माळशिरस विधानसभा निवडणूकीच्या रिंगणात बागेवाडी चे पोलीस पाटील शंकर बागडे ताकदीने उतरणार
अकलूज (रणजितदादा गायकवाड )विधानसभा निवडणुकीचे बिगुल वाजले असून, आचारसंहिता देखील सुरु झाली आहे. 29ऑक्टोबर रोजी उमेदवारी अर्ज भरण्याचा शेवटचा दिवस असून 30तारखेला अर्जाची छाननी होणार आहे. 4नोव्हेंबर रोजी अर्ज माघारी घेता येणार आहे.तसेच 20नोव्हेंबर रोजी संपूर्ण राज्यात एकाच टप्यात मतदान होणार असून, 23नोव्हेंबर रोजी मतमोजणी होणार आहे.
माळशिरस विधानसभा मतदारसंघ हा अनुसूचित जातीसाठी राखीव असून यापूर्वी या मतदारसंघातून स्वर्गीय हनुमंतराव डोळस यांनी दोनवेळा प्रतिनिधित्व केले आहे. तर 2019ला या मतदार संघातून भाजपा चे आमदार राम सातपुते हे निवडून आले.
2024च्या निवडणुकीसाठी या मतदार संघात अद्याप कोणत्याही पक्षाने आपले उमेदवार घोषित केले नाहीत. भाजपा आणि राष्ट्रवादी काँग्रेस कडून उमेदवारी मिळविण्यासाठी अनेक इच्छुक प्रयत्नशील आहेत.इच्छुकांच्या संख्येत दिवसेंदिवस वाढ होताना दिसत आहेत. अशातच राष्ट्रवादी काँग्रेस कडून बागेवाडी चे पोलीस पाटील शंकर बागडे हे देखील इच्छुक असल्याचे बोलले जात आहे.
यासंदर्भात बोलताना ते म्हणाले की,मतदानबद्दल आज समाजामध्ये उदासीनता दिसून येतेय. तेच ते नेते आणि त्याच त्या आश्वासनाना लोक कंटाळले आहेत. मतदानलाच जायचे नाही हा ट्रेंड समाजामध्ये वाढतो आहे.त्यामुळे मतदानाची टक्केवारी कमी होते.सुजाण मतदार स्वच्छ चारी त्र्याचा आणि उच्चशिक्षत उमेदवार मागू लागले आहेत. त्यामुळेच मी माळशिरस विधानसभा निवडणूक लढवनार असल्याचे शंकर वागडे यांनी सांगितले.
शंकर सिताराम बागडे हे गेल्या 23 वर्षांपासून एलआयसीमध्ये काम करत आहेत. अर्थशास्त्र मध्ये एम ए पदवी प्राप्त असलेले शंकर बागडे हे बागेवाडी गावचे पोलीस पाटील असून सोलापूर ग्रामीण मधील प्रसिद्ध असलेले स्माईल एफ एम 90.8 चे ते हेड आहेत.या माध्यमातून माळशिरस तालुक्यातील घराघरात स्माईल एफ. एम. पोहचले आहे.
त्यांच्या संस्कृती बहुउद्देशीय संस्थेच्या माध्यमातून त्यांनी रक्तदान,वृक्षारोपण व पाणी आणि भविष्य या विषयावर अनेक मार्गदर्शन शिबिर आयोजित केले आहेत. इतर सामाजिक कामातही ते नेहमी अग्रेसर असतात.बागडे पुढे बोलताना म्हणाले, राजकारण खराब म्हणून चांगले तरुण यात येत नाहीत.
त्यामुळे आपल्या माळशिरस तालुक्यापुढे असलेल्या पारंपरिक समस्या अद्याप सुटलेल्या नाहीत.तालुक्याचा पश्चिम भाग आजही तहानलेलाच आहे. औदयोगिक क्षेत्राचा विकास न झाल्याने सुशिक्षित तरुण कामासाठी शहरांकडे जातो आहे. या तरुणांच्या हाताला काम देणे गरजेचे आहे.पोलीस पाटील, एल आय सी व एफ एम च्या माध्यमातून मी तालुका जवळून पाहिला आहे.
शरद पवार साहेबांच्या पक्षाकडून मी विधानसभेचे तिकीट मागणार आहे. त्यांच्याकडून तिकीट न मिळाल्यास मी अपक्ष निवडणूक लढवन्यावर ठाम असल्याचे शंकर बागडे यांनी सांगितले.
शंकर बागडे यांनी गेल्या सहा महिन्यापासून माळशिरस तालुका अक्षरशः पिंजून काढला आहे. नेतेमंडळी, नातेवाईक, मित्रमंडळी, तसेच गावातील नागरिक यांच्या गाठी भेटी घेऊन मते आजमावीत आहेत.त्यांना माळशिरस तालुक्यातून मोठया प्रमाणावर प्रतिसाद देखील मिळत आहे.त्यामुळे माळशिरस विधानसभा निवडणुकीत चांगलीच चुरस निर्माण झाली आहे.
