*शासनाचे कोट्यवधी रुपये खर्चूनही 61 फाटा कॅनॉलचे अस्तरीकरण वादाच्या भोवऱ्यात* *माळशिरस परिसरातील नागरिकांमध्ये संताप; कामाच्या गुणवत्तेवर गंभीर प्रश्नचिन्ह* *क्रमशः भाग -1*
माळशिरस (प्रतिनिधी )माळशिरस पाटबंधारे उपविभाग यांच्या वतीने करण्यात आलेल्या 61 फाटा कॅनॉलच्या अस्तरीकरणाच्या कामावर आता गंभीर प्रश्न उपस्थित होऊ लागले आहेत.
नीरा उजवा कालवा विभाग फलटण अंतर्गत करण्यात आलेल्या या कामासाठी शासनाच्या कोट्यवधी रुपयांचा निधी खर्च करण्यात आला असला, तरी प्रत्यक्षात कामाचा दर्जा अत्यंत निकृष्ट असल्याचा आरोप परिसरातील शेतकरी व नागरिकांकडून केला जात आहे.नुकतेच पूर्ण झाल्याचे सांगितल्या जाणाऱ्या या अस्तरीकरणाच्या कामामध्ये अनेक ठिकाणी मोठे तडे गेलेले दिसून येत आहेत.
काही भागांमध्ये काँक्रीटचे थर उखडू लागल्याचेही निदर्शनास आले आहे. विशेष म्हणजे, अनेक ठिकाणी काम अद्याप अर्धवट स्थितीत असून, बांधकाम पूर्णत्वास गेले नसतानाही काम पूर्ण झाल्याची चर्चा सुरू असल्याने नागरिकांमध्ये संशय व्यक्त केला जात आहे.
याशिवाय सर्वात गंभीर बाब म्हणजे, कॅनॉलच्या अस्तरीकरणामध्ये ठिकठिकाणी सायपणासाठी जागा शिल्लक ठेवण्यात आल्याचे स्पष्ट दिसत आहे.
जलसंधारणाच्या दृष्टीने अत्यंत महत्त्वाच्या असलेल्या या प्रकल्पामध्ये जर सुरुवातीपासूनच पाणी गळतीची शक्यता निर्माण होत असेल, तर शासनाचा निधी नेमका कोणाच्या फायद्यासाठी खर्च करण्यात आला, असा संतप्त सवाल शेतकरी उपस्थित करत आहेत.
स्थानिक नागरिकांच्या मते, हे काम सुरू असतानाच अनेक वेळा दर्जाबाबत तक्रारी करण्यात आल्या होत्या. मात्र संबंधित विभागाने त्याकडे दुर्लक्ष केल्याचा आरोपही होत आहे.
काही ठिकाणी काँक्रीटची जाडी कमी असल्याचा तसेच तांत्रिक निकषांचे पालन न झाल्याचा दावा स्थानिकांनी केला आहे.
61 फाटा परिसरातील शेतकरी सांगतात की, कालव्याचे अस्तरीकरण हे पाणी बचतीसाठी आणि शेतीला नियमित पाणीपुरवठा करण्यासाठी महत्त्वाचे असते.
परंतु अशा प्रकारे निकृष्ट दर्जाचे काम झाल्यास भविष्यात मोठ्या प्रमाणात पाणी गळती होऊन शेतकऱ्यांचे नुकसान होऊ शकते.दरम्यान, या प्रकरणाची उच्चस्तरीय चौकशी करून संबंधित ठेकेदार, अभियंते आणि जबाबदार अधिकाऱ्यांवर कारवाई करावी, अशी मागणी आता जोर धरू लागली आहे.
शासनाने कोट्यवधी रुपयांचा खर्च करूनही जर कामाचा दर्जा टिकून राहत नसेल, तर ही बाब अत्यंत गंभीर असल्याचे मत जाणकार व्यक्त करत आहेत. *क्रमशः भाग -1*
#माळशिरस#61फाटाकॅनॉल#कालवाअस्तरीकरण#पाटबंधारेविभाग#नीराउजवाकालवा#फलटण#शासननिधी#निकृष्टकाम#भ्रष्टाचार#शेतकरीप्रश्न#पाणीगळती#महाराष्ट्रन्यूज#माळशिरसबातमी#जनआक्रोश#कॅनॉलकाम#IrrigationScam#CanalLining#MaharashtraNews#WaterManagement
