२०१९ ला एक खासदार , एक आमदार दिला तरीही आम्ही गद्दार : धैर्यशील मोहिते पाटील
अकलूज / प्रतिनीधी –
२०१९ ला कोणताही स्वार्थ न ठेवता आम्ही पंधरा दिवसात एक खासदार दिला , एका रात्रीत एक आमदार दिला , जिल्हा परिषद दिली , तीन नगरपालिका दिल्या तरीही आम्ही गद्दार कसे ? असा प्रश्न माढा लोकसभेचे राष्ट्रवादी कॉंग्रेस शरदचंद्र पवार पक्षाचे उमेदवार धैर्यशील मोहिते पाटील यांनी उपस्थित केला .
माढा लोकसभा मतदारसंघाचा तीन वेळा झंझावती प्रचार दौरा केल्यानंतर मोहिते पाटील बोलताना म्हणाले , नेते कुठेही असू द्यात , आज जनता आमच्या पाठीशी आहे आणि जनतेनेच ही निवडणुक हातात घेतली आहे . आमचा विजय निश्चित आहे . २०१९ ला पश्चिम महाराष्ट्रासह मराठवाड्यातील सहा जिल्हे व ३१ दुष्काळी तालुक्यातील शेतीला कृष्णा – भीमा स्थिरीकरणाच्या माध्यमातून पाणी मिळावे यासाठी आम्ही भाजपात प्रवेश केला . यामध्ये आमचा कोणताही वैयक्तीक स्वार्थ नव्हता .
पक्षाने लोकसभेला दिलेल्या उमेदवाराला एक लाख १६ हजार मतांचे मताधिक्य देवून विजयी केले . अटीतटीच्या लढतीत एका रात्रीत नवख्या सातपुतेंना आमदार केले . जिल्हा परिषदेत भाजपाची सत्ता आणली . तीन नगरपालिका व माळशिरस पंचायत समितीत भाजपाची सत्ता आणली . तरीही आम्ही गद्दार कसे ? ज्यांना खासदार म्हणून निवडून दिले त्यांना त्यांच्या तालुक्यात एक ग्रामपंचायत सुध्दा आणता आली नाही आणि माढा लोकसभेतील नगरपालिकांच्या निवडणुकीसाठी साधा उमेदवारही मिळाला नाही .
तरीही ते निष्ठावंत आणि आम्ही गद्दार ? वारे न्याय . नीरा – देवधर धरणाविषयी बोलताना मोहिते पाटील म्हणाले , या धरणासाठी विजयदादा व रामराजेंनी १९८४ पासून प्रयत्न केले. जमिनीचे अधिग्रहण करुन घेतले . मध्यंतरी १५ – २० वर्षे विदर्भाचा अनुशेष भरुन काढण्यासाठी राज्यपाल महोदयांनी पश्चिम महाराष्ट्रातील योजनांना स्टे दिला . त्यामुळे निधी मिळाला नाही म्हणून ही योजना रखडली . आता हा स्टे उठला आहे . नीधी आला आहे . त्यामुळे नीरा – देवधर योजना सुरु झाली . पवार साहेब , विजयदादा , रामराजे यांनी कधी श्रेयासाठी काम केले नाही .
परंतु अलिकडे काम न करता पाणीदार , जलनायक अशा बिरुदावली लावून फिरणारे वाढले आहेत असे म्हणत खासदार नाईक निंबाळकर व आ गोरे यांच्यावर त्यांनी जोरदार टीका केली .
लोणंद – पंढरपूर रेल्वेचा प्रश्न सोडविला म्हणणा-या खासदारांनी पुणे – फलटण रेल्वेच्या गेटवर साधा गेटमन नेमला नाही . रेल्वेचा ड्रायव्हरच गेट उघडतो व बंद करतो अशी सध्या शोकांतीका आहे असे सांगून केंद्राच्या अनेक योजना आहेत . त्यातीलच एक अंध – अपंग लोकांसाठी योजना होती . आपण माळशिरस तालुक्यात १०० टक्के ती यशस्वी केली . लोकांना लाभ मिळवून दिला .
परंतु सातारा जिल्ह्यात खासदारांना योजनाच माहित झाली नाही . प्रशासनाने ती राबविल्यावर यांना कळले . हे आज खालच्या पातळीवर जावून आमच्यावर टीका करतात . आम्हालाही जशास तसे उत्तर देता येते .
परंतु आमच्या घरावर सहकार महर्षीचे संस्कार आहेत . पवार साहेब व विजयदादांनी सांगितले आहे की आपण पातळी सोडून बोलायचे नाही म्हणून आम्ही गप्प आहे . जनता आता दुधखुळी राहिली नाही .
येत्या सात तारखेला मतदानाच्या माध्यमातून ती माढा लोकसभेत नक्कीच परिवर्तन घडवेल असा विश्वासही त्यांनी व्यक्त केला .
