नगरपरिषदेच्या अनागोंदी कारभारामुळे अकलूजकर हैराण.
अकलूज : (प्रतिनिधी )ठिकठिकाणी कचऱ्याचे ढीग, गटारीचे पाणी रस्त्यावर, थोडा पाऊस पडला तरी रस्त्याचे नाल्यात रूपांतर, रस्त्यात खड्डे तर चांगल्या रस्त्यावर मुरमाचे ढीग, विजेचा लपंडाव, पिण्याच्या पाण्याचे दुर्भिक्ष, मात्र मालमत्ता कर व इतर कर व्याजासह वसूल करण्याचा दणका हे सुमारे 45 दिवस उपोषण करून मिळवलेल्या नगर परिषदेचे फलित असून,आता नगरपरिषदेबाबत भीक नको, कुत्रा आवर अशी अवस्था झाली आहे.
अकलूज ग्रामपंचायतीला पायाभूत सुविधा उपलब्ध करून देण्यासाठी निधीची कमतरता भासत असून ती दूर करण्यासाठी नगरपरिषद हवी. नगरपरिषद आल्यावर स्वच्छ अकलूज आणखी स्वच्छ होईल, शौचालयाची विशेषतः महिलांसाठीच्या शौचालयाची सोय होईल, सांडपाण्याची चांगली व्यवस्था होईल, पिण्याचे भरपूर पाणी मिळेल, पथदिवे वाढतील, महावितरणकडून 24 तास लाईट मिळेल, रस्त्यावरील खड्डे बुजतील आणि या सर्व सुविधा मिळताना कोणतीही करवाढ होणार नाही अशी अपेक्षा होती.
परंतु प्रत्यक्षात मात्र उलटेच झाले. सुमारे 45 दिवस चक्री उपोषण करून शासन दरबारी विविध मार्गाने जाऊन नगरपरिषद मिळविली मात्र नगरपरिषद मिळून दोन वर्षे झाली तरी ना कोणती वाढीव सुविधा मिळाली ना मिळण्याची आशा वाटते.
ग्रामपंचायत असताना सुंदर व स्वच्छ अकलूज, पिण्याच्या पाण्याचे योग्य नियोजन, व्यवस्थित चालू असलेले पथदिवे, सीसीटीव्ही हे अकलूजकरांना भूषणावह होते. नगरपरिषद आल्यानंतर शासन आदेशानुसार त्यांनी कचराकुंड्या काढून टाकल्या आणि काही लाख खर्चून घंटागाड्यांची संख्या वाढवली. परंतु रस्त्या रस्त्यावर कचऱ्याचे ढीग तसेच पडलेले आहेत. पिण्याच्या पाण्याचे सुयोग्य नियोजन होत नाही, पथदिव्यांची संख्या वाढवली परंतु ते चालू असतातच असे नाही, सीसीटीव्ही आहेत त्यात कुठलीही प्रकारची सुधारणा नाही, सांडपाण्यांच्या व्यवस्थेसाठी नको असलेल्या ठिकाणी गटारी करण्यात आल्या.
गेल्या काही वर्षातील सर्वात कमी पाऊस पडूनही अनेक ठिकाणी तळे साचत आहे, रस्त्याला नाल्याचे रूप येत आहे. रस्त्यावरील छोटे खड्डे बुजवण्यासाठी मुरूम टाकण्यात आला. यातही काही ठिकाणी चांगल्या रस्त्यावर टाकलेल्या मुरमामुळे खड्ड्यांची संख्या वाढली.
नगरपरिषद आल्यावर पुरुषांच्या शौचालयाबरोबर महिलांच्या शौचालयाची ही सोय होईल अशी माफक अपेक्षा होती परंतु गेल्या दोन वर्षात महिलांसाठीचे एकही शौचालय उभारण्यात आलेले नाही.रस्त्यावरील वाहतूक, पार्किंग, वाहनतळ तसेच अग्निशामक दल उभारले जाईल अशीही अपेक्षा होती. परंतु मुख्याधिकाऱ्यांना फिरण्यासाठी गाडी घेण्यात आली मात्र अग्निशामन दलासाठी त्यांच्याकडे निधी नसल्याचे सांगितले जात आहे.
त्याचप्रमाणे अकलूज परिसरात ठिकठिकाणी अतिक्रमण आहे. परंतु या गोष्टीकडे मात्र कोणाचेच लक्ष नाही.एवढ्या सर्व असुविधा असूनही मालमत्ता कर, पाणीपट्टी गाळाभाडे आदींच्या दरवाढीची टांगती तलवारीने नागरिक भयग्रस्त आहेत.
वास्तविक थकित मालमत्ता कर, पाणी पट्टी,गाळाभाडे यावर कोणतेही व्याज महानगरपालिकाही लावत नाही. मात्र अकलूज नगर परिषदेने मालमत्ता कर, पाणीपट्टी, गाळा भाडं हे व्याजासह वसूल करण्याचा दणका लावला. प्लास्टिक बंदीसह आणखी काही निर्बंधबाबतचा कायदा दाखवत व्यापाऱ्यांची कुचेष्टा केली जात आहे.
माळशिरस तालुक्यात सध्या माळशिरस, नातेपुते, महाळुंग येथे नगरपंचायत तर अकलूज येथे नगरपरिषद आहे. मात्र इतर ठिकाणी वेगळे नियम आणि अकलूज साठी मात्र भलतेच नियम. त्यामुळे नागरिकांमध्ये संभ्रम निर्माण झाला आहे
.त्यामुळे अकलूज नगरपरिषद झाल्याने अकलूज मधील नागरिकांना नेमका काय फायदा झाला. याबाबत नागरिकांमधून तर्क -वितर्क लढविले जात आहेत.
