*”जनतेचे कंबरडे मोडले, पण लोकप्रतिनिधींचे डोळे उघडेना; अकलूज-वेळापूर रस्त्याची कधी होणार सुटका?”* *क्रमशः भाग -8.*
अकलूज (प्रतिनिधी): अकलूज ते वेळापूर या अत्यंत वर्दळीच्या आणि महत्त्वाच्या मानल्या जाणाऱ्या रस्त्याची सध्या दयनीय अवस्था झाली असून, ‘रस्त्यात खड्डे की खड्ड्यांत रस्ता’ असा प्रश्न सर्वसामान्य प्रवाशांना पडला आहे.
या जीवघेण्या समस्येकडे सार्वजनिक बांधकाम विभाग आणि लोकप्रतिनिधींनी मात्र पूर्णपणे डोळेझाक केली असल्याने परिसरातील नागरिकांमधून तीव्र संताप व्यक्त केला जात आहे.
माळशिरस तालुक्यातील अकलूज-वेळापूर हा मार्ग व्यापारी दृष्ट्या आणि दैनंदिन वाहतुकीसाठी अतिशय महत्त्वाचा आहे. या रस्त्यावर वाहतूक करणारी जड वाहने, ट्रॅक्टर, एसटी बसेस, व्यावसायिक आणि शाळकरी विद्यार्थ्यांची या मार्गावर दररोज मोठी वर्दळ असते. मात्र, संपूर्ण रस्त्यावर पडलेल्या मोठमोठ्या खड्ड्यांमुळे अपघातांचे सत्र वाढले आहे.रस्त्यावरील धुळीमुळे परिसरातील नागरिकांचे आरोग्य धोक्यात आले आहे, तर खड्ड्यांमुळे दुचाकीस्वारांना मणक्याचे आणि पाठदुखीचे आजार जडत आहेत.
याशिवाय, वाहनांचेही मोठ्या प्रमाणावर नुकसान होत आहे. विशेषतः रात्रीच्या वेळी खड्डे लक्षात न आल्याने अनेक छोटे-मोठे अपघात घडत आहेत, ज्यामुळे प्रवाशांचा जीव टांगणीला लागला आहे.
*आश्वासनांचा पाऊस, कृती मात्र शून्य*
निवडणुका आल्या की विकासाच्या मोठ्या गप्पा मारणारे लोकप्रतिनिधी आता मात्र या गंभीर प्रश्नावर मूग गिळून गप्प आहेत. सार्वजनिक बांधकाम विभागाला (PWD) या समस्येचे गांभीर्य राहिलेले नाही. ‘लवकरच रस्ता दुरुस्त करू’, ‘निधी मंजूर झाला आहे’ अशी केवळ पोकळ आश्वासने जनतेला दिली जात आहेत. प्रत्यक्षात मात्र एकही खड्डा बुजवण्यात आलेला नाही.
लोकप्रतिनिधींनी या गंभीर समस्येकडे तातडीने लक्ष देऊन निधी उपलब्ध करून रस्त्याचे मजबुतीकरण करावे. अशी मागणी होत आहे.
काही वर्षांपूर्वी या रस्त्याच्या नुतनीकरणासाठी आणि चौपदरीकरणाच्या मोठया घोषणा करण्यात आल्या होत्या. यासाठी कोट्यावधी रुपयांचा निधी मंजूर झाल्याच्या बाताही मारण्यात आल्या होत्या. मात्र प्रत्यक्षात कोणतेही भरीव काम करण्यात आले नाही. या केवळ हवेतील घोषणाच ठरल्या आहेत.
निवडणुकीच्या काळात आश्वासनांची खैरात वाटणारे लोकप्रतिनिधी आता नागरिकांच्या या समस्येकडे सोयीस्करपणे पाठ फिरवीत आहेत.लोकप्रतिनिधी केवळ आश्वासन देतात आणि नंतर रस्त्याकडे फिरकत सुद्धा नाहीत.
*’विकासाचा महामार्ग’ की ‘मरणाचा सापळा’?**अकलूज-वेळापूर रस्ता: आश्वासनांच्या खड्ड्यात विकास की जनतेचा संयम?*
”रस्ते म्हणजे प्रगतीची दारे,” असं सरकार ओरडून सांगतंय खरं, पण अकलूज-वेळापूर मार्गावर प्रवास करताना प्रगतीची दारे नाही, तर चक्क ‘यमराजाचे द्वार’ दिसते की काय, अशी भीती प्रवाशांना वाटू लागली आहे.
निवडणुकीच्या वेळी आश्वासनांचा पाऊस पाडणाऱ्या लोकप्रतिनिधींना आता या रस्त्यावरील ‘चिखल’ आणि ‘खड्डे’ दिसत नाहीत का? असा संतप्त सवाल आता आमदारांपासून ते प्रशासकीय अधिकाऱ्यांपर्यंत विचारला जात आहे.
*खड्ड्यांचे साम्राज्य की रस्त्यावरील बेटं?*:
या मार्गावर खड्ड्यात रस्ता आहे की रस्त्यात खड्डे, हे ओळखणे कठीण झाले आहे. दुचाकीस्वारांचे कंबरडे मोडले असून मणक्याच्या आजारांनी नागरिक हैराण आहेत.
*प्रशासनाचा ‘मलमपट्टी’ फार्स:*
दरवेळी नागरिकांनी आवाज उठवला की नावापुरती खडी टाकून मलमपट्टी केली जाते. पहिल्या पावसातच या कामाचे पितळ उघडे पडते. हा जनतेच्या कराच्या पैशांचा अपव्यय नाही का?
*वेळ आणि पैशांची धूळधाण:*
जो प्रवास २० मिनिटांत व्हायला हवा, त्यासाठी आता तासभर लागतोय. वाहनांचे स्पेअर पार्ट्स खराब होऊन गॅरेजमालकांची चांदी होत असली, तरी सर्वसामान्यांचे मात्र कंबरडे मोडले आहे.
*आता सहनशीलता संपली आहे!*
शिक्षण, आरोग्य आणि व्यापार या तिन्ही गोष्टींचा कणा असलेला हा रस्ता आज मृत्यूच्या छायेखाली आहे. जर तातडीने कायमस्वरूपी काँक्रीटीकरण किंवा दर्जेदार डांबरीकरण झाले नाही, तर आगामी काळात नागरिक ‘रास्ता रोको’ नव्हे, तर ‘प्रशासनाला घेराव’ घालण्याच्या तयारीत आहेत.
”आश्वासनांच्या गाजरापेक्षा आम्हाला आता डांबराचा पक्का रस्ता हवाय!” – असा सूर संपूर्ण परिसरातून उमटत आहे.
*आमचा सवाल:*
लोकप्रतिनिधींनो, याच रस्त्यावरून तुमच्या आलिशान गाड्या वारंवार धावतात, याच रस्त्यावरून तुम्ही ये -जा करता.तेव्हा तुम्हाला जनतेच्या वेदना जाणवत नाहीत का? की केवळ निवडणुकीच्या वेळीच हा रस्ता ‘विकासाचा मार्ग’ म्हणून दिसतो?लोकप्रतिनिधी यांनी आता एसी गाड्यांमधून बाहेर पडून रस्त्याची पाहणी करावी.
*आंदोलनाचा इशारा*
प्रशासनाने आणि संबंधित लोकप्रतिनिधींनी या प्रश्नाची तातडीने दखल घेऊन अकलूज-वेळापूर रस्त्याच्या दुरुस्तीचे काम युद्धपातळीवर सुरू करावे, अन्यथा संतप्त नागरिक, शेतकरी आणि प्रवाशांच्या वतीने रस्त्यावर उतरून तीव्र ‘रास्ता रोको’ आंदोलन छेडण्यात येईल, असा थेट इशारा आता स्थानिक नागरिकांनी दिला आहे.
आता या इशाऱ्यानंतर तरी झोपेचे सोंग घेतलेले प्रशासन जागे होणार का, याकडे सर्वांचे लक्ष लागून आहे.
*क्रमशः भाग -8.*
🚨 अकलूज – वेळापूर रस्ता : संघर्ष सुरूच 🚨
अकलूज – वेळापूर रस्त्यावरील गंभीर समस्यांविरोधात १५ फेब्रुवारीपासून संघर्ष योद्धा न्यूज पोर्टल सातत्याने वृत्तमालिका प्रसिद्ध करत आहे. 👥 नागरिकांची व्यथा स्पष्ट आहे —“दररोजचा प्रवास म्हणजे जीवघेणा संघर्ष!”खड्डे, अपूर्ण काम, धूळ, वाहतूक कोंडी आणि अपघातांचा धोका यामुळे विद्यार्थी, शेतकरी, व्यापारी आणि सर्वसामान्य प्रवासी त्रस्त झाले आहेत. 🙏 अनेक नागरिकांनी प्रतिक्रिया देत आभार व्यक्त केले —“कुणीतरी आमचा आवाज उठवतोय!” 🔥 आम्ही थांबणार नाही!रस्ता पूर्ण आणि सुरक्षित होईपर्यंत सातत्याने बातम्या प्रसिद्ध करत राहू .➡️ तुमचे अनुभव, तक्रारी व सूचना आम्हाला पाठवा 📲 ७८४१८४७४५८ ➡️एकत्र येऊया, आवाज बुलंद करूया! 💪
