अकलूजमध्ये ‘विराट हिंदू संमेलन’ उत्साहात पार; पारंपरिक वैभव, भक्तीमय वातावरणात भव्य सोहळा
अकलूज (प्रतिनिधी) – अकलूज नगरीत सोमवार, दि. ३० मार्च २०२६ रोजी पार पडलेले ‘विराट हिंदू संमेलन’ धार्मिक उत्साह, सांस्कृतिक परंपरा आणि सामाजिक एकात्मतेचा संगम घडवणारा ठरला.
सकल हिंदू समाजाच्या वतीने आयोजित या भव्य कार्यक्रमाने उपस्थितांवर अविस्मरणीय ठसा उमटवला.कार्यक्रमासाठी उभारण्यात आलेला सभामंडप पारंपरिक सजावटीने नटलेला होता. सभामंडपात छत्रपती शिवाजी महाराजांच्या मावळ्यांचा देखावा साकारण्यात आला होता, तर शिवरायांची भव्य मूर्ती आणि प्रभू श्रीरामांची आकर्षक प्रतिमा सर्वांचे लक्ष वेधून घेत होती. मशाली, भगवे ध्वज आणि पारंपरिक सजावटीमुळे संपूर्ण परिसरात भक्तीमय आणि उत्साही वातावरण निर्माण झाले होते.
या संमेलनाची सुरुवात गांधी चौकातून काढण्यात आलेल्या भव्य स्वागत मिरवणुकीने झाली. या मिरवणुकीत ह.भ.प. अनिल महाराज देवळेकर आणि श्रीपादतीर्थ स्वामी महाराज यांचे जिप्सीद्वारे स्वागत करण्यात आले. ढोल-ताशे, हलगी वादन आणि जयघोषांच्या गजरात ही मिरवणूक जय शंकर उद्यानापर्यंत अत्यंत उत्साहात पार पडली.जय शंकर उद्यान येथे छत्रपती शिवाजी महाराजांना पुष्पहार अर्पण करून अभिवादन करण्यात आले,
तर धर्मवीर छत्रपती संभाजी महाराजांना हार अर्पण करून कृतज्ञता व्यक्त करण्यात आली. त्यानंतर शिवरायांची पालखी विजय चौकाच्या दिशेने मार्गस्थ झाली.या पालखी सोहळ्यात लहान वारकरी मंडळ, भगवे ध्वज, भजनी मंडळ आणि पारंपरिक वाद्यवृंदाचा सहभाग होता.
“जय जय रघुवीर समर्थ” आणि “शिवाजी महाराज की जय” अशा घोषणांनी वातावरण दुमदुमून गेले होते. विजय चौकात पोहोचल्यावर पालखीचे फुलांच्या वर्षावात भव्य स्वागत करण्यात आले.
अबदागिरी, मशाली आणि भगवे ध्वजांनी सजलेले पालखीचे रूप सर्वांच्या आकर्षणाचे केंद्र ठरले.विजय चौकात आगमनानंतर महिलांनी अनिल महाराज देवळेकर व श्रीपादतीर्थ स्वामी महाराज यांचे पारंपरिक औक्षण करून स्वागत केले. त्यानंतर गाईचे पूजन करण्यात आले. शंखनाद आणि शिवगर्जनेने संपूर्ण परिसर दणाणून गेला, ज्यामुळे उपस्थितांमध्ये उत्साहाची लाट उसळली.
कार्यक्रमाच्या पुढील सत्रात प्रस्तावना सादर करून प्रमुख पाहुण्यांचा परिचय करून देण्यात आला. श्रीपादतीर्थ स्वामी महाराज यांनी आपल्या आशीर्वचनातून धर्म, संस्कार आणि समाजातील एकतेचे महत्त्व अधोरेखित केले. त्यानंतर मनीष बोत्रे यांनी ‘पंच परिवर्तन’ या विषयावर मार्गदर्शन करत समाज परिवर्तनासाठी आवश्यक मूल्यांवर प्रकाश टाकला.
याच प्रसंगी ‘संघ शताब्दी विशेषांक’ या पुस्तकाचे मान्यवरांच्या हस्ते प्रकाशन करण्यात आले. हिंदू इतिहास आणि संस्कृतीचा प्रसार व्हावा या उद्देशाने पुस्तक विक्री स्टॉलही उपलब्ध करून देण्यात आला होता.कार्यक्रमात ह.भ.प. अनिल महाराज देवळेकर यांनी ‘हिंदू समाज प्रबोधन’ या विषयावर प्रभावी आणि ओजस्वी व्याख्यान दिले. त्यांनी आपल्या भाषणातून एकता, संस्कार, राष्ट्रभक्ती आणि धर्मजागृतीचा संदेश देत उपस्थितांना प्रेरित केले.या संमेलनाला विविध क्षेत्रातील मान्यवरांची उपस्थिती लाभली.
यामध्ये डॉ. धवलसिंह प्रतापसिंह मोहिते पाटील, माळशिरस तालुक्याचे माजी आमदार रामभाऊ सातपुते, अकलूज नगर परिषदेचे उपनगराध्यक्ष शिवतेजसिंह मोहिते पाटील यांच्या धर्मपत्नी देवण्यादेवी मोहिते पाटील यांच्यासह विविध राजकीय व सामाजिक संघटनांचे पदाधिकारी, नगरसेवक आणि कार्यकर्ते मोठ्या संख्येने उपस्थित होते.
तसेच सकल हिंदू समाजाचे संयोजक संजय एकतपुरे, श्री शिवप्रतिष्ठान हिंदुस्तानचे प्रताप (दादा) साळुंखे आणि राष्ट्रीय स्वयंसेवक संघाचे मनीष बोत्रे यांचीही उपस्थिती लक्षणीय होती.कार्यक्रमाची सांगता प्रेरणा मंत्र आणि ध्येय मंत्राने करण्यात आली. शेवटी उपस्थित सर्व हिंदू बंधू-भगिनींसाठी महाप्रसादाचे आयोजन करण्यात आले होते.
एकूणच, पारंपरिक दिमाख, धार्मिक श्रद्धा आणि सामाजिक एकात्मतेचा सुंदर संगम घडवणारे ‘विराट हिंदू संमेलन’ अकलूजमध्ये अत्यंत यशस्वी आणि उत्साहपूर्ण वातावरणात पार पडले. या कार्यक्रमासाठी तन-मन-धन अर्पण करणाऱ्या सर्व कार्यकर्त्यांचे सकल हिंदू समाजाच्या वतीने आभार मानण्यात आले.
