माळशिरस विधानसभा मतदारसंघात कोण मारणार बाजी अकलूज (प्रतिनिधी )भारतीय निवडणूक आयोगाने 15ऑक्टोबर रोजी राज्यातील निवडणुकीची तारीख जाहीर केली.29ऑक्टोबर रोजी उमेदवारी अर्ज भरण्याचा शेवटचा दिवस आहे. तर 30तारखेला अर्जाची छाननी होणार आहे. 4नोव्हेंबर रोजी अर्ज मागे घेता येणार आहे. तसेच 20नोव्हेंबर रोजी संपूर्ण राज्यात एकाच टप्यात मतदान होणार असून, 23रोजी मतमोजणी होणार आहे.
राज्यातील जवळपास सर्वच पक्षांनी आपापल्या जागावाटपाची तयारी सुरू केली आहे. त्यातच माळशिरस विधानसभा मतदारसंघ पुन्हा एकदा चर्चेत आला आहे.2024च्या निवडणुकीत माळशिरसमध्ये माळशिरस विधानसभा मतदारसंघाचे विद्यमान आमदार राम सातपुते आणि मागील निवडणुकीतील त्यांचे प्रतिस्पर्धी आणि राष्ट्रवादी काँग्रेस पक्षाचे उमेदवार उत्तम जानकर यांच्यातच लढत होण्याची शक्यता निर्माण झाली आहे.
2019 मध्ये झालेल्या मागील विधानसभा निवडणुकीत राम सातपुते यांनी तत्कालीन संयुक्त राष्ट्रवादी काँग्रेस पक्षाच्या उत्तम जानकर यांचा 2,590 मतांनी पराभव केला होता.मात्र, त्यावेळी मूळचे बीड जिल्ह्यातील सातपुते यांनी मोहिते पाटील कुटुंबीयांच्या पाठिंब्यामुळे विजय संपादन केला. त्यावेळी मोहिते पाटील कुटुंब भाजपमध्ये होते. मात्र,खासदार धैर्यशील मोहिते पाटील यांच्यामुळे विधानसभा मतदारसंघातील राजकीय समीकरणे बदलली असून जवळपास संपूर्ण मोहिते पाटील कुटुंबीय आता राष्ट्रवादी काँग्रेस पक्षात दाखल झाले आहेत. त्यामुळे माळशिरसमध्ये राम सातपुते यांच्यापुढे आणि त्यानंतर भाजपसमोर तगडे आव्हान उभे ठाकले आहे.
महायुती किंवा महाविकास आघाडी युतीमध्ये नेमकी जागावाटप अद्याप निश्चित झाले नसले तरी या दोन जागा भाजप महायुतीकडून आणि राष्ट्रवादी काँग्रेस (एसपी) महाविकास आघाडी आघाडीकडून लढवतील अशी अपेक्षा आहे. वास्तविक पाहता हे दोन्ही पक्ष नवा उमेदवार देतील असे वाटत नाही. कारण दोन्ही पक्षाकडून ही निवडणूक जिंकणे महत्वाचे आहे. त्यामुळे दोन्ही पक्षाकडून जोरदार मोर्चे बांधणी सुरु आहे.
दरम्यान, लोकसभा निवडणुकीच्या प्रचाराच्या वेळी विद्यमान आमदार राम सातपुते यांनी सत्ताधाऱ्यांनी 70वर्षात जेव्हढा विकास केला नाही. तेव्हढा मी पाच वर्षात केला असे सांगितले.त्यावर धैर्यशील मोहिते पाटील यांनी राम सातपुते यांना इशारा देत पार्सल बीडला पाठवण्याचे आव्हान दिले. दरम्यान अद्याप कोणत्याही पक्षाकडून अधिकृत उमेदवारी जाहीर करण्यात आलेली नाही. येत्या एक दोन दिवसात उमेदवारी जाहीर करण्यात येईल. अशी शक्यता वर्तविली जात आहे.
त्यामुळे एकेकाळचे जुने प्रतिस्पर्धी मोहिते पाटील आणि जानकर यांनी एकत्रितपणे मोहिते पाटील कुटुंबाचा एकहाती बालेकिल्ला असलेला हा मतदारसंघ भाजपकडून बळकावण्याची तयारी केली आहे.दरम्यान दोन्हीही पक्षाकडून आपणच ही निवडणूक जिंकणार असा दावा केला जात आहे.
त्यामुळे माळशिरस विधानसभा मतदार संघात 2024ला कोण आमदार होणार याबाबत उत्सुकता शिगेला पोहचली आहे.
