*शिवरत्न नॉलेज सिटी मध्ये युवा सशक्तीकरणाबाबत व्याख्यान*
अकलूज: धैर्यशील मोहिते-पाटील व शितलादेवी मोहिते पाटील यांच्या मार्गदर्शनाखाली शिवरत्न शिक्षण संस्था संचलित येथील शिवरत्न इन्स्टिट्यूट ऑफ मॅनेजमेंट स्टडीज, ग्रीन फिंगर्स कॉलेज ऑफ कम्प्युटर टेक्नोलॉजी व विजयसिंह मोहिते पाटील नर्सिंग काॅलेज अँड रिसर्च इन्स्टिट्यूट यांच्या संयुक्त विद्यमाने सोलापूर येथील गुरु फाॅर लाइफ फाउंडेशनचे अध्यक्ष व प्रसिद्ध उद्योजक निंगराज विंचुरे यांचे युवा सशक्तीकरण या विषयावर व्याख्यान आयोजित करण्यात आले होते. यावेळी कार्यक्रमाचे अध्यक्ष म्हणून मॅनेजमेंट कॉलेजचे प्राचार्य डॉ. अरविंद कुंभार उपस्थित होते. यशस्वी उद्योजक बनून जीवन समृद्ध करण्यासाठी जिद्दीने कष्ट करणे व नियोजनबद्ध जीवनशैलीचा अवलंब करणे तसेच वर्तमान परिस्थितीची माहिती मिळवून त्याचा पुरेपूर उपयोग करून घेणे याशिवाय गत्यंतर नाही असे प्रतिपादन विंचुरे यांनी आपल्या व्याख्यानातून केले. यावेळी त्यांनी त्यांच्या यशस्वी जीवनातील अनेक किस्से विद्यार्थ्यांसमोर विषद केले. सध्या डिजिटल युग असून युवकांपुढे अनेक सुविधा सहजपणे उपलब्ध होत आहेत. या सुविधांचा योग्य व अचूक वापर करत त्यांनी आपल्या जीवनाचे ध्येय साध्य करावे . वाचन आणि लेखनाकडे दुर्लक्ष न करता व्यासंगी बनून एक परिपूर्ण व्यक्ती म्हणून वावरावे असे अध्यक्षीय स्थानावरून बोलताना आपले मत डॉ. कुंभार यांनी व्यक्त केले. यावेळी सोलापूर येथील पुण्यश्लोक अहिल्यादेवी होळकर सोलापूर विद्यापीठातील सेवक शंकर स्वामी, सौरभ व वेणुगोपाल तसेच ग्रीन फिंगर काॅलेजचे उपप्राचार्य डॉ. महेश ढेंबरे व ग्रंथपाल डॉ. संदीप लोखंडे हे उपस्थित होते. सदर कार्यक्रमात मॅनेजमेंट, नर्सिंग व ग्रीनफिंगर कंप्युटर टेक्नॉलॉजी या महाविद्यालयातील विद्यार्थी- विद्यार्थ्यांनी बहुसंख्येने सहभागी झाले होते. व्याख्यानांती विद्यार्थी व तज्ञ यांच्यात युवा सशक्तीकरण या विषयावर चर्चा झाली. कार्यक्रमाचे सूत्रसंचालन प्रा. धनश्री हातोळकर यांनी केले व आभार प्रा. वसीम सय्यद यांनी केले.
~~ शिवरत्न नाॅलेज सिटीतील विविध शाखेत शिक्षण घेण्यासाठी प्रवेश घेतलेल्या सर्व विद्यार्थ्यांसाठी संस्था नेहमी विविध क्षेत्रातील तज्ञांना बोलावून घेऊन त्यांचा अनुभव विद्यार्थ्यांपर्यंत पोहोचविण्याचे काम करते. याचा उपयोग विद्यार्थ्यांना नक्कीच होतो. – धैर्यशील मोहिते-पाटील अध्यक्ष, शिवरत्न शिक्षण संस्था शंकरनगर – अकलूज
