*प्रहार जनशक्ती पक्ष स्वबळावर लढणार – करमाळा तालुक्यात ताकद दाखवणार : अमोल जगदाळे*
प्रहार जनशक्ती पक्षाचे संस्थापक अध्यक्ष आदरणीय बच्चू भाऊ कडू यांच्या स्पष्ट आदेशानुसार येणाऱ्या जिल्हा परिषद व पंचायत समिती निवडणुकीत करमाळा तालुक्यात प्रहार जनशक्ती पक्ष स्वबळावर व स्वतंत्रपणे निवडणूक लढवणार असल्याची माहिती सोलापूर जिल्हा संपर्कप्रमुख अमोल जगदाळे यांनी दिली.
करमाळा तालुक्यात प्रहार संघटनेने आजवर शेतकरी, कष्टकरी, वंचित, दिव्यांग व सर्वसामान्य नागरिकांच्या न्यायासाठी सातत्याने संघर्ष केला आहे. शेतकऱ्यांच्या दुधाला योग्य दर मिळावा, ऊस दरवाढ व्हावी, शेतमालाला भाव मिळावा, कर्जमाफी जाहीर व्हावी यासाठी प्रहारने वेळोवेळी रस्ता रोको, ठिय्या आंदोलन, शोले स्टाईल आंदोलन करत प्रशासनाला धारेवर धरले आहे.तसेच तालुक्यात आरोग्य शिबिरे, रक्तदान शिबिरे, सामाजिक उपक्रम राबवत प्रहार जनशक्ती पक्षाने जनतेच्या अडचणींना थेट हात घातला आहे. दिव्यांग बांधवांना त्यांचा हक्काचा न्याय मिळावा यासाठीही प्रहार संघटना कायम लढणारी, संघर्ष करणारी संघटना आहे.
जात-धर्माच्या भिंती तोडून प्रत्येक समाजघटकाला न्याय देणे हीच प्रहारची भूमिका राहिली आहे.करमाळा तालुक्यात प्रहार जनशक्ती पक्षाची मजबूत संघटना असून करमाळा तालुकाध्यक्ष संदीप तळेकर यांच्याकडे सर्व बी-फॉर्म अधिकृतरीत्या रवाना झाले आहेत. यावेळी चळवळीत झटणाऱ्या, संघर्षातून उभ्या राहिलेल्या कार्यकर्त्यांना उमेदवारी देऊन त्यांना संधी दिली जाणार आहे.तालुक्यात प्रहार जनशक्ती पक्षाची सुमारे १५,००० मतांची ताकद असून येणाऱ्या स्थानिक स्वराज्य संस्थांच्या निवडणुकीत ही ताकद जनतेसमोर दाखवून दिली जाईल, असा विश्वास अमोल जगदाळे यांनी व्यक्त केला.
करमाळा तालुक्यातील सर्व शेतकरी, युवक, महिला, वंचित, दिव्यांग व परिवर्तनाची इच्छा असलेल्या नागरिकांनी प्रहार जनशक्ती पक्षाच्या स्वबळाच्या लढ्याला साथ द्यावी, असे आवाहन यावेळी करण्यात आले.
