महर्षि चौकाच्या तब्बल २ कोटींच्या निधीतून भव्य सुशोभीकरणाला प्रारंभ ; अकलूजच्या वाहतुकीला मिळणार मोठा दिलासा
अकलूज (प्रतिनिधी ):अकलूज शहराच्या विकासाच्या दृष्टीने अत्यंत महत्त्वपूर्ण मानल्या जाणाऱ्या महर्षि चौकाच्या भव्य रुंदीकरण आणि सुशोभीकरणाच्या कामाला अखेर प्रत्यक्ष सुरुवात झाली असून, या महत्त्वाकांक्षी प्रकल्पामुळे शहराच्या सौंदर्यात आणि वाहतुकीच्या व्यवस्थेमध्ये मोठा बदल घडून येणार आहे.
अंदाजे २ कोटी रुपयांच्या निधीतून सार्वजनिक बांधकाम विभागामार्फत हे काम हाती घेण्यात आले आहे.सध्या अकलूज शहरातील सर्वाधिक वर्दळीच्या चौकांपैकी एक असलेल्या महर्षि चौकावर दिवसेंदिवस वाहतुकीचा ताण वाढत होता.
शहरातील विविध प्रमुख मार्ग या चौकातून जोडले जात असल्यामुळे येथे वारंवार वाहतूक कोंडी निर्माण होत होती. ही समस्या लक्षात घेऊन चौकाच्या भव्य रुंदीकरणाचा निर्णय घेण्यात आला असून, आता हा चौक तब्बल ५५ बाय ४४ मीटरपर्यंत विस्तारित करण्यात येणार आहे. त्यामुळे चौक जवळपास दुप्पट मोठा होणार असून भविष्यातील वाहतुकीचा प्रश्न मोठ्या प्रमाणात सुटणार असल्याची अपेक्षा व्यक्त होत आहे.
या कामासाठी माजी उपमुख्यमंत्री विजयसिंह मोहिते पाटील , सहकार महर्षी कारखान्याचे चेअरमन जयसिंह मोहिते पाटील, माजी आमदार रणजितसिंह तसेच खासदार धैर्यशील मोहिते पाटील यांच्या मार्गदर्शनाखाली नगराध्यक्षा रेश्मा अडगळे आणि उपनगराध्यक्ष शिवतेजसिंह मोहिते-पाटील यांनी विशेष पाठपुरावा केल्याचे सांगितले जात आहे.
त्यांच्या सातत्यपूर्ण प्रयत्नांमुळेच या महत्त्वाच्या प्रकल्पाला गती मिळाल्याची चर्चा शहरात सुरू आहे.या प्रकल्पांतर्गत चौकाचे संपूर्ण काँक्रीटीकरण करण्यात येणार असून, मजबूत आणि टिकाऊ बांधकामावर विशेष भर देण्यात येणार आहे.
चौकातील वाहतुकीची सुरक्षितता लक्षात घेऊन आधुनिक पद्धतीची एलईडी प्रकाशयोजना उभारण्यात येणार आहे. रात्रीच्या वेळी चौक अधिक आकर्षक दिसावा तसेच अपघातांचे प्रमाण कमी व्हावे, यासाठी ही व्यवस्था महत्त्वाची ठरणार आहे.
यासोबतच परिसरातील सर्व विद्युत वाहिन्या अंडरग्राऊंड करण्यात येणार आहेत. त्यामुळे भविष्यात वारंवार होणारे रस्ते खोदकाम टळणार असून शहराच्या सौंदर्यात मोठी भर पडणार आहे.
उघड्या विद्युत तारा आणि पोल्समुळे निर्माण होणाऱ्या अडचणीही दूर होणार आहेत.महर्षि चौकाच्या मध्यभागी अकलूज नगरपरिषदेच्या माध्यमातून आकर्षक आणि भव्य स्तंभ उभारण्यात येणार आहे. हा स्तंभ भविष्यात अकलूज शहराच्या नव्या ओळखीचे प्रतीक ठरणार असल्याचे बोलले जात आहे.
आधुनिकता, सौंदर्य आणि नियोजनबद्ध वाहतूक व्यवस्थेचा उत्तम संगम या प्रकल्पातून पाहायला मिळणार आहे.
दरम्यान, या कामाचे स्थानिक नागरिकांनी मोठ्या उत्साहाने स्वागत केले आहे. महर्षि चौकासोबतच गांधी चौक येथेही लवकरच सुशोभीकरणाच्या कामास सुरुवात होणार असल्याची माहिती समोर येत आहे.
ही दोन्ही कामे पूर्ण झाल्यानंतर अकलूज शहराचा चेहरामोहरा पूर्णपणे बदलून जाईल, असा विश्वास नागरिकांकडून व्यक्त केला जात आहे.
शहराच्या वाढत्या विस्ताराला आणि भविष्यातील गरजांना लक्षात घेऊन राबविण्यात येणारा हा प्रकल्प अकलूजच्या विकासातील एक महत्त्वाचा मैलाचा दगड ठरणार असल्याचे मत सर्व स्तरांतून व्यक्त होत आहे.
