माळशिरस तालुक्यात संभाजी महाराज जयंतीनिमित्त सामाजिक उपक्रमांची परंपरा कायम
अकलूज (प्रतिनिधी) – माळशिरस तालुक्यातील एका अवलिया मराठा समाजसेवकाने छत्रपती शिवाजी महाराज व छत्रपती संभाजी महाराज यांच्या जयंतीनिमित्त वायफळ खर्च टाळून सामाजिक उपक्रम राबवण्याची प्रेरणादायी परंपरा यंदाही कायम ठेवली आहे.
दि. 14 मे 2026 रोजी छत्रपती संभाजी महाराज यांच्या 369 व्या जयंतीनिमित्त सलग अकराव्या वर्षी विविध समाजोपयोगी उपक्रमांचे आयोजन करण्यात आले आहे.
“अन्नदान हेच श्रेष्ठ दान” या संकल्पनेतून गरजूंसाठी अन्नदान करण्यात येणार असून, भगवे गमजे वाटपाचाही उपक्रम राबविण्यात येणार आहे.
याचबरोबर विद्यार्थ्यांमध्ये इतिहासाबद्दल जागरूकता निर्माण करण्याच्या उद्देशाने 369 माहितीपर पुस्तके वाटप करण्यात येणार आहेत.
हा उपक्रम यशवंत नगर येथील शाळा, कन्या प्रशाला तसेच सदुभाऊ चौक येथील समावि शाळेमध्ये राबविण्यात येणार आहे.
गेल्या अकरा वर्षांपासून सुरू असलेली ही परंपरा केवळ जयंती साजरी करण्यापुरती मर्यादित न राहता समाजहिताच्या कार्यात रूपांतरित झाल्याने या उपक्रमाचे सर्वत्र कौतुक होत आहे.
विशेष म्हणजे, जयंती निमित्त होणारा अनावश्यक खर्च टाळून समाजोपयोगी कार्य करण्याचा संदेश या उपक्रमातून दिला जात आहे.
दरम्यान, दि. 14 मे 2026 रोजी गुरुवारी सकाळी ठीक 9 वाजता सदुभाऊ चौक येथे या उपक्रमांना सुरुवात होणार असून, माळशिरस तालुक्यातील सर्व शिवभक्त व शंभूभक्तांनी मोठ्या संख्येने उपस्थित राहावे, असे आवाहन छत्रपती प्रतिष्ठान, माळशिरस तालुका यांच्या वतीने करण्यात आले आहे.
