*उद्धव ठाकरे आणि एकनाथ शिंदे लवकरच भेटणार?*
मुंबई : राज्यात महाविकास आघाडीचं सरकार कोसळल्यानंर शिंदे-फडणवीस सरकार सत्तेत आलं. शिवसेनेचे एकनाथ शिंदे यांनी बंड करून फडणवीस यांच्याशी हात मिळवणी करत सत्ता स्थापन केली. त्यानंतर शिवसेनेमध्ये दोन गट पडल्याचे पाहायला मिळाले. अशी परिस्थिती असतानाच आता शिवसेनेच्या नेत्या दीपाली सय्यद यांच्या ट्वीटमुळं चर्चांना उधाण आलं आहे. शिवसेनेच्या नेत्या दीपाली सय्यद यांनी ट्वीट करत म्हटलं की, येत्या दोन दिवसात उद्धव ठाकरे आणि एकनाथ शिंदे हे शिवसैनिकांच्या भावनांचा आदर करुन पहिल्यांदा चर्चा करायला एकत्र येणार हे समजल्यावर खूप बरं वाटलं. शिंदे साहेबांनी शिवसैनिकांची तळमळ समजली आणि उद्धव साहेबांनी कुटुंबप्रमुखांची भूमिका मोठ्या मनाने निभावली हे स्पष्ट झाले आहे. या मध्यस्तीकरता भाजप नेत्यांनी मदत केली याबाबत धन्यवाद, चर्चेच्या ठिकाणाची प्रतीक्षा असेल, असं त्यांनी ट्वीटमध्ये म्हटलं आहे. दरम्यान, शिवसेनेच्या नेत्या दीपाली सय्यद यांच्या या ट्वीटमुळे राजकीय वर्तुळात चर्चा रंगली आहे. तर उद्धव ठाकरे आणि मुख्यमंत्री एकनाथ शिंदे यांची भेट होणार का? जर होणार असेल तर नेमकं कुठे आणि कधी होणार? असे अनेक प्रश्न आता राजकीय वर्तुळात उपस्थित केले जात आहेत
