अकलूजमध्ये मनोज जरांगे पाटलांचा सरकारला इशारा; पुढील आंदोलन ‘वर्षा’ बंगल्यावर
अकलूज : (प्रतिनिधी )“मी संपूर्ण महाराष्ट्राचा दौरा पूर्ण केला असून, सरकारच्या कोणत्याही आश्वासनावर जगत नाही. हैदराबाद, औंध आणि सातारा गॅझेटची तातडीने अंमलबजावणी करून मराठा समाजाला हक्क द्यावा,” अशी मागणी मराठा आरक्षण आंदोलनाचे नेते मनोज जरांगे पाटील यांनी केली.
मराठ्यांची कुणबी प्रमाणपत्रे अडवून त्यांना वेठीस धरले जात असल्याचा आरोपही त्यांनी केला
.अकलूज येथे आयोजित पत्रकार परिषदेत जरांगे पाटील यांनी राज्य सरकारसह भाजप प्रदेशाध्यक्ष चंद्रशेखर बावनकुळे आणि आमदार संजय शिरसाट यांच्यावर जोरदार टीका केली.
“भावाला व्हॅलिडिटी द्यायची आणि बहिणीची रद्द करायची, ही कोणती शासकीय प्रक्रिया आहे?” असा सवाल त्यांनी उपस्थित केला.
बावनकुळे, शिरसाटांवर गंभीर आरोप
मराठ्यांच्या जात पडताळणी प्रक्रियेत हस्तक्षेप करण्यासाठी बावनकुळे यांनी अधिकाऱ्यांना पत्रे दिल्याचा आरोप जरांगे पाटील यांनी केला. “मराठा समाजाचे वाटोळे बावनकुळे आणि संजय शिरसाट यांनी केले आहे. या दोघांनी समाजावर अन्याय करून पाप केले असून, त्याची परतफेड त्यांना करावी लागेल,” असे ते म्हणाले.
“बावनकुळेंमुळे देवेंद्र फडणवीस आणि शिरसाटांमुळे मुख्यमंत्री एकनाथ शिंदे अडचणीत आले आहेत.
सरकार ५८ लाख कुणबी प्रमाणपत्रे मराठ्यांना न देण्याच्या तयारीत आहे,” असा दावाही त्यांनी केला.
पुढील आंदोलन ‘वर्षा’वर
मराठा समाजाच्या मागण्यांबाबत सरकारने अडवणूक सुरूच ठेवली तर पुढील आंदोलन थेट मुख्यमंत्री निवासस्थान ‘वर्षा’ बंगल्यावर करण्यात येईल, असा इशारा जरांगे पाटील यांनी दिला.
“मी राज्यातील कोणत्याही एका भागासाठी लढत नसून संपूर्ण महाराष्ट्रातील मराठ्यांसाठी लढत आहे,” असे त्यांनी स्पष्ट केले.
मराठा नेत्यांना इशारा
सर्व पक्षांतील मराठा नेत्यांनी ताकदीने समाजाची बाजू मांडावी, असे आवाहन करत जरांगे पाटील यांनी नेत्यांना इशाराही दिला. “मराठा समाज तुमच्यापासून बाजूला गेला, तर तुमचा बाजार उठला म्हणून समजा,” असे ते म्हणाले.
विविध समाजांमध्ये सरकारविरोधात असंतोष असल्याचा दावा
राज्यातील शेतकरी, आदिवासी, दलित, मुस्लिम आणि धनगर समाजात सरकारविरोधात मोठा असंतोष असल्याचा दावा त्यांनी केला. “सरकारचा अहंकार जनता उतरवेल,” असेही ते म्हणाले.
गावखेड्यांमध्ये मराठा, धनगर, दलित, मुस्लिम आणि आदिवासी समाजांमध्ये कोणताही जातीय वाद नसून राजकारणीच वाद असल्याच्या अफवा पसरवत असल्याचे जरांगे पाटील यांनी सांगितले.
धनगर समाजाबाबत सकारात्मक भूमिका
“मला आजही गोरगरीब धनगरांची माया वाटते. मी कधीही धनगर समाजावर टीका केलेली नाही,” असे सांगत धनगर नेत्यांनी राजकारण बाजूला ठेवून समाजाच्या हितासाठी काम करावे, असे आवाहन त्यांनी केले
.छत्रपतींच्या गादीचा सन्मान करणे कर्तव्य
छत्रपतींच्या गादीचा सन्मान करणे हे आपले कर्तव्य असल्याचे सांगत कोल्हापूरच्या छत्रपतींनी कोणती राजकीय भूमिका घ्यावी हा त्यांचा प्रश्न असल्याचे जरांगे पाटील म्हणाले.
मात्र, त्यांनी मराठा समाजासाठी काम करावे, अशी अपेक्षाही त्यांनी व्यक्त केली.
दरम्यान, कुणबी प्रमाणपत्रे रद्द होतील किंवा मराठा आरक्षण टिकणार नाही, असे गैरसमज पसरवून आपली बदनामी करण्याचा प्रयत्न सरकारमधील काही लोकांकडून होत असल्याचा आरोपही जरांगे पाटील यांनी केला.
