहिल्यादेवी होळकर जयंतीनिमित्त “न समजलेले आईबाप”या डॉ. वसंत हंकारे यांच्या व्याख्यानाने श्रोते अंतर्मुख*
अकलूज (गणेश जाधव ):पुण्यश्लोक अहिल्यादेवी होळकर यांच्या ३०१ व्या जयंतीनिमित्त अकलूज येथील ऐतिहासिक विजय चौकात जय मल्हार प्रतिष्ठानच्या वतीने आयोजित करण्यात आलेल्या व्याख्यान सोहळ्यात सुप्रसिद्ध वक्ते डॉ. वसंत हंकारे यांनी “न समजलेले आईबाप” या विषयावर अत्यंत प्रभावी आणि हृदयस्पर्शी विचार मांडत उपस्थितांना भावनिक आणि वैचारिक अशा दोन्ही स्तरांवर अंतर्मुख केले.
“डीजेला फाटा, विचारांना वाट” हा सामाजिक संदेश देत आयोजित या कार्यक्रमाची सुरुवात कार्यक्रमाच्या अध्यक्षा डॉ. स्वयंप्रभादेवी उदयसिंह मोहिते-पाटील, डॉ. वसंत हंकारे आणि सौ. स्नेहलताई जानकर यांच्या हस्ते पुण्यश्लोक राजमाता अहिल्यादेवी होळकर यांच्या प्रतिमेचे पूजन आणि दीपप्रज्वलन करून करण्यात आली
.यावेळी “येळकोट येळकोट जय मल्हार”च्या जयघोषाने संपूर्ण विजय चौक दुमदुमून गेला होता.
*अकलूज परिसरातील मान्यवरांची उपस्थिती*
या सोहळ्यास अकलूजचे माजी सरपंच किशोरसिंह माने-पाटील, माळशिरस नगरपंचायत चे माजी नगराध्यक्ष आप्पासो देशमुख, माजी उपनगराध्यक्ष डॉ. मारुतीराव पाटील, पांडुरंग तात्या वाघमोडे, माळशिरसच्या नगरसेविका सौ. रेशमाताई टेळे, माजी सरपंच तुकाराम भाऊ देशमुख, महादेव देशमुख, आप्पासो वाघमोडे, सुमित जानकर, भीमराव भुसनर तसेच अकलूज परिसरातील नगरसेवक, नगरसेविका आणि राजकीय, सामाजिक व सांस्कृतिक क्षेत्रातील अनेक मान्यवर मोठ्या संख्येने उपस्थित होते.
*काळजाला हात घालणारे व्याख्यान*
मुख्य व्याख्याते डॉ. वसंत हंकारे यांनी आजच्या तरुण पिढी आणि पालकांमधील वाढते अंतर, संवादाचा अभाव आणि बदलती कौटुंबिक मूल्ये यावर अत्यंत प्रभावी शैलीत भाष्य केले. “आई-वडील आपल्या मुलांसाठी संपूर्ण आयुष्य झिजवतात; मात्र आजची पिढी त्यांच्या कष्टांची जाणीव ठेवते का?” असा ज्वलंत प्रश्न त्यांनी उपस्थित केला. अहिल्यादेवींच्या मातृत्वाची आणि सुभेदार मल्हारराव होळकर यांच्या संस्कारांची सांगड घालत त्यांनी “न समजलेले आईबाप” हा विषय अत्यंत संवेदनशीलतेने मांडला. त्यांच्या विचारांनी उपस्थित प्रेक्षकांना अंतर्मुख केले.
*पालकांच्या त्यागावर प्रभावी भाष्य*
मुख्य व्याख्यानात डॉ. वसंत हंकारे यांनी आजच्या धकाधकीच्या जीवनात वाढत चाललेली पालक आणि मुलांमधील दुराव्याची भावना अत्यंत मार्मिक शब्दांत मांडली. ते म्हणाले,“आई-वडील स्वतःच्या इच्छा, स्वप्नं आणि सुखाचा त्याग करून मुलांच्या भविष्यासाठी आयुष्यभर झटत असतात. पण मुलं मोठी झाल्यानंतर त्यांना त्या त्यागाची खरी किंमत समजते का, हा प्रश्न समाजासमोर उभा आहे.
”आजच्या पिढीमध्ये मोबाईल, सोशल मीडिया आणि स्पर्धेच्या जगात नात्यांमधील संवाद कमी होत चालल्याची खंत त्यांनी व्यक्त केली.“घरात एकत्र राहूनही मनाने दूर जाण्याची अवस्था निर्माण झाली आहे,” असे सांगताना त्यांनी अनेक वास्तववादी उदाहरणे दिली. आई-वडिलांच्या भावनांचा वेध
व्याख्यानादरम्यान डॉ. हंकारे यांनी आईच्या ममतेचे आणि वडिलांच्या संघर्षाचे अनेक प्रसंग सांगत श्रोत्यांच्या डोळ्यांत अश्रू आणले.ते म्हणाले,“आई मुलांच्या प्रत्येक वेदनेवर फुंकर घालते, तर वडील स्वतःची वेदना लपवून मुलांच्या आयुष्याला आकार देत असतात.”मुलांना सर्व सुखं मिळावीत म्हणून पालक स्वतःच्या गरजा बाजूला ठेवतात, परंतु वृद्धापकाळात त्यांनाच उपेक्षेची वागणूक मिळते, ही आजच्या समाजाची शोकांतिका असल्याचे त्यांनी नमूद केले.
*अहिल्यादेवींच्या संस्कारांचा आदर्श*
पुण्यश्लोक अहिल्यादेवी होळकर यांच्या जयंतीनिमित्त आयोजित कार्यक्रम असल्याने डॉ. हंकारे यांनी अहिल्यादेवींच्या जीवनकार्याचा विशेष उल्लेख केला.सुभेदार मल्हारराव होळकर यांनी दिलेले संस्कार, कर्तव्यनिष्ठा आणि जनसेवेची शिकवण यामुळेच अहिल्यादेवींनी इतिहासात आदर्श राज्यकर्ती म्हणून स्थान मिळवले, असे त्यांनी सांगितले.“घरातील संस्कारच व्यक्तिमत्त्व घडवतात,” असे सांगत त्यांनी पालकांनी मुलांना केवळ शिक्षण नव्हे तर संस्कार देण्याची गरज अधोरेखित केली.
*युवकांना दिला जीवनमूल्यांचा संदेश*
आजची तरुण पिढी करिअरच्या मागे धावत असताना कुटुंबासाठी वेळ देणे विसरत चालल्याचे त्यांनी नमूद केले.“मोठं घर बांधण्यापेक्षा मोठी माणसं जोडा,” असा संदेश देत त्यांनी युवकांना आई-वडिलांशी संवाद वाढवण्याचे आवाहन केले.
व्याख्यानात त्यांनी अनेक विनोदी किस्से, वास्तव अनुभव आणि भावनिक उदाहरणांचा प्रभावी वापर केला. त्यामुळे संपूर्ण व्याख्यानादरम्यान श्रोते मंत्रमुग्ध होऊन ऐकत होते.
*संघर्षाला सलाम*
कार्यक्रमात समाजात प्रेरणादायी कार्य करणाऱ्या व्यक्तींचा सन्मान करण्यात आला.पतीच्या निधनानंतर भेळ व्यवसाय करून प्रतिकूल परिस्थितीत आपल्या मुलांना उच्चशिक्षित करणाऱ्या श्रीमती कल्पना आप्पा नेवसे यांना ‘अहिल्यारत्न सन्मान पुरस्कार’ प्रदान करण्यात आला.
तसेच एक सामान्य फोटोग्राफर ते ‘धर्मरक्षक अहिल्यादेवी होळकर’ या ऐतिहासिक चित्रपटाचे निर्माता म्हणून यशस्वी वाटचाल करणारे सोमनाथ भिवाजी शिंदे यांना ‘मल्हाररत्न पुरस्कार’ देऊन गौरविण्यात आले.
*मोठ्या संख्येने उपस्थिती*
या प्रेरणादायी सोहळ्यास अकलूज आणि परिसरातील माता-भगिनी, युवक-युवती तसेच सामाजिक, राजकीय आणि सांस्कृतिक क्षेत्रातील मान्यवर मोठ्या संख्येने उपस्थित होते.
पसायदानाने कार्यक्रमाची सांगता करण्यात आली. त्यानंतर उपस्थितांसाठी स्नेहभोजनाचे आयोजन करण्यात आले होते.
कार्यक्रम यशस्वी करण्यासाठी जय मल्हार प्रतिष्ठानचे अध्यक्ष सुधाकर पोटे, उपाध्यक्ष अमोल राजगे यांच्यासह सर्व पदाधिकारी व कार्यकर्त्यांनी विशेष परिश्रम घेतले.
सूत्रसंचालन संजय कुचेकर यांनी केले, तर आभार प्रदर्शन शिवाजीराव घोडके यांनी मानले.
