*डॉ.बाबासाहेब आंबेडकर जयंती निमित्त भीमरत्न सन्मान पुरस्कार वितरण सोहळा दिमाखात संपन्न.*
संग्रामनगर दि.१५ (संजय लोहकरे यांजकडून)अकलूज विश्वरत्न,भारतरत्न डॉ.बाबासाहेब आंबेडकर यांच्या १३२ व्या जयंतीनिमित्त भीमरत्न युवा मंच समतानगर-अकलूज, समतानगर मित्र परिवार ग्रुप, व टाइम्स ९ मराठी न्यूज चॅनल यांच्या संयुक्त विद्यमाने विविध क्षेत्रात उल्लेखनीय सेवा बजावत असलेल्या मान्यवरांचा सन्मान सोहळा समतानगर अकलूज येथे संपन्न झाला.कायदा,सुरक्षा व शांतता सेवा,नागरी ग्रामविकास सेवा,पत्रकारिता सेवा,आरोग्य सेवा,शैक्षणिक,समाजिक आदी क्षेत्रामध्ये उल्लेखनीय कार्य करणाऱ्या मान्यवरांचा आदर्श अधिकारी,आदर्श पत्रकार,आदर्श डॉक्टर,आदर्श पालक,आदर्श शिक्षक,आदर्श आरोग्य सेविका, अशा व इतर समाजात विविध क्षेत्रात उल्लेखनीय कार्य करणाऱ्या मान्यवरांचा सत्कार डॉ.बाबासाहेब आंबेडकर यांचे जयंतीनिमित्त भीमरत्न सन्मान पुरस्कार देऊन गौरविण्यात आले. या कार्यक्रमाचे प्रमुख पाहुणे उपविभागीय पोलीस अधिकारी डॉ.बसवराज शिवपुजे,अकलूज नगरपरिषदेचे मुख्याधिकारी दयानंद गोरे,सर्वज्येष्ठ पत्रकार भाग्यवंत लक्ष्मण नायकुडे यांच्या हस्ते सन्मानपत्र देऊन मान्यवरांना सन्मानित करण्यात आले. या कार्यक्रमात अकलूज येथील उपविभागीय पोलीस अधिकारी डॉ. बसवराज शिवपुजे, अकलूज नगरपरिषदेचे मुख्याधिकारी दयानंद गोरे, अकलूज पोलीस स्टेशनचे पोलीस उपनिरीक्षक सुनील जाधव, सर्व ज्येष्ठ पत्रकार व आद्य रजिस्टर्ड माळशिरस तालुका मराठी पत्रकार संघाचे संस्थापक अध्यक्ष भाग्यवंत लक्ष्मण नायकुडे (संस्थापक संपादक अकलूज वैभव),वृत्त एकसत्ताचे कार्यकारी संपादक सुनील ज्ञानेश्वर कांबळे, टाइम्स ९ मराठी न्यूज चॅनलचे संपादक नौशाद मुलाणी,ज्येष्ठ पत्रकार हुसेन तुराब मुलाणी, अकलूज नगरपरिषदेचे प्रभारी अधीक्षक सुनील काशीद,प्रेस फोटोग्राफर व पत्रकार संजय शरद लोहकरे डॉ.श्रीकांत देवडीकर,डॉ.अनिल बळते, डॉ.पताळे इत्यादींसह मान्यवरांना सन्मानित करण्यात आले. यावेळी मार्गदर्शन करताना डॉ.बसवराज शिवपुजे म्हणाले की,भिमरत्न युवा मंच समतानगर अकलूज यांनी विश्वरत्न डॉ.बाबासाहेब आंबेडकर यांच्या १३२ व्या जयंतीनिमित्त भिमरत्न सन्मान सोहळा, वृक्षारोपण, मुलांना शालेय वस्तूंचे वाटप, जिलेबी वाटप,परिसर स्वच्छता मोहीम इत्यादी विविध उपक्रम राबवून समाजापुढे एक आदर्श निर्माण केला आहे.त्याचबरोबर विविध क्षेत्रात उल्लेखनीय कामगिरी करीत असलेल्या मान्यवरांना सन्मानित करून प्रोत्साहन देण्याचे उल्लेखनीय कार्य भीमरत्न युवा मंच समतानगर अकलूजने आज केलेले आहे. भिमरत्न युवा मंचचे अध्यक्ष प्रेम नवगिरे व उपाध्यक्ष राहुल कुलकर्णी यांचे सह मंचच्या सर्व सदस्यांनी तसेच समतानगर मित्र परिवार ग्रुपच्या सदस्यांनी कार्यक्रम यशस्वी करण्यासाठी परिश्रम घेतले.
