अकलूजमध्ये ‘आयुष्मान’च्या नावाखाली लूट? दोन दिवसांचा रुग्ण, सात दिवसांचे बिल; प्रशासन झोपेतच! ग अकलूजमधील खासगी रुग्णालयांच्या कारभाराची चौकशी करण्याची जोरदार मागणी
अकलूज :(प्रतिनिधी )माळशिरस तालुक्याची वैद्यकीय राजधानी म्हणून ओळखल्या जाणाऱ्या अकलूजमध्ये गरीब आणि सर्वसामान्य रुग्णांसाठी असलेल्या आयुष्मान भारत योजनेच्या अंमलबजावणीवरच गंभीर प्रश्नचिन्ह निर्माण झाले आहे.
काही खासगी रुग्णालयांमध्ये या योजनेच्या नावाखाली कथित गैरप्रकार सुरू असल्याच्या तक्रारी समोर येत असून, प्रशासनाच्या भूमिकेवरही प्रश्न उपस्थित होत आहेत.
अकलूजमध्ये तालुक्यातील सर्वाधिक खासगी दवाखाने आणि रुग्णालये आहेत. अनेक डॉक्टर व रुग्णालये प्रामाणिकपणे रुग्णसेवा करत आहेत.
मात्र, काही ठिकाणी शासकीय आरोग्य योजनांचा गैरफायदा घेतला जात असल्याच्या तक्रारींमुळे संपूर्ण आरोग्य व्यवस्थेची विश्वासार्हता धोक्यात आली आहे.दोन-तीन दिवस रुग्णालयात, कागदावर सहा-सात दिवस!सर्वात गंभीर आरोप म्हणजे, काही रुग्णांना आयुष्मान भारत योजनेअंतर्गत रुग्णालयात दाखल करून घेतल्यानंतर प्रत्यक्षात दोन ते तीन दिवस उपचार करून कागदोपत्री सहा ते सात दिवसांचा कालावधी दाखवून बिल सादर केले जात असल्याची चर्चा आहे.
जर हा प्रकार खरा असेल, तर हा केवळ कागदोपत्री गैरप्रकार नसून सरकारच्या पैशांवर आणि गरीब रुग्णांच्या हक्कावर डल्ला मारण्याचा गंभीर प्रकार ठरू शकतो.
मग प्रश्न असा आहे की—रुग्ण प्रत्यक्ष किती दिवस रुग्णालयात होता?रुग्णालयाच्या रेकॉर्डवर किती दिवस दाखवण्यात आले?सरकारकडून किती दिवसांचे पैसे घेतले गेले?आणि या संपूर्ण प्रक्रियेत रुग्णाच्या नावाचा वापर नेमका कशासाठी झाला?या प्रश्नांची उत्तरे आता प्रशासनाने देणे गरजेचे आहे
.योजनेत बसवण्यासाठीही पैसे?याहून गंभीर बाब म्हणजे, विविध शासकीय आरोग्य योजनांचा लाभ मिळवून देण्यासाठी रुग्णांच्या नातेवाईकांकडून अतिरिक्त पैशांची मागणी केली जात असल्याच्या तक्रारी असल्याचे सांगितले जात आहे.
गरीब रुग्णांच्या उपचाराचा खर्च शासनाने उचलावा, यासाठी योजना सुरू करण्यात आली. मग याच योजनेचा लाभ मिळवून देण्यासाठी रुग्णांच्या नातेवाईकांकडून पैसे मागितले जात असतील, तर हा प्रकार कोणाच्या आशीर्वादाने सुरू आहे?योजनेचा लाभ मोफत असताना ‘अतिरिक्त खर्च’ कशासाठी?आरोग्य विभाग कारवाई करणार की केवळ कागदोपत्री चौकशी?अकलूजमधील या तक्रारी केवळ चर्चेपुरत्या मर्यादित न ठेवता आयुष्मान भारत योजनेअंतर्गत मागील काही वर्षांत करण्यात आलेल्या दाव्यांचे स्वतंत्र ऑडिट करण्यात यावे, अशी मागणी आता जोर धरत आहे.
प्रशासनाने प्रत्येक रुग्णाच्या—प्रत्यक्ष दाखल व डिस्चार्ज तारखा,उपचाराची नोंद,रुग्णालयातील उपस्थिती,मेडिकल रेकॉर्ड,केलेल्या तपासण्या,औषधोपचार,योजनेअंतर्गत सादर केलेले बिल,शासनाकडून मंजूर झालेली रक्कमयांची तपासणी करावी.त्याचबरोबर संबंधित रुग्ण व त्यांच्या नातेवाईकांचे जबाब नोंदवून त्यांच्याकडून कोणतेही अतिरिक्त पैसे घेतले गेले का, याचीही चौकशी करणे आवश्यक आहे.
दोषी कोण असेल तर कारवाई करा; पण प्रामाणिक डॉक्टरांना बदनाम करू नका!या प्रकरणात आणखी एक महत्त्वाची बाब म्हणजे, काही जणांच्या कथित गैरप्रकारामुळे प्रामाणिकपणे रुग्णसेवा करणाऱ्या डॉक्टरांची बदनामी होऊ नये.
त्यामुळे प्रशासनाने राजकीय दबाव, वैयक्तिक संबंध किंवा कोणत्याही प्रकारचा हस्तक्षेप न स्वीकारता निष्पक्ष चौकशी करावी.आरोप खोटे असतील तर तेही जनतेसमोर स्पष्ट करा आणि आरोप खरे असतील तर दोषींवर कठोर कारवाई करा.
कारण हा प्रश्न एखाद्या रुग्णालयाचा किंवा एखाद्या डॉक्टरचा नाही.हा प्रश्न आहे गरीब रुग्णांच्या हक्काचा आणि शासनाच्या पैशांचा!आयुष्मान भारतसारख्या योजनेचा उद्देश गरीब व गरजू नागरिकांना आर्थिक अडचणींशिवाय उपचार मिळवून देणे हा आहे
. या योजनेच्या नावाखाली जर कुठे रुग्णांची फसवणूक, खोटी बिलिंग किंवा अतिरिक्त पैशांची मागणी होत असेल, तर अशा प्रकारांना वेळीच लगाम घालणे आवश्यक आहे.
अकलूजमधील आयुष्मान भारत योजनेच्या सर्व दाव्यांची तपासणी कधी होणार?संशयास्पद बिलांचे ऑडिट कधी होणार?रुग्णांच्या तक्रारी कोण ऐकणार?आणि दोषी आढळल्यास कारवाई कोण करणार?या प्रश्नांची उत्तरे आता माळशिरस तालुक्यातील नागरिकांना हवी आहेत.
प्रशासनाने तातडीने चौकशी करून सत्य जनतेसमोर आणावे; अन्यथा ‘गरीबांच्या योजनेतही गैरप्रकार करणाऱ्यांना कोणाचा वरदहस्त?’ हा प्रश्न अधिक तीव्र होणार आहे.
